ਸਰੀ 'ਚ ਸਕੌਟ ਰੋਡ 'ਤੇ ਗੱਡੀ 'ਚ ਬੈਠੇ ਵਿਅਕਤੀ 'ਤੇ ਚੱਲੀ ਗੋਲੀ, ਜ਼ਖਮੀ ਖੁਦ ਗੱਡੀ ਚਲਾ ਪਹੁੰਚਿਆ ਹਸਪਤਾਲ

ਸਰੀ 'ਚ ਗੋਲੀ ਚੱਲਣ ਦੀ ਵਾਰਦਾਤ ਵਾਪਰੀ ਹੈ। ਘਟਨਾ ਐਤਵਾਰ ਨੂੰ ਵਾਪਰੀ ਅਤੇ ਪੁਲਿਸ ਨੇ ਲੋਕਾਂ ਤੋਂ ਮੰਗ ਕੀਤੀ ਹੈ ਕਿ ਕੋਈ ਜਾਣਕਾਰੀ ਜਾਂ ਫੁਟੇਜ ਹੋਵੇ ਤਾਂ ਦੱਸਿਆ ਜਾਵੇ।

ਸ਼ਾਮ ਕਰੀਬ 6.15 ਵਜੇ ਪੁਲਿਸ ਨੂੰ ਜਾਣਕਾਰੀ ਮਿਲੀ ਸੀ ਕਿ ਗੋਲੀ ਲੱਗਣ ਕਾਰਨ ਜਖਮੀ ਹੋਇਆ ਇੱਕ ਵਿਅਕਤੀ ਇੱਕ ਹੋਰ ਜਿਉਰਿਸਡਿਕਸ਼ਨ ਦੇ ਹਸਪਤਾਲ ਪਹੁੰਚਿਆ ਹੈ।

ਕਥਿਤ ਤੌਰ 'ਤੇ ਪੀੜਤ ਆਦਮੀ ਗੱਡੀ 'ਚ ਬੈਠਾ ਸੀ ਜਦ ਉਸ 'ਤੇ ਸਕੌਟ ਰੋਡ ਅਤੇ 110 ਐਵੀਨਿਊ ਕੋਲ ਗੋਲੀ ਚਲਾ ਦਿੱਤੀ ਗਈ ਸੀ।

ਉਸ ਦੇ ਹੱਥ 'ਤੇ ਸੱਟ ਲੱਗਣ ਬਾਰੇ ਦੱਸਿਆ ਗਿਆ ਅਤੇ ਕਥਿਤ ਤੌਰ 'ਤੇ ਉਹ ਖੁਦ ਗੱਡੀ ਚਲਾ ਕੇ ਹਸਪਤਾਲ ਪਹੁੰਚਿਆ ਸੀ।

ਮਾਮਲੇ ਦੀ ਜਾਂਚ ਸਰੀ ਆਰ.ਸੀ.ਐਮ.ਪੀ. ਦੇ ਜਨਰਲ ਇਨਵੈਸਟੀਗੇਸ਼ਨ ਯੂਨਿਟ ਵੱਲੋਂ ਕੀਤੀ ਜਾ ਰਹੀ ਹੈ।

ਹਾਲ ਦੀ ਘੜੀ ਮਾਮਲੇ ਨੂੰ ਟਾਰਗੈਟਿਡ ਘਟਨਾ ਮੰਨਿਆ ਜਾ ਰਿਹਾ ਹੈ। ਪੀੜਤ ਆਦਮੀ 'ਤੇ ਜਦ ਹਮਲਾ ਹੋਇਆ ਤਾਂ ਉਹ 2016 ਮਾਡਲ ਦੀ ਹੌਂਡਾ ਸਿਵਿਕ ਗੱਡੀ ਚਲਾ ਰਿਹਾ ਸੀ।

ਘਟਨਾ ਐਤਵਾਰ ਸ਼ਾਮ 4.30 ਵਜੇ ਤੋਂ 5.30 ਵਜੇ ਦਰਮਿਆਨ ਵਾਪਰੀ ਮੰਨੀ ਜਾ ਰਹੀ ਹੈ।