8.83C Vancouver 8.83C VancouverJul 9, 2026 2:03 PM - Connect Newsroom - Ramandeep Kaur with files from The Canadian Press
ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਪੀਅਰ ਪੌਲੀਐਵ ਨੇ ਲਾਰੈਂਸ ਬਿਸ਼ਨੋਈ ਗੈਂਗ ਨੂੰ ਲੈ ਕੇ ਦੇਸ਼ ਦੇ ਇਮੀਗ੍ਰੇਸ਼ਨ ਅਤੇ ਅਪਰਾਧ ਕਾਨੂੰਨ ਨੂੰ ਕਮਜ਼ੋਰ ਦੱਸਦਿਆਂ ਲਿਬਰਲ ਸਰਕਾਰ 'ਤੇ ਤਿੱਖਾ ਨਿਸ਼ਾਨਾ ਸਾਧਿਆ ਹੈ। ਉਨ੍ਹਾਂ ਦੋਸ਼ ਲਗਾਇਆ ਹੈ ਕਿ ਇਨ੍ਹਾਂ ਨੀਤੀਆਂ ਕਾਰਨ ਹੀ ਅੱਜ ਦੇਸ਼ ਵਿਚ ਗੈਂਗਸਟਰ ਨੈੱਟਵਰਕ ਵਧਿਆ ਹੈ।
ਪੌਲੀਐਵ ਮੁਤਾਬਕ, ਪਿਛਲੇ ਕੁਝ ਸਮੇਂ ਤੋਂ ਰਿਕਾਰਡ ਪੱਧਰ 'ਤੇ ਹੋਈ ਇਮੀਗ੍ਰੇਸ਼ਨ ਅਤੇ ਨਰਮ ਕਾਨੂੰਨਾਂ ਦੀ ਆੜ ਵਿਚ ਅਪਰਾਧਿਕ ਸਿੰਡੀਕੇਟਸ, ਖ਼ਾਸ ਕਰ ਲਾਰੈਂਸ ਬਿਸ਼ਨੋਈ ਗੈਂਗ ਵੱਲੋਂ ਆਪਣੇ ਨੈੱਟਵਰਕ ਦਾ ਪਸਾਰ ਕੀਤਾ ਗਿਆ। ਹਾਲ ਹੀ ਵਿਚ ਇੱਕ ਡਿਪੋਰਟੇਸ਼ਨ ਸੁਣਵਾਈ ਦੌਰਾਨ ਇਹ ਖ਼ੁਲਾਸਾ ਵੀ ਹੋਇਆ ਸੀ ਕਿ ਇਸ ਗੈਂਗ ਨੇ ਕੈਨੇਡੀਅਨ ਪੁਲਿਸ ਨੂੰ ਪੱਤਰ ਭੇਜ ਕੇ ਕੈਨੇਡਾ ਵਿਚ ਉਸ ਦੇ 1,000 ਤੋਂ ਵੱਧ ਸ਼ਾਰਪਸ਼ੂਟਰ ਹੋਣ ਦਾ ਦਾਅਵਾ ਕੀਤਾ ਸੀ।
ਕੰਜ਼ਰਵੇਟਿਵ ਲੀਡਰ ਨੇ ਦੇਸ਼ ਵਿਚ ਆਏ ਤਮਾਮ ਗੈਂਗਸਟਰਾਂ ਅਤੇ ਅਪਰਾਧੀਆਂ ਨੂੰ ਲੱਭ ਕੇ ਡਿਪੋਰਟ ਕਰਨ ਅਤੇ ਇਸ ਦੇ ਨਾਲ ਹੀ ਭਵਿੱਖ ਵਿਚ ਕਿਸੇ ਵੀ ਸ਼ੱਕੀ ਅਪਰਾਧੀ ਨੂੰ ਦੇਸ਼ ਦੀ ਧਰਤੀ 'ਤੇ ਕਦਮ ਰੱਖਣ ਤੋਂ ਰੋਕਣ ਲਈ ਨਵੇਂ ਆਉਣ ਵਾਲੇ ਲੋਕਾਂ ਦੀ ਸਖ਼ਤ ਬੈਕਗਰਾਊਂਡ ਜਾਂਚ ਕਰਨ ਦੀ ਮੰਗ ਕੀਤੀ ਹੈ। ਉਹਨਾਂ ਕਿਹਾ ਕਿ ਸਰਕਾਰ ਦੀਆਂ ਨੀਤੀਆਂ ਦੇ ਕਾਰਨ ਹੀ ਅੱਜ ਲਾਰੈਂਸ ਬਿਸ਼ਨੋਈ ਵਰਗੇ ਗੈਂਗ ਕੈਨੇਡਾ ਵਿਚ ਆਮ ਲੋਕਾਂ ਨੂੰ ਡਰਾਉਣ-ਧਮਕਾਉਣ ਦੇ ਯੋਗ ਹੋਏ ਹਨ।
