19.24C Vancouver 19.24C VancouverJan 15, 2021 3:23 AM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਕਿਹਾ ਕਿ ਅੱਜ ਕੈਨੇਡਾ ਆਪਣੇ ਸਭ ਤੋਂ ਲੰਮੇ ਸਮੇਂ ਤੱਕ ਸੇਵਾਵਾਂ ਨਿਭਾਉਣ ਵਾਲੇ ਮਿਲਟਰੀ ਕਮਾਂਡਰਾਂ ਵਿੱਚੋਂ ਇੱਕ ਦਾ ਧੰਨਵਾਦ ਕਰ ਰਿਹਾ ਹੈ।
ਉਨ੍ਹਾਂ ਇਹ ਟਿੱਪਣੀ ਕਨੇਡੀਅਨ ਆਰਮਡ ਫੋਰਸਿਜ਼ ਦੀ ਕਮਾਂਡ ਛੱਡ ਰਹੇ ਜਨਰਲ ਜੋਨਾਥਨ ਵੈਂਸ ਬਾਰੇ ਕੀਤੀ।
ਪਰ ਨਾਲ ਹੀ ਉਨ੍ਹਾਂ ਕਿਹਾ ਕਿ ਕੈਨੇਡਾ ਜਾਣਦਾ ਹੈ ਕਿ ਹੁਣ ਇਹ ਅਹੁਦਾ ਇੱਕ ਹੋਰ ਬੇਹੱਦ ਜ਼ਿੰਮੇਵਾਰ ਅਫ਼ਸਰ ਵੱਲੋਂ ਸੰਭਾਲਿਆ ਜਾਵੇਗਾ।
ਟਰੂਡੋ ਨੇ ਐਡਮਿਰਲ ਆਰਟ ਮੈਕਡੌਨਲਡ ਦਾ ਰਸਮੀ ਤੌਰ 'ਤੇ 'ਚੀਫ਼ ਆਫ ਡਿਫੈਂਸ ਸਟਾਫ਼' ਚੁਣੇ ਜਾਣ 'ਤੇ ਸਵਾਗਤ ਕੀਤਾ।
ਯਾਦ ਰਹੇ ਅੱਜ 'ਚੇਂਜ ਆਫ ਕਮਾਂਡ' ਸਮਾਗਮ ਦੌਰਾਨ ਜਨਰਲ ਜੋਨਾਥਨ ਵੈਂਸ ਦੀ ਜਗ੍ਹਾ, ਐਡਮਿਰਲ ਆਰਟ ਮੈਕਡੌਨਲਡ ਨੇ 'ਚੀਫ਼ ਆਫ ਡਿਫੈਂਸ ਸਟਾਫ਼' ਦਾ ਅਹੁਦਾ ਸੰਭਾਲਿਆ ਹੈ।
ਜਨਰਲ ਜੋਨਾਥਨ ਵੈਂਸ ਹੋਏ ਭਾਵੁਕ
ਅੱਜ ਐਡਮਿਰਲ ਆਰਟ ਮੈਕਡੌਨਲਡ ਨੂੰ ਕਨੇਡੀਅਨ ਆਰਮਡ ਫੋਰਸਿਜ਼ ਦੇ ਚੀਫ਼ ਆਫ ਡਿਫੈਂਸ ਸਟਾਫ਼ ਦੇ ਰਸਮੀ ਐਲਾਨ ਤੋਂ ਪਹਿਲਾਂ ਅਹੁਦਾ ਛੱਡ ਰਹੇ ਜਨਰਲ ਜੋਨਾਥਨ ਵੈਂਸ ਆਪਣੇ ਸੰਬੋਧਨ ਦੌਰਾਨ ਕਾਫੀ ਭਾਵੁਕ ਹੋ ਗਏ।
ਉਨ੍ਹਾਂ ਦੀਆਂ ਅੱਖਾਂ 'ਚ ਉਸ ਵੇਲੇ ਹੰਝੂ ਆ ਗਏ, ਜਦ ਉਨ੍ਹਾਂ ਸੇਵਾਵਾਂ ਨਿਭਾਉਂਦੇ ਹੋਏ ਜਾਨ ਦੀ ਕੁਰਬਾਨੀ ਦੇਣ ਵਾਲੇ ਆਪਣੇ ਸਾਥੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਯਾਦ ਕੀਤਾ।
ਉਨ੍ਹਾਂ ਕਿਹਾ ਕਿ ਉਹ ਆਪਣੇ ਸਾਰੇ ਸਾਥੀਆਂ ਅਤੇ ਸਹਿਯੋਗ ਕਰਨ ਵਾਲੇ ਸਾਰੇ ਲੋਕਾਂ ਦੇ ਧੰਨਵਾਦੀ ਰਹਿਣਗੇ।
ਜਨਰਲ ਜੋਨਾਥਨ ਵੈਂਸ ਨੇ ਕਿਹਾ ਕਿ ਜਾਨ ਦੀ ਕੁਰਬਾਨੀ ਦੇਣ ਵਾਲੇ ਸਾਥੀਆਂ ਦੇ ਪਰਿਵਾਰਾਂ ਦਾ ਵੀ ਉਹ ਧੰਨਵਾਦ ਕਰਨਾ ਚਾਹੁੰਦੇ ਹਨ।
ਉਨ੍ਹਾਂ ਕਿਹਾ ਇਹ ਲੋਕ ਹਮੇਸ਼ਾ ਉਨ੍ਹਾਂ ਦੇ ਦਿਲ ਵਿੱਚ ਰਹਿਣਗੇ।
