ਕਾਰਨੀ ਸਰਕਾਰ ਦੇ ਸਪੈਂਡਿੰਗ ਬਿੱਲ ਖਿਲਾਫ਼ ਵੋਟ ਕਰਨਗੇ ਪੌਲੀਐਵ

ਕੈਨੇਡਾ ਦੀ ਮੁੱਖ ਵਿਰੋਧੀ ਧਿਰ ਦੇ ਲੀਡਰ ਪੀਅਰ ਪੌਲੀਐਵ ਨੇ ਕਾਰਨੀ ਸਰਕਾਰ ਦੇ ਸਪੈਂਡਿੰਗ ਬਿੱਲ਼ ਖਿਲਾਫ ਵੋਟ ਕਰਨ ਦੀ ਘੋਸ਼ਣਾ ਕੀਤੀ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਦੀ ਘੱਟ ਗਿਣਤੀ ਸਰਕਾਰ ਲਈ ਇਹ ਪਹਿਲਾ ਟੈਸਟ ਹੋਵੇਗਾ। ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਲਿਬਰਲਸ ਦੇ $486.9-ਬਿਲੀਅਨ ਦੇ ਖ਼ਰਚ ਬਿੱਲ ਦੇ ਖਿਲਾਫ ਵੋਟ ਕਰੇਗੀ।

ਦੱਸਣਯੋਗ ਹੈ ਕਿ ਹਾਊਸ ਆਫ ਕੌਮਨਜ਼ ਵਿਚ ਲਿਬਰਲਸ ਕੋਲ 169 ਸੀਟਾਂ ਹਨ ਜੋ ਬਹੁਮਤ ਤੋਂ ਤਿੰਨ ਘੱਟ ਹਨ।ਕੰਜ਼ਰਵੇਟਿਵ ਜੋ ਕਿ ਮੁੱਖ ਵਿਰੋਧੀ ਧਿਰ ਹੈ ਉਸ ਕੋਲ 144 ਸੀਟਾਂ ਹਨ, ਜਦੋਂ ਬਲਾਕ ਕਿਊਬੈਕਵਾ ਕੋਲ 22 ਅਤੇ ਐੱਨ. ਡੀ. ਪੀ. ਕੋਲ 7 ਅਤੇ ਗ੍ਰੀਨ ਪਾਰਟੀ ਕੋਲ ਇੱਕ ਸੀਟ ਹਨ।

ਹਾਊਸ ਵਿਚ ਕਿਸੇ ਵੀ ਬਿੱਲ ਨੂੰ ਪਾਸ ਕਰਵਾਉਣ ਲਈ ਸਰਕਾਰ ਨੂੰ ਹੋਰ ਦਲਾਂ ਦੇ ਸਾਂਸਦਾਂ ਤੋਂ ਸਮਰਥਨ ਦੀ ਲੋੜ ਹੋਵੇਗੀ। ਪੌਲੀਐਵ ਨੇ ਕਿਹਾ ਕਿ ਸਰਕਾਰ ਨੇ ਸੰਸਦ ਤੋਂ ਜਿਸ ਵਾਧੂ ਖਰਚ ਲਈ ਮਨਜ਼ੂਰੀ ਮੰਗੀ ਹੈ ਉਹ ਨਿਵੇਸ਼ ਲਈ ਨਹੀਂ ਹੈ, ਇਸ ਲਈ ਉਹਨਾਂ ਦੀ ਪਾਰਟੀ ਇਸ ਦਾ ਸਮਰਥਨ ਨਹੀਂ ਕਰਨ ਜਾ ਰਹੀ।