ਪੌਲੀਐਵ ਨੇ ਜਗਮੀਤ ਸਿੰਘ ਦੀ ਘੋਸ਼ਣਾ ਤੋਂ ਬਾਅਦ ਸੰਸਦ ਦਾ ਵਿਸ਼ੇਸ਼ ਸੈਸ਼ਨ ਬੁਲਾਉਣ ਦੀ ਕੀਤੀ ਮੰਗ

ਕੰਜ਼ਰਵੇਟਿਵ ਪਾਰਟੀ ਦੇ ਪ੍ਰਧਾਨ ਪੀਅਰ ਪੌਲੀਐਵ ਨੇ ਜਗਮੀਤ ਸਿੰਘ ਦੀ ਘੋਸ਼ਣਾ ਤੋਂ ਬਾਅਦ ਟਰੂਡੋ ਸਰਕਾਰ ਦਾ ਬਹੁਮਤ ਖੁਸਣ ਦੇ ਮੱਦੇਨਜ਼ਰ ਸੰਸਦ ਦਾ ਵਿਸ਼ੇਸ਼ ਸੈਸ਼ਨ ਬੁਲਾਉਣ ਦੀ ਮੰਗ ਕੀਤੀ ਹੈ।

ਪੌਲੀਐਵ ਨੇ ਕਿਹਾ ਕਿ ਉਹ ਅੱਜ ਹੀ ਗਵਰਨਰ ਜਨਰਲ ਨੂੰ ਇਸ ਲਈ ਲਿਖ ਰਹੇ ਹਨ, ਤਾਂ ਜੋ ਪ੍ਰਧਾਨ ਮੰਤਰੀ ਨੂੰ ਇਹ ਪਤਾ ਲੱਗ ਸਕੇ ਕਿ ਉਹ ਸੱਤਾ ਵਿਚ ਬਣੇ ਰਹਿਣਗੇ ਜਾਂ ਫਿਰ ਦੇਸ਼ ਇਲੈਕਸ਼ਨ ਵਿਚ ਜਾਵੇਗਾ।

ਪੌਲੀਐਵ ਨੇ ਇਹ ਵੀ ਕਿਹਾ ਕਿ ਲਿਬਰਲ ਸਰਕਾਰ ਦੇ ਜਿਸ ਤਰ੍ਹਾਂ ਦੇ ਹਾਲਾਤ ਹਨ, ਇਸ ਸਥਿਤੀ ਵਿਚ ਦੇਸ਼ ਨਹੀਂ ਚੱਲ ਸਕਦਾ। ਇਸ ਦੇ ਨਾਲ ਹੀ ਉਨ੍ਹਾਂ ਜਗਮੀਤ ਸਿੰਘ ’ਤੇ ਵੀ ਨਿਸ਼ਾਨਾ ਸਾਧਿਆ।

ਉਨ੍ਹਾਂ ਕਿਹਾ ਕਿ ਐੱਨਡੀਪੀ ਲੀਡਰ ਨੇ ਸਤੰਬਰ ਵਿਚ ਵੀ ਇਸੇ ਤਰ੍ਹਾਂ ਦਾ ਸਟੰਟ ਕੀਤਾ ਸੀ ਅਤੇ ਇਹ ਦਾਅਵਾ ਕੀਤਾ ਸੀ ਕਿ ਹੁਣ ਟਰੂਡੋ ਦਾ ਸਮਰਥਨ ਨਹੀਂ ਕਰਨਗੇ ਪਰ ਆਪਣੀ ਗੱਲ ’ਤੇ ਨਹੀਂ ਰਹੇ ਅਤੇ ਟਰੂਡੋ ਨੂੰ ਲਗਾਤਾਰ ਬਚਾਇਆ।

ਗੌਰਤਲਬ ਹੈ ਕਿ ਕੰਜ਼ਰਵੇਟਿਵ ਦੇ ਹਾਲ ਹੀ ਦੇ ਸਰਕਾਰ ਖਿਲਾਫ ਮਤੇ ਵਿਚ ਵੀ ਐੱਨਡੀਪੀ ਨੇ ਲਿਬਰਲਸ ਦੀ ਸਪੋਰਟ ਕੀਤੀ ਸੀ।