ਨਵੇਂ ਵੇਰੀਐਂਟਸ ਦੇ ਫੈਲਾਅ ਕਾਰਨ ਕੋਵਿਡ-19 ਦੀ ਤੀਜੀ ਵੇਵ ਦਾ ਖਤਰਾ: ਪ੍ਰਧਾਨ ਮੰਤਰੀ ਟਰੂਡੋ

ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਕੈਨੇਡਾ ਦੇ ਚੋਟੀ ਦੇ ਡਾਕਟਰਾਂ ਦੀ ਮੌਜੂਦਗੀ 'ਚ ਕੋਵਿਡ-19 ਦੇ ਨਵੇਂ ਵੇਰੀਐਂਟਸ ਦੇ ਫੈਲਾਅ 'ਤੇ ਚਿੰਤਾ ਜ਼ਾਹਿਰ ਕੀਤੀ। ਹਾਲਾਂਕਿ ਇਸੇ ਮੌਕੇ ਟਰੂਡੋ ਨੇ ਕੋਵਿਡ-19 ਤੋਂ ਬਚਾਅ ਦੀਆਂ ਲੱਖਾਂ ਵੈਕਸੀਨ ਡੋਜ਼ ਹਾਸਿਲ ਕਰਨ ਦੀ ਜਾਣਕਾਰੀ ਵੀ ਦਿੱਤੀ। ਟਰੂਡੋ ਨੇ ਕਿਹਾ ਕਿ, ਕੋਈ ਨਹੀਂ ਚਾਹੁੰਦਾ ਕਿ, ਕੋਵਿਡ-19 ਦੀ ਤੀਜੀ ਵੇਵ ਦਸਤਕ ਦੇਵੇ, ਖਾਸ ਤੌਰ 'ਤੇ ਅਜਿਹੀ ਤੀਜੀ ਵੇਵ ਜਿਹੜੀ ਕਿ ਨਵੇਂ ਅਤੇ ਵਧੇਰੇ ਖਤਰਨਾਕ ਵਾਇਰਸਾਂ ਵਾਲੀ ਹੋਵੇ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ "ਤੁਸੀਂ ਵੀ ਇਹਨਾਂ ਨਵੇਂ ਵੇਰੀਐਂਟਸ ਬਾਰੇ ਚਿੰਤਤ ਹੋਵੋਂਗੇ, ਪਰ ਅਸੀਂ ਇਹਨਾਂ 'ਤੇ ਕਾਬੂ ਪਾਉਣ ਲਈ ਸਭ ਤੋਂ ਬਿਹਤਰ ਰਿਸਰਚਰ, ਐਪੀਡਿਮੀਔਲੋਜਿਸਟ ਅਤੇ ਮਾਡਲਰ ਲਗਾਏ ਹਨ। ਟਰੂਡੋ ਨੇ ਇਸ ਦੌਰਾਨ ਇਹਨਾਂ ਮਾਮਲਿਆਂ 'ਤੇ ਲਗਾਮ ਕਸਣ ਲਈ $53 ਮਿਲੀਅਨ ਦਾ ਐਲਾਨ ਵੀ ਕੀਤਾ।

ਕੋਵਿਡ-19 ਇਨਫੈਕਸ਼ਨਸ 'ਚ ਗਿਰਾਵਟ ਕੀਤੀ ਦਰਜ: ਡਾ. ਥਰੈਸਾ ਟੈਮ

ਕੈਨੇਡਾ ਦੀ ਚੀਫ਼ ਪਬਲਿਕ ਹੈਲਥ ਅਫ਼ਸਰ, ਡਾ. ਥਰੈਸਾ ਟੈਮ ਦਾ ਕਹਿਣਾ ਹੈ ਕਿ, ਕੋਵਿਡ-19 ਇਨਫੈਕਸ਼ਨਸ 'ਚ ਗਿਰਾਵਟ ਦਰਜ ਕੀਤੀ ਗਈ ਹੈ। ਪਰ ਉਨ੍ਹਾਂ ਚਿੰਤਾ ਪ੍ਰਗਟਾਈ ਹੈ ਕਿ, ਪੈਂਡੈਮਿਕ 'ਤੇ ਕਾਬੂ ਪਾਉਣ 'ਚ ਵਾਇਰਸ ਦੇ ਨਵੇਂ ਵੇਰੀਐਂਟ ਅੜਿੱਕਾ ਬਣ ਸਕਦੇ ਹਨ। ਦੇਸ਼ ਦੇ ਘਟੋ-ਘੱਟ 3 ਸੂਬਿਆਂ 'ਚ ਇਹਨਾਂ ਨਵੇਂ ਵੇਰੀਐਂਟਸ ਦੇ ਕਮਿਊਨਿਟੀ ਫੈਲਾਅ ਦੀਆਂ ਰਿਪੋਰਟਸ ਸਾਹਮਣੇ ਆਈਆਂ ਹਨ। ਡਾ. ਟੈਮ ਨੇ ਕਿਹਾ ਕਿ, ਇਹ ਨਵੇਂ ਵੇਰੀਐਂਟਸ ਦੇ ਮਾਮਲੇ, ਵਾਇਰਸ ਦੀ ਤੀਜੀ ਵੇਵ ਦਾ ਰੂਪ ਨਾ ਧਾਰ ਲੈਣ, ਇਸ ਦੇ ਬਚਾਅ ਲਈ ਲਗਾਤਾਰ ਚੌਕਸੀ ਵਰਤਣਾ ਜ਼ਰੂਰੀ ਹੈ।