15.9C Vancouver 15.9C VancouverApr 2, 2026 2:03 PM - Connect Newsroom - Ramandeep Kaur with files from The Canadian Press
ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਵੱਧ ਰਹੀਆਂ ਤੇਲ ਕੀਮਤਾਂ ਦੇ ਮੱਦੇਨਜ਼ਰ ਕਾਰਨੀ ਸਰਕਾਰ ਨੂੰ ਫੈਡਰਲ ਗੈਸ ਟੈਕਸ ਖਤਮ ਕਰਨ ਦੀ ਮੰਗ ਕੀਤੀ ਹੈ, ਉਨ੍ਹਾਂ ਇਸ ਸਬੰਧ ਵਿੱਚ ਆਇਰਲੈਂਡ, ਸਪੇਨ ਅਤੇ ਆਸਟ੍ਰੇਲੀਆ ਵਰਗੇ ਦੇਸ਼ਾਂ ਦਾ ਹਵਾਲਾ ਦਿੱਤਾ, ਜਿਨ੍ਹਾਂ ਨੇ ਮਿਡਲ ਈਸਟ ਵਿੱਚ ਅਮਰੀਕਾ, ਇਜ਼ਰਾਈਲ ਅਤੇ ਈਰਾਨ ਵਿਚਕਾਰ ਤਣਾਅ ਕਾਰਨ ਤੇਲ ਦੀਆਂ ਕੀਮਤਾਂ ਵਧਣ 'ਤੇ ਟੈਕਸਾਂ ਵਿੱਚ ਕਟੌਤੀ ਕੀਤੀ ਹੈ।
ਪੌਲੀਐਵ ਦੇ ਪਲੈਨ ਅਨੁਸਾਰ, ਜੇਕਰ ਸਰਕਾਰ ਟੈਕਸ ਹਟਾਉਂਦੀ ਹੈ ਤਾਂ ਜਨਤਾ ਨੂੰ ਸਿੱਧੇ ਤੌਰ 'ਤੇ 25 ਸੈਂਟ ਪ੍ਰਤੀ ਲਿਟਰ ਦੀ ਬਚਤ ਹੋ ਸਕਦੀ ਹੈ। ਉਨ੍ਹਾਂ ਵਲੋਂ ਇਸ ਯੋਜਨਾ ਵਿੱਚ ਬਾਲਣ 'ਤੇ ਆਬਕਾਰੀ ਟੈਕਸ, ਜੀਐਸਟੀ ਅਤੇ ਸਾਫ਼ ਬਾਲਣ ਚਾਰਜ ਨੂੰ ਖ਼ਤਮ ਕਰਨ ਦੀ ਵਕਾਲਤ ਕੀਤੀ ਗਈ ਹੈ। ਉਨ੍ਹਾਂ ਅਨੁਸਾਰ, ਇਸ ਟੈਕਸ ਰਾਹਤ ਨਾਲ ਸਾਲ ਦੇ ਅੰਤ ਤੱਕ ਪਰਿਵਾਰ $1,200 ਬਚਾਅ ਸਕਦੇ ਹਨ।
ਪੌਲੀਐਵ ਦਾ ਕਹਿਣਾ ਹੈ ਕਿ ਇਸ ਟੈਕਸ ਬਰੇਕ ਦੀ ਭਰਪਾਈ ਸਰਕਾਰ ਨੂੰ ਹੋਰ ਖਰਚਿਆਂ ਵਿੱਚ ਕਟੌਤੀ ਕਰਕੇ ਕਰਨੀ ਚਾਹੀਦੀ ਹੈ, ਜਿਸ ਵਿੱਚ ਟੋਰਾਂਟੋ ਤੋਂ ਕਿਊਬੈਕ ਸਿਟੀ ਤੱਕ ਦੇ ਪ੍ਰਸਤਾਵਿਤ ਹਾਈ ਸਪੀਡ ਰੇਲ ਪ੍ਰਾਜੈਕਟ ਲਈ ਫਜ਼ੂਲ ਖਰਚ ਨੂੰ ਰੱਦ ਕਰਨਾ, ਗੰਨ ਬਾਇਬੈਕ ਪ੍ਰੋਗਰਾਮ ਨੂੰ ਵਾਪਸ ਲੈਣਾ, ਵਿਦੇਸ਼ੀ ਸਹਾਇਤਾ ਅਤੇ ਸਰਕਾਰੀ ਬਿਊਰੋਕਰੇਸੀ ਵਿੱਚ ਕਟੌਤੀ ਕਰਨਾ ਸ਼ਾਮਲ ਹੋਣਾ ਚਾਹੀਦਾ ਹੈ।
