ਪਹਿਲਗਾਮ 'ਚ ਹੋਏ ਅੱਤਵਾਦੀ ਹਮਲੇ ਤੋਂ ਬਾਅਦ ਪੀ. ਐੱਮ. ਮੋਦੀ ਆਪਣਾ ਸਾਊਦੀ ਅਰਬ ਦੌਰਾ ਛੱਡ ਕੇ ਪਰਤੇ ਭਾਰਤ

ਪੀ. ਐੱਮ. ਮੋਦੀ ਜੰਮੂ-ਕਸ਼ਮੀਰ ਦੇ ਪਹਿਲਗਾਮ ਵਿਚ ਹੋਏ ਅੱਤਵਾਦੀ ਹਮਲੇ ਤੋਂ ਬਾਅਦ ਸਾਊਦੀ ਅਰਬ ਦੀ ਯਾਤਰਾ ਦੇਰ ਰਾਤ ਵਿਚਕਾਰ ਛੱਡਦੇ ਹੋਏ ਅੱਜ ਸਵੇਰ ਨਵੀਂ ਦਿੱਲੀ ਵਾਪਸ ਆ ਗਏ।

ਖ਼ਬਰਾਂ ਮੁਤਾਬਕ, ਪਾਕਿਸਤਾਨ ਨੂੰ ਕਰੜੇ ਸੰਕੇਤ ਵਜੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਜਹਾਜ਼ ਨੇ ਸਾਊਦੀ ਤੋਂ ਨਵੀਂ ਦਿੱਲੀ ਵਾਪਸ ਆਉਂਦੇ ਸਮੇਂ ਪਾਕਿਸਤਾਨ ਦੇ ਹਵਾਈ ਖੇਤਰ ਦਾ ਇਸਤੇਮਾਲ ਨਹੀਂ ਕੀਤਾ ਅਤੇ ਇਸ ਦੀ ਬਜਾਏ ਅਰਬ ਸਾਗਰ ਦੇ ਉੱਪਰੋਂ ਹੁੰਦੇ ਹੋਏ ਗੁਜਰਾਤ ਤੋਂ ਭਾਰਤ ਵਿਚ ਲੈਂਡ ਕੀਤਾ, ਜਦੋਂ ਕਿ ਸਾਊਦੀ ਅਰਬ ਜਾਂਦੇ ਸਮੇਂ ਪੀ. ਐੱਮ. ਮੋਦੀ ਦਾ ਜਹਾਜ਼ ਪਾਕਿਸਤਾਨ ਦੇ ਹਵਾਈ ਖੇਤਰ ਵਿਚੋਂ ਲੰਘਿਆ ਸੀ।

ਗੌਰਤਲਬ ਹੈ ਕਿ ਜੰਮੂ-ਕਸ਼ਮੀਰ ਦੇ ਪਹਿਲਗਾਮ ਵਿਚ ਕੱਲ੍ਹ ਅੱਤਵਾਦੀ ਹਮਲੇ ਵਿਚ 27 ਲੋਕ ਮਾਰੇ ਗਏ ਸਨ ਅਤੇ 20 ਤੋਂ ਵੱਧ ਲੋਕ ਜ਼ਖਮੀ ਹਨ। ਇਹ ਹਮਲਾ ਉਸ ਸਮੇਂ ਹੋਇਆ ਜਦੋਂ ਬੈਸਰਾਨ ਘਾਟੀ ਵਿਚ ਵੱਡੀ ਗਿਣਤੀ ਵਿਚ ਸੈਲਾਨੀ ਮੌਜੂਦ ਸਨ। ਇਹ ਜੰਮੂ-ਕਸ਼ਮੀਰ ਵਿਚ 14 ਫਰਵਰੀ 2019 ਨੂੰ ਹੋਏ ਪੁਲਵਾਮਾ ਹਮਲੇ ਤੋਂ ਬਾਅਦ ਸਭ ਤੋਂ ਵੱਡਾ ਹਮਲਾ ਹੈ, ਜਿਸ ਦੀ ਜ਼ਿੰਮੇਵਾਰੀ ਪਾਕਿਸਤਾਨ ਸਥਿਤ ਲਸ਼ਕਰ-ਏ-ਤੋਇਬਾ ਦੀ ਇੱਕ ਸਥਾਨਕ ਸ਼ਾਖਾ ਵਿਰੋਧ ਫਰੰਟ ਨੇ ਲਈ ਹੈ।