ਸਰੀ ਅਤੇ ਡੈਲਟਾ ਵਿੱਚ ਘਰਾਂ 'ਤੇ ਰਾਤ ਦੇ ਸਮੇਂ ਹੋਈ ਗੋਲੀਬਾਰੀ,ਪੁਲਿਸ ਕਰ ਰਹੀ ਜਾਂਚ

ਸਰੀ ਅਤੇ ਡੈਲਟਾ ਵਿਚ ਐਤਵਾਰ ਤੜਕੇ ਲਗਭਗ ਇਕੋ-ਸਮੇਂ ਦੋ ਗੋਲੀਬਾਰੀ ਦੀਆਂ ਵਾਰਦਾਤਾਂ ਹੋਈਆਂ, ਦੋਹਾਂ ਮਾਮਲਿਆਂ ਵਿਚ ਘਰਾਂ ਨੂੰ ਨਿਸ਼ਾਨਾ ਬਣਾਇਆ ਗਿਆ, ਹਾਲਾਂਕਿ ਖੁਸ਼ਕਿਸਮਤੀ ਨਾਲ ਕੋਈ ਜ਼ਖਮੀ ਨਹੀਂ ਹੋਇਆ। ਪੁਲਿਸ ਮੁਤਾਬਕ,ਦੋਹਾਂ ਘਟਨਾਵਾਂ ਦਾ ਸਮਾਂ ਤੜਕੇ ਕਰੀਬ 2:43 ਵਜੇ ਦੇ ਆਸਪਾਸ ਦਾ ਸੀ।ਸਰੀ ਵਿਚ ਨਿਊਟਨ ਇਲਾਕੇ ਦੀ 124 ਸਟ੍ਰੀਟ ਦੇ 7800 ਬਲਾਕ ਵਿਚ ਇੱਕ ਰਿਹਾਇਸ਼ 'ਤੇ ਗੋਲੀਆਂ ਚਲਾਈਆਂ ਗਈਆਂ। ਇਸੇ ਸਮੇਂ ਡੈਲਟਾ ਪੁਲਿਸ ਨੂੰ 78B ਐਵੇਨਿਊ ਦੇ 11200 ਬਲਾਕ ਵਿਚ ਸ਼ੂਟਿੰਗ ਦੀ ਸੂਚਨਾ ਮਿਲੀ।

ਡੈਲਟਾ ਪੁਲਿਸ ਡਿਪਾਰਟਮੈਂਟ ਨੇ ਦੱਸਿਆ ਕਿ ਇਹ ਮਾਮਲਾ ਉਨ੍ਹਾਂ ਦੀ extortion ਨਾਲ ਸੰਬੰਧਿਤ ਚੱਲ ਰਹੀ ਜਾਂਚ ਨਾਲ ਜੁੜੇ ਹੋਣ ਦਾ ਸ਼ੱਕ ਹੈ। ਡੈਲਟਾ ਪੁਲਿਸ ਨੇ ਇਹ ਵੀ ਕਿਹਾ ਕਿ ਸੀ.ਸੀ.ਟੀ.ਵੀ. ਫੁਟੇਜ ਵਿਚ ਇੱਕ ਚਿੱਟੀ ਐਸ.ਯੂ.ਵੀ. ਵਿਚੋਂ ਨਿਕਲਦਾ ਸ਼ੱਕੀ ਵਿਅਕਤੀ ਘਰ 'ਤੇ ਗੋਲੀਆਂ ਚਲਾਉਂਦਾ ਅਤੇ ਫਰਾਰ ਹੁੰਦਾ ਦਿਖਾਈ ਦਿੱਤਾ। ਦੂਜੇ ਪਾਸੇ,ਸਰੀ ਦਾ ਮਾਮਲਾ ਜਾਂਚ ਅਧੀਨ ਹੈ।

ਐਸ.ਪੀ.ਐਸ.ਦੇ ਸਟਾਫ ਸਾਰਜੈਂਟ ਲਿੰਡਸੇ ਹਾਉਟਨ ਨੇ ਕਿਹਾ ਕਿ ਸਰੀ ਪੁਲਿਸ ਅਤੇ ਡੈਲਟਾ ਪੁਲਿਸ ਦੋਵੇਂ ਗੋਲੀਬਾਰੀ ਦੇ ਸਮੇਂ ਅਤੇ ਨੇੜਤਾ ਨੂੰ ਦੇਖਦੇ ਹੋਏ ਸੰਪਰਕ ਵਿਚ ਹਨ ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ ਕੀ ਇਨ੍ਹਾਂ ਦੋਹਾਂ ਵਿਚ ਕੋਈ ਸੰਬੰਧ ਹੈ। ਪੁਲਿਸ ਵਿਭਾਗ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਕੋਲ ਇਨ੍ਹਾਂ ਵਾਰਦਾਤਾਂ ਨਾਲ ਸੰਬੰਧਿਤ ਕੋਈ ਜਾਣਕਾਰੀ ਜਾਂ ਵੀਡੀਓ ਫੁਟੇਜ ਹੈ ਤਾਂ ਉਨਾਂ ਨੂੰ ਤੁਰੰਤ ਪੁਲਿਸ ਨਾਲ ਸੰਪਰਕ ਕਰਨਾ ਚਾਹੀਦਾ ਹੈ।