27.68C Vancouver 27.68C VancouverAug 31, 2022 12:32 AM - Connect News
ਨਿਊ ਵੈਸਟਮਿਨਸਟਰ 'ਚ ਇੱਕ ਹੈਰਾਨ ਕਰਨ ਦੇਣ ਵਾਲੀ ਘਟਨਾ ਵਾਪਰੀ ਹੈ, ਜਿਸ ਦੌਰਾਨ ਇੱਕ ਵਿਅਕਤੀ ਨੂੰ ਵੈਨ 'ਚ ਖਿੱਚਣ ਦੀ ਕਥਿਤ ਕੋਸ਼ਿਸ਼ ਕੀਤੀ ਗਈ ਹੈ।
ਮਾਮਲਾ 27 ਅਗਸਤ ਦਾ ਦੱਸਿਆ ਗਿਆ ਹੈ। ਪੁਲਿਸ ਨੂੰ ਸ਼ੱਕੀ ਘਟਨਾ ਬਾਰੇ ਦੱਸਿਆ ਗਿਆ ਕਿ ਕਵੇਸਾਈਡ ਡਰਾਈਵ ਦੇ ਇਲਾਕੇ 'ਚ ਸ਼ਾਮ ਕਰੀਬ 7.30 ਵਜੇ ਘਟਨਾ ਨੂੰ ਅੰਜਾਮ ਦੇਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ।
ਪੀੜਤ ਦਾ ਕਹਿਣਾ ਸੀ ਕਿ ਉਹ ਕਵੇਸਾਈਡ ਡਰਾਈਵ ਦੇ ਨਾਲ ਤੁਰ ਕੇ ਜਾ ਰਹੇ ਸਨ ਜਦ ਇੱਕ ਨੀਲੇ ਰੰਗ ਦੀ ਵੈਨ ਨੇੜ ਹੀ ਰੁਕੀ ਅਤੇ ਵੈਨ ਵਿੱਚੋਂ ਇੱਕ ਆਦਮੀ ਨੇ ਨਿਕਲ ਕੇ ਪੀੜਤ ਨੂੰ ਵੈਨ 'ਚ ਖਿੱਚਣ ਦੀ ਕੋਸ਼ਿਸ਼ ਕੀਤੀ।
ਆਦਮੀ ਅਜਿਹਾ ਕਰਨ 'ਚ ਨਾਕਾਮ ਰਿਹਾ, ਪਰ ਫਿਰ ਆਦਮੀ ਹੱਸਣ ਲੱਗਾ ਅਤੇ ਪਸੈਂਜਰ ਵਾਲੇ ਪਾਸੇ ਬੈਠ ਗਿਆ ਅਤੇ ਵਾਹਨ ਚਾਲਕ ਮੌਕੇ ਤੋਂ ਨਿਕਲ ਗਿਆ।
ਸ਼ੱਕੀ ਆਦਮੀ ਨੂੰ ਦੱਖਣ ਏਸ਼ੀਆਈ ਮੂਲ ਦਾ ਕਰੀਬ 6 ਫੁੱਟ ਲੰਮਾ ਵਿਅਕਤੀ ਦੱਸਿਆ ਗਿਆ ਹੈ ਜਿਸ ਦੀ ਉਮਰ 35 ਤੋਂ 40 ਸਾਲ ਦਰਮਿਆਨ ਮੰਨੀ ਜਾ ਰਹੀ ਹੈ।
ਵਾਹਨ ਚਾਲਕ ਦੀ ਕੋਈ ਪਛਾਣ ਸੰਬੰਧੀ ਜਾਣਕਾਰੀ ਨਹੀਂ ਦਿੱਤੀ ਗਈ। ਸਾਰਜੈਂਟ ਜਸਟਿਨ ਥੌਮ ਨੇ ਕਿਹਾ ਕਿ ਇਹ ਘਟਨਾ ਪੀੜਤ ਲਈ ਕਾਫੀ ਸਦਮੇ ਭਰੀ ਸੀ।
ਉਨ੍ਹਾਂ ਕਿਹਾ ਕਿ ਇਸ ਪ੍ਰਕਾਰ ਦੀਆਂ ਘਟਨਾਵਾਂ ਆਮ ਨਹੀਂ ਵਾਪਰਦੀਆਂ ਪਰ ਹਮੇਸ਼ਾ ਚੁਕੰਨਾ ਰਹਿਣਾ ਜਰੂਰੀ ਹੈ।
ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਘਟਨਾ ਸੰਬੰਧੀ ਕੋਈ ਜਾਣਕਾਰੀ ਜਾਂ ਕੋਈ ਫੁਟੇਜ ਹੋਵੇ ਤਾਂ ਦੱਸਿਆ ਜਾਵੇ।
