10.59C Vancouver 10.59C VancouverJul 6, 2022 7:28 PM - The Canadian Press
ਸ਼ਿਕਾਗੋ ਦੇ ਇਲਾਕੇ ਹਾਈਲੈਂਡ ਪਾਰਕ 'ਚ ਸੋਮਵਾਰ ਨੂੰ ਜੁਲਾਈ ਫੋਰਥ ਪਰੇਡ ਦੌਰਾਨ ਵਾਪਰੀ ਮਾਸ ਸ਼ੂਟਿੰਗ ਦੇ ਮਾਮਲੇ 'ਚ ਕਾਬੂ ਕੀਤੇ ਗਏ ਸ਼ੱਕੀ ਬਾਰੇ ਪੁਲਿਸ ਨੇ ਜਾਣਕਾਰੀ ਦਿੱਤੀ ਹੈ ਕਿ ਉਸ ਦਾ ਇੱਕ ਹੋਰ ਮਾਸ ਸ਼ੂਟਿੰਗ ਨੂੰ ਅੰਜਾਮ ਦੇਣ ਦਾ ਪਲੈਨ ਸੀ।
ਪੁਲਿਸ ਦਾ ਕਹਿਣਾ ਹੈ ਕਿ ਸ਼ੱਕੀ ਮੌਕੇ ਤੋਂ ਨਿਕਲ ਗਿਆ ਸੀ ਅਤੇ ਉਸ ਦਾ ਵਿਸਕੌਨਸਿਨ ਦੇ ਮੈਡੀਸਨ ਪਹੁੰਚਣ ਦਾ ਇਰਾਦਾ ਸੀ।
ਪੁਲਿਸ ਅਨੁਸਾਰ ਇਸ ਇਲਾਕੇ 'ਚ ਵੀ ਸ਼ੱਕੀ ਵੱਲੋਂ ਹਾਈਲੈਂਡ ਪਾਰਕ ਦੀ ਤਰ੍ਹਾਂ ਮਾਸ ਸ਼ੂਟਿੰਗ ਨੂੰ ਅੰਜਾਮ ਦੇਣ ਦਾ ਇਰਾਦਾ ਸੀ।
ਪੁਲਿਸ ਅਨੁਸਾਰ ਸ਼ੱਕੀ ਨੂੰ ਰਸਤੇ ਵਿੱਚ ਲੱਗਿਆ ਕਿ ਉਹ ਹਾਈਲੈਂਡ ਪਾਰਕ ਜਿਹੀ ਵਾਰਦਾਤ ਨੂੰ ਅੰਜਾਮ ਦੇਣ ਲਈ ਪੂਰੀ ਤਰ੍ਹਾਂ ਤਿਆਰ ਨਹੀਂ ਹੈ ਅਤੇ ਫਿਰ ਰਸਤੇ ਵਿੱਚੋਂ ਹੀ ਉਸ ਨੇ ਵਾਪਿਸ ਪਰਤਣ ਦਾ ਪਲੈਨ ਬਣਾਇਆ।
ਯਾਦ ਰਹੇ ਇਸ ਮਾਸ ਸ਼ੂਟਿੰਗ 'ਚ 7 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ 30 ਦੇ ਕਰੀਬ ਲੋਕ ਜਖਮੀ ਹੋਏ ਹਨ।
ਮੰਗਲਵਾਰ ਨੂੰ ਲੇਕ ਕਾਉਂਟੀ ਸਟੇਟਸ ਅਟੌਰਨੀ ਐਰਿਕ ਰਾਈਨਹਾਰਟ ਨੇ ਜਾਣਕਾਰੀ ਦਿੱਤੀ ਕਿ ਮਾਮਲੇ 'ਚ ਸ਼ੱਕੀ 'ਤੇ ਫਰਸਟ ਡਿਗਰੀ ਕਤਲ ਦੇ 7 ਦੋਸ਼ ਲੱਗੇ ਹਨ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਸ਼ੱਕੀ 'ਤੇ ਫਿਲਹਾਲ ਦੋਸ਼ ਤੈਅ ਕੀਤੇ ਜਾਣ ਦੀ ਪ੍ਰੀਕਿਰਿਆ ਪੂਰੀ ਨਹੀਂ ਹੋਈ ਹੈ ਅਤੇ ਇਸ ਵਿਅਕਤੀ 'ਤੇ ਹੋਰ ਵੀ ਦੋਸ਼ ਤੈਅ ਕੀਤੇ ਜਾਣਗੇ।
ਯਾਦ ਰਹੇ ਸੋਮਵਾਰ ਨੂੰ ਵਾਪਰੀ ਵਾਰਦਾਤ 'ਚ ਰੌਬਰਟ ਈ. ਕਰੀਮੋ ਨਾਮ ਦੇ ਯੁਵਕ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ।
ਘਟਨਾ 'ਚ ਜਾਨ ਗਵਾਉਣ ਵਾਲੇ 7 ਵਿੱਚੋਂ 6 ਪੀੜਤਾਂ ਦੀ ਪਛਾਣ ਮੰਗਲਵਾਰ ਨੂੰ ਸਾਂਝੀ ਕੀਤੀ ਗਈ ਸੀ।
