ਵੈਨੇਜ਼ੁਏਲਾ ਵਿੱਚ ਅਮਰੀਕੀ ਕਾਰਵਾਈ ਤੋਂ ਬਾਅਦ ਪੌਲੀਐਵ ਨੇ ਤੁਰੰਤ ਪਾਈਪਲਾਈਨ ਪ੍ਰਵਾਨਗੀ ਦੀ ਕੀਤੀ ਮੰਗ

ਕੈਨੇਡਾ ਦੀ ਵਿਰੋਧੀ ਧਿਰ ਦੇ ਨੇਤਾ ਪੀਅਰ ਪੌਲੀਐਵ ਨੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੂੰ ਪੱਤਰ ਲਿਖ ਕੇ ਪ੍ਰਸ਼ਾਂਤ ਤੱਟ ਤੱਕ ਪਾਈਪਲਾਈਨ ਨੂੰ ਤੁਰੰਤ ਮਨਜ਼ੂਰੀ ਦੇਣ ਦੀ ਮੰਗ ਕੀਤੀ ਹੈ। ਪੌਲੀਐਵ ਨੇ ਚਿਤਾਵਨੀ ਦਿੱਤੀ ਹੈ ਕਿ ਅਮਰੀਕਾ ਵੱਲੋਂ ਵੈਨੇਜ਼ੁਏਲਾ ਦੇ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਨੂੰ ਹਿਰਾਸਤ ਵਿਚ ਲੈਣ ਅਤੇ ਉੱਥੋਂ ਦੇ ਤੇਲ ਭੰਡਾਰਾਂ 'ਤੇ ਕੰਟਰੋਲ ਕਰਨ ਤੋਂ ਬਾਅਦ ਕੈਨੇਡੀਅਨ ਤੇਲ ਦੀ ਅਮਰੀਕੀ ਬਾਜ਼ਾਰ ਵਿਚ ਮੰਗ ਘਟ ਸਕਦੀ ਹੈ।

ਉਨ੍ਹਾਂ ਕਿਹਾ ਕਿ ਕੈਨੇਡਾ ਨੂੰ ਹੁਣ ਜਲਦ ਤੋਂ ਜਲਦ ਨਵੇਂ ਬਾਜ਼ਾਰਾਂ ਦੀ ਲੋੜ ਹੈ, ਜਿਸ ਲਈ ਪ੍ਰਸ਼ਾਂਤ ਤੱਟ ਹੀ ਇੱਕ ਮੁੱਖ ਜ਼ਰੀਆ ਹੈ। ਵਿਰੋਧੀ ਧਿਰ ਦੇ ਲੀਡਰ ਮੁਤਾਬਕ, ਵੈਨੇਜ਼ੁਏਲਾ ਦਾ ਭਾਰੀ ਕੱਚੇ ਤੇਲ ਦਾ ਉਤਪਾਦਨ ਤੇਜ਼ੀ ਨਾਲ ਇਤਿਹਾਸਕ ਪੱਧਰ 'ਤੇ ਵਾਪਸ ਆ ਸਕਦਾ ਹੈ, ਜੋ ਕਿ ਸਿੱਧਾ ਕੈਨੇਡਾ ਦੇ ਹੈਵੀ ਕਰੂਡ ਲਈ ਚੁਣੌਤੀ ਹੋਵੇਗਾ।

ਅਮੈਰੀਕਨ ਐਨਰਜੀ ਇਨਫੋਰਮੇਸ਼ਨ ਐਡਮਨਿਸਟਰੇਸ਼ਨ ਮੁਤਾਬਕ, ਵੈਨੇਜ਼ੁਏਲਾ ਕੋਲ ਦੁਨੀਆ ਦਾ ਸਭ ਤੋਂ ਵੱਡਾ ਕੱਚੇ ਤੇਲ ਦੇ ਭੰਡਾਰ ਹੈ, ਜੋ ਕਿ ਕਰੀਬ 303 ਬਿਲੀਅਨ ਬੈਰਲ ਹੈ, ਇਹ ਵਿਸ਼ਵ ਦੇ ਕੁੱਲ ਤੇਲ ਭੰਡਾਰ ਦਾ 17 ਫੀਸਦੀ ਹੈ। ਪੌਲੀਐਵ ਨੇ ਅਜਿਹੇ ਵਿਚ ਕਾਰਨੀ ਨੂੰ ਐਲਬਰਟਾ ਤੋਂ ਬੀ. ਸੀ. ਦੇ ਪੱਛਮੀ ਤੱਟ ਤੱਕ ਤੇਲ ਪਾਈਪਲਾਈਨ ਨੂੰ 60 ਦਿਨਾਂ ਅੰਦਰ ਮਨਜ਼ੂਰੀ ਦਿੱਤੇ ਜਾਣ ਦੀ ਮੰਗ ਕੀਤੀ ਹੈ।