ਪੀ.ਐਮ. ਕਾਰਨੀ ਅਤੇ ਟਰੰਪ ਨੇ ਵਪਾਰ ਅਤੇ ਨਵੇਂ ਆਰਥਿਕ ਸੁਰੱਖਿਆ ਸਬੰਧਾਂ ਬਾਰੇ ਕੀਤੀ ਗੱਲਬਾਤ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਵੀਰਵਾਰ ਨੂੰ ਵਪਾਰ ਅਤੇ ਨਵੇਂ ਆਰਥਿਕ ਸੁਰੱਖਿਆ ਸਬੰਧਾਂ ਬਾਰੇ ਗੱਲਬਾਤ ਕੀਤੀ ਹੈ। ਦੋਹਾਂ ਲੀਡਰਾਂ ਵਿਚਕਾਰ ਹੋਈ ਇਸ ਗੱਲਬਾਤ ਨੂੰ ਸਕਾਰਾਤਮਕ ਅਤੇ ਅੱਗੇ ਨਤੀਜੇ 'ਤੇ ਪਹੁੰਚਣ ਵਾਲੀ ਦੱਸਿਆ ਗਿਆ ਹੈ। ਕਾਰਨੀ ਅਤੇ ਟਰੰਪ ਨੇ ਇਸ ਦੌਰਾਨ ਯੂਕਰੇਨ ਦੇ ਮੁੱਦੇ 'ਤੇ ਵੀ ਗੱਲ ਕੀਤੀ, ਦੋਵੇਂ ਲੀਡਰ ਜਲਦ ਹੀ ਦੁਬਾਰਾ ਮੀਟਿੰਗ ਕਰਨ ਲਈ ਵੀ ਸਹਿਮਤ ਹੋਏ ਹਨ।

ਪ੍ਰਧਾਨ ਮੰਤਰੀ ਅਤੇ ਟਰੰਪ ਵਿਚਕਾਰ ਫੋਨ 'ਤੇ ਗੱਲਬਾਤ ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਦੇ ਅਮਰੀਕੀ ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਨਾਲ ਮੁਲਾਕਾਤ ਤੋਂ ਕੁਝ ਘੰਟਿਆਂ ਬਾਅਦ ਹੋਈ ਹੈ। ਆਨੰਦ ਅੱਜ ਵਾਸ਼ਿੰਗਟਨ ਵਿਚ ਸਨ।

ਗੌਰਤਲਬ ਹੈ ਕਿ ਕੈਨੇਡਾ ਉਤੇ 1 ਅਗਸਤ ਨੂੰ ਵਧਾਏ ਗਏ ਟੈਰਿਫ ਤੋਂ ਬਾਅਦ ਕਾਰਨੀ ਦੀ ਟਰੰਪ ਨਾਲ ਇਹ ਤਾਜ਼ਾ ਗੱਲਬਾਤ ਹੈ, ਟਰੰਪ ਨੇ ਵਪਾਰ ਵਾਰਤਾ ਚੱਲ ਰਹੀ ਹੋਣ ਵਿਚਕਾਰ ਕੈਨੇਡਾ 'ਤੇ ਟੈਰਿਫ ਵਧਾ ਕੇ 35 ਫੀਸਦੀ ਕਰ ਦਿੱਤਾ ਸੀ। ਹਾਲਾਂਕਿ, ਜ਼ਿਆਦਾਤਰ ਸਾਮਾਨ ਦੋਵਾਂ ਦੇਸ਼ਾਂ ਵਿਚਕਾਰ ਫ੍ਰੀ ਟਰੇਡ ਸਮਝੌਤੇ ਦੇ ਅਧੀਨ ਆਉਂਦੇ ਹਨ ਪਰ ਹੋਰ ਮੁਲਕਾਂ ਦੇ ਨਾਲ ਹੀ ਕੈਨੇਡਾ ਦੇ ਸਟੀਲ, ਐਲੂਮੀਨੀਅਮ, ਕਾਪਰ ਅਤੇ ਆਟੋਮੋਬਾਈਲਜ਼ 'ਤੇ ਵੀ ਟੈਰਿਫ ਹੈ।