ਪੰਜਾਬ ਨੈਸ਼ਨਲ ਬੈਂਕ ਦੇ ਤਿਮਾਹੀ ਨੰਬਰਾਂ ਨੇ ਕੀਤਾ ਨਿਰਾਸ਼, ਸ਼ੇਅਰ 13.6 ਫ਼ੀਸਦੀ ਟੁੱਟਾ

ਸਰਕਾਰੀ ਖੇਤਰ ਦੇ ਪੰਜਾਬ ਨੈਸ਼ਨਲ ਬੈਂਕ (ਪੀ. ਐੱਨ. ਬੀ.) ਦੇ ਸ਼ੇਅਰ ਪ੍ਰਾਈਸ ਵਿਚ ਵੀਰਵਾਰ ਨੂੰ 13.6 ਫ਼ੀਸਦ ਦੀ ਤੇਜ਼ ਗਿਰਾਵਟ ਦਰਜ ਹੋਈ। ਬੈਂਕ ਦੇ ਚੌਥੀ ਤਿਮਾਹੀ ਦੇ ਵਿੱਤੀ ਨਤੀਜੇ ਨਿਰਾਸ਼ਾਜਨਕ ਰਹਿਣ ਨਾਲ ਨਿਵੇਸ਼ਕਾਂ ਨੇ ਸ਼ੇਅਰ ਦੀ ਜਮ ਕੇ ਵਿਕਵਾਲੀ ਕੀਤੀ।

ਪੀ. ਐੱਨ. ਬੀ. ਨੇ ਚੌਥੀ ਤਿਮਾਹੀ ਵਿਚ ਆਪਣੇ ਮੁਨਾਫੇ ਵਿਚ 66 ਫ਼ੀਸਦੀ ਗਿਰਾਵਟ ਦੀ ਰਿਪੋਰਟ ਦਿੱਤੀ ਹੈ। ਪੀ. ਐੱਨ. ਬੀ. ਦਾ ਸ਼ੇਅਰ ਪਿਛਲੇ ਦਿਨ ਦੇ ਬੰਦ ਪ੍ਰਾਈਸ 33.10 ਰੁਪਏ ਤੋਂ ਡਿੱਗ ਕੇ ਅੱਜ ਕਾਰੋਬਾਰ ਦੇ ਸ਼ੁਰੂ ਵਿਚ 31.70 ਰੁਪਏ ਪ੍ਰਤੀ ਸ਼ੇਅਰ 'ਤੇ ਟ੍ਰੇਡ ਕਰ ਰਿਹਾ ਸੀ। ਦੁਪਹਿਰ ਬਾਅਦ ਤਕਰੀਬਨ 3.19 ਵਜੇ ਪੀ. ਐੱਨ. ਬੀ. ਦਾ ਸ਼ੇਅਰ 13.44 ਫ਼ੀਸਦੀ ਡਿੱਗ ਕੇ 28.65 ਰੁਪਏ 'ਤੇ ਆ ਗਿਆ, ਇਸ ਤੋਂ ਪਹਿਲਾਂ ਇਸ ਨੇ ਦਿਨ ਦੇ ਕਾਰੋਬਾਰ ਦੌਰਾਨ 28.50 ਰੁਪਏ ਪ੍ਰਤੀ ਸ਼ੇਅਰ ਦਾ ਹੇਠਲਾ ਪੱਧਰ ਵੀ ਦੇਖਿਆ।

2021-22 ਦੀ ਚੌਥੀ ਤਿਮਾਹੀ ਵਿਚ ਪੀ. ਐੱਨ. ਬੀ. ਦੇ ਵਿੱਤੀ ਨਤੀਜੇ ਖਰਾਬ ਰਹਿਣ ਨਾਲ ਉਸ ਦੇ ਸ਼ੇਅਰਾਂ ਦੀ ਵਿਕਵਾਲੀ ਹੋਈ। ਪੀ. ਐੱਨ. ਬੀ. ਨੇ ਜਨਵਰੀ-ਮਾਰਚ 2022 ਦੀ ਤਿਮਾਹੀ ਦੌਰਾਨ 202 ਕਰੋੜ ਰੁਪਏ ਦਾ ਸ਼ੁੱਧ ਮੁਨਾਫਾ ਦਰਜ ਕੀਤਾ, ਜਦੋਂ ਕਿ ਇਸ ਤੋਂ ਪਿਛਲੇ ਵਿੱਤੀ ਸਾਲ ਦੀ ਇਸੇ ਤਿਮਾਹੀ ਵਿਚ ਇਹ 586 ਕਰੋੜ ਰੁਪਏ ਰਿਹਾ ਸੀ। ਇਸ ਤਰ੍ਹਾਂ ਪੀ. ਐੱਨ. ਬੀ. ਦੇ ਮੁਨਾਫੇ ਵਿਚ 66 ਫ਼ੀਸਦੀ ਗਿਰਾਵਟ ਆਈ।