11.33C Vancouver 11.33C VancouverNov 30, 2022 1:00 AM - Connect News
ਕੋਕਟਲਮ ਆਰ.ਸੀ.ਐਮ.ਪੀ. ਵੱਲੋਂ ਸੋਮਵਾਰ ਨੂੰ ਇੱਕ ਔਰਤ ਦੀ ਜਾਣਕਾਰੀ ਸਾਂਝੀ ਕਰ ਉਸ ਦੀ ਭਾਲ 'ਚ ਮਦਦ ਦੀ ਅਪੀਲ ਕੀਤੀ ਗਈ ਸੀ।
ਹੁਣ ਮਾਮਲੇ 'ਚ ਇੱਕ ਨਵਾਂ ਮੋੜ ਆ ਗਿਆ ਹੈ।
ਔਰਤ ਦੇ ਜਿਸ ਗੱਡੀ 'ਚ ਹੋਣ ਦਾ ਸ਼ੱਕ ਸੀ, ਉਹ ਗੱਡੀ ਐਬਟਸਫੋਰਡ 'ਚ ਇੱਕ ਖੱਡ 'ਚ ਡਿੱਗੀ ਮਿਲੀ ਹੈ।
ਐਬਟਸਫੋਰਡ ਪੁਲਿਸ ਦਾ ਕਹਿਣਾ ਹੈ ਕਿ ਸੋਮਵਾਰ ਨੂੰ ਰਾਤ ਕਰੀਬ 8.50 ਵਜੇ ਹਾਈਵੇਅ 1 ਅਤੇ ਨੰਬਰ 3 ਰੋਡ ਕੋਲ ਇੱਕ ਸਿੰਗਲ ਵਾਹਨ ਕਰੈਸ਼ ਦੀ ਜਾਣਕਾਰੀ ਮਿਲੀ ਸੀ।
ਬਾਅਦ 'ਚ ਪਤਾ ਲੱਗਿਆ ਕਿ ਇਹ ਵਾਹਨ ਕੋਕਟਲਮ ਤੋਂ ਲਾਪਤਾ ਹਾਈ ਰਿਸਕ ਸ਼੍ਰੇਣੀ ਦੀ ਔਰਤ ਜੋਡੀਨ ਮਿਲਰ ਦੀ ਹੈ। ਇਹ ਔਰਤ 26 ਨਵੰਬਰ ਨੂੰ ਲਾਪਤਾ ਹੋਈ ਦੱਸੀ ਗਈ ਸੀ।
ਮੌਕੇ 'ਤੇ ਮੌਜੂਦ ਲੋਕਾਂ ਨੇ ਪੁਲਿਸ ਨੂੰ ਦੱਸਿਆ ਕਿ ਭੂਰੇ ਰੰਗ ਦੀ 2011 ਮਾਡਲ ਹੰਢਾਈ ਟੁਕਸਨ (Hyundai Tucson) ਗੱਡੀ ਤੇਜ ਰਫ਼ਤਾਰ 'ਤੇ ਜਾ ਰਹੀ ਸੀ ਅਤੇ ਅਚਾਨਕ ਸੜਕ ਤੋਂ ਪਾਸੇ ਖੱਡ 'ਚ ਜਾ ਡਿੱਗੀ।
ਮਾਮਲੇ 'ਚ ਇੱਕ ਹੋਰ ਸਿਡਾਨ ਗੱਡੀ ਸ਼ਾਮਿਲ ਦੱਸੀ ਗਈ ਹੈ ਜਿਸ ਨੂੰ ਮੌਕੇ ਤੋਂ ਨਿਕਲਦੇ ਵੇਖਿਆ ਗਿਆ।
ਜਦ ਪੁਲਿਸ ਮੌਕੇ 'ਤੇ ਪਹੁੰਚੀ ਤਾਂ ਇਹ ਭੂਰੇ ਰੰਗ ਦੀ ਗੱਡੀ ਖਾਲੀ ਸੀ ਅਤੇ ਅੰਦਰ ਕੋਈ ਵਿਅਕਤੀ ਨਹੀਂ ਮਿਲਿਆ।
ਪੁਲਿਸ ਵੱਲੋਂ ਜੋਡੀਨ ਮਿਲਰ ਦੀ ਭਾਲ ਦੀ ਪੂਰੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਇਸ ਔਰਤ ਦੀ ਤਸਵੀਰ ਕਨੈਕਟ ਐਫ.ਐਮ. ਦੇ ਫੇਸਬੁੱਕ ਪੇਜ 'ਤੇ ਵੇਖੀ ਜਾ ਸਕਦੀ ਹੈ।
ਯਾਦ ਰਹੇ ਇਹ ਕਰੈਸ਼ ਸੰਬੰਧੀ ਘਟਨਾ ਸੋਮਵਾਰ ਨੂੰ ਉਸ ਸਮੇਂ ਵਾਪਰੀ ਹੈ ਜਦ ਕਰੀਬ ਇਸ ਤੋਂ 4 ਘੰਟੇ ਪਹਿਲਾਂ ਔਰਤ ਅਤੇ ਉਸ ਦੀ ਗੱਡੀ ਸੀ ਤਸਵੀਰ ਕੋਕਟਲਮ ਆਰ.ਸੀ.ਐਮ.ਪੀ. ਵੱਲੋਂ ਸਾਂਝੀ ਕੀਤੀ ਗਈ ਸੀ।
