9.55C Vancouver 9.55C VancouverJun 30, 2021 9:52 AM -
ਬਿਜਲਈ ਅਤੇ ਆਈਟੀ ਮਹਿਕਮੇ ਵੱਲੋਂ ਅੱਜ ਬੁੱਧਵਾਰ ਨੂੰ ਮਿਲੀ ਜਾਣਕਾਰੀ ਮੁਤਾਬਕ, ਡਿਜਿਟਲ ਇੰਡੀਆ ਮੁਹਿੰਮ ਦੀ ਛੇਵੀਂ ਵਰ੍ਹੇਗੰਢ ਮੌਕੇ ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ, 1 ਜੁਲਾਈ ਨੂੰ ਇਸਦੀਆਂ ਵੱਖਰੀਆਂ ਸਕੀਮਾਂ ਦੇ ਲਾਭਪਾਤਰੀਆਂ ਨਾਲ ਵੀਡੀਓ ਕਾਨਫਰੈਂਸ ਰਾਹੀਂ ਗੱਲ ਕਰਨਗੇ।
ਅਧਿਕਾਰਿਤ ਰਿਲੀਜ਼ 'ਚ ਲਿਖਿਆ ਗਿਆ ਹੈ,"ਡਿਜੀਟਲ ਇੰਡੀਆ, ਨਵੇਂ ਭਾਰਤ ਦੀ ਸਭ ਤੋਂ ਵੱਡੀ ਕਾਮਯਾਬੀ ਹੈ, ਜਿਸ ਵਿੱਚ- ਸੇਵਾਵਾਂ ਦੇਣੀਆਂ, ਸਰਕਾਰ ਨੂੰ ਨਾਗਰਿਕਾਂ ਦੇ ਨਜ਼ਦੀਕ ਲਿਆਉਣਾ, ਨਾਗਰਿਕਾਂ ਦੀ ਸ਼ਮੂਲੀਅਤ ਨੂੰ ਵਧਾਉਣਾ ਅਤੇ ਲੋਕਾਂ ਨੂੰ ਹੋਰ ਸਸ਼ਕਤੀਕ੍ਰਿਤ ਕਰਨਾ ਸ਼ਾਮਲ ਹੈ।"
ਬਿਜਲਈ ਅਤੇ ਆਈਟੀ ਵਜ਼ੀਰ ਰਵੀ ਸ਼ੰਕਰ ਪ੍ਰਸਾਦ ਵੀ ਇਸ ਮੌਕੇ ਸ਼ੁਰੂਆਤੀ ਸੰਬੋਧਨ ਕਰਨਗੇ।
ਗੱਲ-ਬਾਤ ਦੇ ਇਸ ਦੌਰ ਤੋਂ ਬਾਅਦ ਪੀਐੱਮ ਸੰਬੋਧਨ ਕਰਨਗੇ ਅਤੇ ਡਿਜੀਟਲ ਇੰਡੀਆ ਦੀਆਂ ਕਈ ਪ੍ਰਾਪਤੀਆਂ ਬਾਰੇ ਅਤੇ ਲੋਕਾਂ ਨਾਲ ਜੁੜਨ ਦੀ ਇਸਦੀ ਕਈ ਸਾਲਾਂ ਦੀ ਸਫ਼ਲਤਾ ਦੀ ਕਹਾਣੀ ਵੀ ਦੱਸਣਗੇ।
ਉਹ ਹੋਰ ਕਈ ਵਿਕਾਸ ਕਾਰਜਾਂ ਅਤੇ ਇਸ ਯੋਜਨਾ ਦੇ ਤਹਿਤ ਆਉਣ ਵਾਲੇ ਸਮੇਂ ਵਿੱਚ ਕੀਤੇ ਜਾਣ ਵਾਲੇ ਕੰਮਾਂ ਬਾਰੇ ਵੀ ਇੱਕ ਝਲਕ ਦੇਣਗੇ।
"ਇਹ ਸੈਸ਼ਨ ਬਹੁਤ ਹੀ ਜਾਣਕਾਰੀ ਨਾਲ ਭਰੀ ਗੱਲ ਬਾਤ ਵਾਲਾ ਹੋਵੇਗਾ, ਜਿਥੇ ਪੀਐੱਮ ਪੂਰੇ ਮੁਲਕ ਦੇ ਡਿਜੀਟਲ ਇੰਡੀਆ ਦੇ ਲਾਭਪਾਤਰੀਆਂ ਨਾਲ ਗੱਲ ਕਰਨਗੇ। ਇਹ ਸਾਡੇ ਲਈ ਇੱਕ ਮਾਣ ਵਾਲੀ ਗੱਲ ਹੈ, ਕਿਉਂਕਿ ਪ੍ਰਧਾਨ ਮੰਤਰੀ ਤੋਂ ਮਿਲੇ ਮਾਰਗਦਰਸ਼ਨ ਅਤੇ ਸਹਿਯੋਗ ਦੀ ਕੋਈ ਤੁਲਨਾ ਹੀ ਨਹੀਂ ਹੈ। ਉਹਨਾਂ ਦੀ ਗਤੀਸ਼ੀਲ ਅਗਵਾਈ ਹੇਠ ਡਿਜੀਟਲ ਇੰਡੀਆ ਮੁਹਿੰਮ ਨੂੰ ਅਸੀਂ ਬਹੁਤ ਅੱਗੇ ਲੈਕੇ ਜਾਵਾਂਗੇ,"ਡਿਜੀਟਲ ਇੰਡੀਆ ਕਾਰਪੋਰੇਸ਼ਨ ਦੇ ਐੱਮਡੀ ਅਤੇ ਸੀਈਓ ਅਤੇ ਐੱਨਈਜੀਡੀ, ਐੱਮਈਆਈਟੀਵਾਈ ਦੇ ਪ੍ਰਧਾਨ ਤੇ ਸੀਈਓ, ਅਭਿਸ਼ੇਕ ਸਿੰਘ ਨੇ ਪ੍ਰੋਗਰਾਮ ਤੋਂ ਪਹਿਲਾਂ ਆਖਿਆ।
ਐੱਮਈਆਈਟੀਵਾਈ ਦੇ ਸਕੱਤਰ, ਅਜੈ ਸਾਹਨੀ ਨੇ ਆਖਿਆ ਕਿ ਇਸ ਪ੍ਰੋਗਰਾਮ ਵਿੱਚ ਡਿਜੀਟਲ ਇੰਡੀਆ ਦੀਆਂ ਮੁੱਖ ਪ੍ਰਾਪਤੀਆਂ ਬਾਰੇ ਇੱਕ ਵੀਡੀਓ ਰਾਹੀਂ ਦੱਸਿਆ ਜਾਵੇਗਾ, ਜਿਸ ਦੇ ਨਾਲ ਹੀ ਪ੍ਰਧਾਨ ਮੰਤਰੀ ਵੱਲੋਂ ਡਿਜੀਟਲ ਇੰਡੀਆ ਦੀਆਂ ਵੱਖੋ-ਵੱਖਰੀਆਂ ਸਕੀਮਾਂ ਦੇ ਲਾਭਪਾਤਰੀਆਂ ਨਾਲ ਗੱਲਬਾਤ ਦਾ ਦੌਰ ਚੱਲੇਗਾ।
ਗ਼ੌਰਤਲਬ ਹੈ ਕਿ ਡਿਜੀਟਲ ਇੰਡੀਆ, ਭਾਰਤ ਸਰਕਾਰ ਦੇ, ਮੁਲਕ ਨੂੰ ਡਿਜੀਟਲੀ ਸਸ਼ਕਤੀਕਰਨ ਸਮਾਜ ਅਤੇ ਜਾਣਕਾਰੀ ਨਾਲ ਭਰਪੂਰ ਅਰਥਚਾਰਾ ਬਣਾਉਣ ਦੇ ਦੂਰਦਰਸ਼ੀ ਪ੍ਰੋਗਰਾਮਾਂ ਵਿੱਚੋਂ ਪ੍ਰਮੁੱਖ ਪ੍ਰੋਗਰਾਮ ਹੈ।
ਦੱਸਣਯੋਗ ਹੈ ਕਿ ਇਸ ਉਤਸ਼ਾਹ ਭਰਪੂਰ ਪ੍ਰੋਗਰਾਮ ਦੀ ਘੁੰਡ ਚੁਕਾਈ, ਪ੍ਰਧਾਨ ਮੰਤਰੀ ਨਰੇਂਦਰ ਮੋਦੀ ਵੱਲੋਂ 1 ਜੁਲਾਈ, 2015 ਨੂੰ ਕੀਤੀ ਗਈ ਸੀ।
