ਪੀਅਰ ਪੌਲੀਐਵ ਦਾ ਵਾਅਦਾ ਸਰਕਾਰ ਬਣੀ ਤਾਂ ਕੈਨੇਡੀਅਨ ਕਾਮਿਆਂ ਲਈ ਜੌਬਸ ਦੇ ਮੌਕੇ ਵਧਾਉਣਗੇ

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਉਨ੍ਹਾਂ ਦੀ ਸਰਕਾਰ ਆਉਣ 'ਤੇ ਹੁਨਰਮੰਦ ਕਿੱਤਿਆਂ ਵਿਚ ਕੈਨੇਡੀਅਨ ਕਾਮਿਆਂ ਲਈ ਜੌਬਸ ਦੇ ਮੌਕੇ ਵਧਾਉਣ ਲਈ ਸਿਖਲਾਈ ਪ੍ਰੋਗਰਾਮ ਸ਼ੁਰੂ ਕਰਨ ਦੀ ਘੋਸ਼ਣਾ ਕੀਤੀ ਹੈ। ਇਸ ਯੋਜਨਾ ਤਹਿਤ ਨੌਜਵਾਨਾਂ ਨੂੰ ਟ੍ਰੇਨਿੰਗ ਦੌਰਾਨ $4,000 ਤੱਕ ਦੀ ਵਿੱਤੀ ਸਹਾਇਤਾ ਦਿੱਤੀ ਜਾਵੇਗੀ। ਪੌਲੀਐਵ ਨੇ ਕਿਹਾ ਕਿ ਇਸ ਯੋਜਨਾ ਦਾ ਮਕਸਦ ਕੈਨੇਡੀਅਨ ਕਾਮਿਆਂ ਨੂੰ ਵੱਧ ਤਨਖ਼ਾਹਾਂ ਵਾਲੀਆਂ ਨੌਕਰੀਆਂ ਲਈ ਤਿਆਰ ਕਰਨਾ ਅਤੇ ਕੈਨੇਡਾ ਦੀ ਅਮਰੀਕਾ 'ਤੇ ਨਿਰਭਰਤਾ ਘਟਾਉਣਾ ਹੈ।

ਪੌਲੀਐਵ ਨੇ ਕਿਹਾ ਕਿ ਸਿਖਲਾਈ ਪ੍ਰੋਗਰਾਮ ਤਹਿਤ 5 ਸਾਲਾਂ ਵਿਚ 350,000 ਕਾਮਿਆਂ ਨੂੰ ਟ੍ਰੇਨਿੰਗ ਦੇਣ ਦਾ ਉਦੇਸ਼ ਹੈ। ਉਨ੍ਹਾਂ ਕਿਹਾ ਕਿ ਅੱਜ ਹਾਲਾਤ ਇਹ ਹਨ ਕਿ ਜੋ ਕਾਮੇ ਘਰ ਬਣਾਉਂਦੇ ਹਨ ਉਹ ਖੁਦ ਦਾ ਘਰ ਨਹੀਂ ਖਰੀਦ ਸਕਦੇ, ਇਸ ਲਈ ਅਗਲੇ ਇਲੈਕਸ਼ਨ ਦਾ ਵਿਕਲਪ ਬਹੁਤ ਸਪੱਸ਼ਟ ਹੈ, ਲੋਕ ਕੰਜ਼ਰਵੇਟਿਸ ਨੂੰ ਚੁਣਨਗੇ, ਜੋ ਟੈਕਸ ਵਿਚ ਕਟੌਤੀ ਸਮੇਤ ਕਈ ਹੋਰ ਕਦਮ ਚੁੱਕੇਗੀ।