ਕੈਲਗਰੀ ਬੱਸ ਡਰਾਈਵਰ 'ਤੇ ਹਮਲਾ ਕਰਨ ਵਾਲੇ ਦੋ ਸ਼ੱਕੀ ਕਾਬੂ

ਕੈਲਗਰੀ ਵਿਚ ਟਰਾਂਜ਼ਿਟ ਬੱਸ ਦੇ ਡਰਾਈਵਰ 'ਤੇ ਬੀਤੇ ਦਿਨ ਹਮਲਾ ਕਰਨ ਵਾਲੇ ਦੋ ਸ਼ੱਕੀਆਂ ਨੂੰ ਪੁਲਿਸ ਨੇ ਹਿਰਾਸਤ ਵਿਚ ਲੈ ਲਿਆ ਹੈ। ਸਿਟੀ ਦੇ ਨੌਰਥਈਸਟ ਵਿਚ ਫਾਲਕਨਰਿਜ ਬੁਲੇਵਾਰਡ ਅਤੇ ਕੈਸਲਰਿਜ ਬੁਲੇਵਾਰਡ ਇਲਾਕੇ ਵਿਚ ਬੁੱਧਵਾਰ ਤੜਕੇ ਕਰੀਬ 1.15 ਵਜੇ ਇਹ ਵਾਰਦਾਤ ਵਾਪਰੀ ਸੀ।

ਡਰਾਈਵਰ ਮੁਤਾਬਕ ਉਹ ਦੋਹਾਂ ਸ਼ੱਕੀਆਂ ਨੂੰ ਜਾਣਦਾ ਨਹੀਂ ਸੀ। ਉਨ੍ਹਾਂ ਨੇ ਉਸ ਨੂੰ ਹੋਰ ਇਲਾਕੇ ਵੱਲ ਬੱਸ ਲੈ ਜਾਣ ਲਈ ਕਿਹਾ ਪਰ ਡਰਾਈਵਰ ਨਾ ਮੰਨਿਆ ਜਿਸ ਕਾਰਨ ਉਨ੍ਹਾਂ ਨੇ ਉਸ 'ਤੇ ਹਮਲਾ ਕਰ ਦਿੱਤਾ। ਉਸ ਨੂੰ ਗੰਭੀਰ ਹਾਲਤ ਵਿਚ ਹਸਪਤਾਲ ਲੈ ਜਾਇਆ ਗਿਆ ਹਾਲਾਂਕਿ ਉਸ ਦੀ ਹਾਲਤ ਵਿਚ ਹੁਣ ਸੁਧਾਰ ਹੈ। ਪੁਲਿਸ ਮੁਤਾਬਕ ਇਕ ਯਾਤਰੀ ਨੇ ਹਮਲਾ ਰੋਕਣ ਦੀ ਕੋਸ਼ਿਸ਼ ਕੀਤੀ ਤਾਂ ਸ਼ੱਕੀਆਂ ਨੇ ਉਸ ਨੂੰ ਵੀ ਜ਼ਖਮੀ ਕੀਤਾ ਪਰ ਉਸ ਦੇ ਗੰਭੀਰ ਜ਼ਖਮੀ ਹੋਣ ਤੋਂ ਬਚਾਅ ਰਿਹਾ। ਬੁੱਧਵਾਰ ਦੁਪਹਿਰ ਪੁਲਿਸ ਨੇ ਸ਼ੱਕੀਆਂ ਨੂੰ ਹਿਰਾਸਤ ਵਿਚ ਲਿਆ ਅਤੇ ਉਸ ਖਿਲਾਫ ਚਾਰਜਿਜ਼ ਲੱਗਣੇ ਬਾਕੀ ਹਨ। ਸਿਟੀ ਦੀ ਮੇਅਰ ਜੋਤੀ ਗੋਂਡੇਕ ਨੇ ਇਸ ਹਮਲੇ ਦੀ ਨਿੰਦਾ ਕਰਦਿਆਂ ਡਰਾਈਵਰਜ਼ ਦੀ ਸੁਰੱਖਿਆ ਵਧਾਉਣ ਦਾ ਵਾਅਦਾ ਕੀਤਾ।