15.22C Vancouver 15.22C VancouverJun 3, 2021 3:34 PM -
ਪੁਲਿਸ ਮੁਤਾਬਕ ਐਬਟਸਫੋਰਡ ਦੇ ਇੱਕ ਬੈਂਕ ਨੂੰ ਲੁੱਟਣ ਦੀ ਕੋਸ਼ਿਸ਼ ਕਰਨ ਵਾਲਾ ਸ਼ੱਕੀ ਗਾਹਕਾਂ ਦੀ ਮਦਦ ਨਾਲ ਹੁਣ ਹਿਰਾਸਤ ਵਿੱਚ ਹੈ।
ਐਬਟਸਫੋਰਡ ਪੁਲਿਸ ਵਲੋਂ ਪ੍ਰਦਾਨ ਕੀਤੀ ਜਾਣਕਾਰੀ ਅਨੁਸਾਰ ਇੱਕ ਆਦਮੀ ਬੁੱਧਵਾਰ ਦੁਪਹਿਰ ਤਕਰੀਬਨ 12 ਵਜੇ ਸਕੋਸ਼ਿਆ ਬੈਂਕ ਦੀ ਬ੍ਰਾਂਚ ਵਿੱਚ ਵੜ੍ਹਿਆ ਅਤੇ ਸ਼ੌਟਗਨ ਦਿਖਾਕੇ ਗਾਹਕਾਂ ਤੋਂ ਫਰਸ਼ ’ਤੇ ਲੇਟਣ ਦੀ ਮੰਗ ਕੀਤੀ।
ਜੱਦ ਉਸ ਨੇ ਆਪਣੇ ਬੈਗ ਕਾਊਂਟਰ ’ਤੇ ਰੱਖੇ ਅਤੇ ਪੈਸਿਆਂ ਦੀ ਮੰਗ ਕੀਤੀ ਤਾਂ ਇੱਕ ਵਿਅਕਤੀ ਨੇ ਉਸ ਦਾ ਮੁਕਾਬਲਾ ਕੀਤਾ ਅਤੇ ਤਿੰਨ ਹੋਰ ਗਾਹਕ ਉਸ ਦੀ ਮਦਦ ਲਈ ਅਗਾਂਹ ਵਧੇ।
ਚਾਰਾਂ ਨੇ ਉਸ ਆਦਮੀ ਨਾਲ ਨਜਿੱਠਿਆ, ਉਸ ਨੂੰ ਨਿਹੱਥੇ ਕੀਤਾ ਅਤੇ ਉਸ ਨੂੰ ਉਦੋਂ ਤੱਕ ਰੋਕੇ ਰੱਖਿਆ ਜਦੋਂ ਤੱਕ ਕੁਝ ਮਿੰਟਾਂ ਬਾਅਦ ਅਧਿਕਾਰੀ ਨਹੀਂ ਪਹੁੰਚੇ।
ਸਾਰਜੰਟ ਜੂਡੀ ਬਰਡ ਅਨੁਸਾਰ ਵਾਰਦਾਤ ਦੌਰਾਨ ਕਿਸੇ ਦੇ ਵੀ ਸੱਟ ਨਹੀਂ ਲੱਗੀ ਅਤੇ ਇੱਕ 46 ਸਾਲਾ ਵਿਅਕਤੀ ਲੁੱਟ ਅਤੇ ਹਥਿਆਰਾਂ ਨਾਲ ਜੁੜੇ ਦੋਸ਼ਾਂ ਦਾ ਸਾਹਮਣਾ ਕਰ ਰਿਹਾ ਹੈ।
ਬਰਡ ਦਾ ਕਹਿਣਾ ਹੈ ਕਿ ਪੁਲਿਸ ਕਮਿਊਨਿਟੀ ਦੇ ਸਮਰਥਨ ਲਈ ਸ਼ੁਕਰਗੁਜ਼ਾਰ ਹੈ ਅਤੇ ਬੈਂਕ ਵਿੱਚ ਦੂਜਿਆਂ ਦੀ ਰੱਖਿਆ ਕਰਨ ਲਈ ਅਗਾਂਹ ਵਧੇ ਚਾਰ ਗਾਹਕਾਂ ਦੀ ਬਹਾਦਰੀ 'ਤੇ ਹੈਰਾਨ ਹੈ।
ਉਨ੍ਹਾਂ ਇਹ ਵੀ ਕਿਹਾ ਕਿ ਜਿੱਥੇ ਅਸੀਂ ਇਸ ਘਟਨਾ ਦੇ ਨਤੀਜੇ ਲਈ ਸ਼ੁਕਰਗੁਜ਼ਾਰ ਹਾਂ ਓਥੇ ਹੀ ਜਨਤਾ ਨੂੰ ਯਾਦ ਕਰਵਾਉਣਾ ਜ਼ਰੂਰੀ ਹੈ ਕਿ ਇਹ ਸਥਿਤੀਆਂ ਕਿੰਨੀਆਂ ਖਤਰਨਾਕ ਹੋ ਸਕਦੀਆਂ ਹਨ, ਖ਼ਾਸਕਰ ਜੱਦ ਹਥਿਆਰਬੰਦ ਵਿਅਕਤੀ ਸ਼ਾਮਲ ਹੋਣ।
