20.47C Vancouver 20.47C VancouverJun 23, 2025 8:24 PM - Connect Newsroom
ਬ੍ਰਿਟਿਸ਼ ਕੋਲੰਬੀਆ ਵਿਚ ਬੈਂਕ ਘੋਟਾਲੇ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਮਿਸ਼ਨ ਦੀ ਇੱਕ 68 ਸਾਲਾ ਮਹਿਲਾ ਨੂੰ ਇਸ ਵਿਚ $60,000 ਦਾ ਨੁਕਸਾਨ ਹੋਇਆ ਹੈ। ਆਰਸੀਐਮਪੀ ਨੇ ਕਿਹਾ ਕਿ ਮਹਿਲਾ ਨੇ ਸਕੈਮ ਵਿਚ ਰਕਮ ਗੁਆਉਣ ਤੋਂ ਬਾਅਦ 28 ਮਈ ਨੂੰ ਪੁਲਿਸ ਨੂੰ ਸੂਚਨਾ ਦਿੱਤੀ।
ਜਾਂਚਕਰਤਾ ਨੇ ਦੱਸਿਆ ਕਿ ਮਹਿਲਾ ਨੂੰ ਇੱਕ ਵਿਅਕਤੀ ਨੇ ਫੋਨ ਕੀਤਾ, ਜਿਸ ਨੇ ਖੁਦ ਨੂੰ ਬੈਂਕ ਤੋਂ ਦੱਸਦੇ ਕਿਹਾ ਕਿ ਬੈਂਕ ਕਾਰਡ ਨਾਲ ਛੇੜਛਾੜ ਹੋਈ ਹੈ ਅਤੇ ਇਸ ਲਈ ਨਵੇਂ ਕਾਰਡ ਜਾਰੀ ਕੀਤੇ ਜਾ ਰਹੇ ਹਨ। ਪੁਲਿਸ ਮੁਤਾਬਕ, ਇੱਕ ਰਾਈਡਸ਼ੇਅਰ ਡਰਾਈਵਰ ਨੂੰ ਉਸ ਦੇ ਘਰ ਕਾਰਡ ਲੈਣ ਲਈ ਭੇਜਿਆ ਗਿਆ ਅਤੇ ਮਹਿਲਾ ਨੇ ਕਾਰਡ ਸੌਂਪ ਦਿੱਤਾ।
ਇੱਕ ਘੰਟੇ ਬਾਅਦ ਸਕੈਮਰ ਨੇ ਵਾਪਸ ਫ਼ੋਨ ਕਰਕੇ ਕਿਹਾ ਕਿ ਉਸ ਦੇ ਸਾਰੇ ਬੈਂਕ ਖਾਤਿਆਂ ਨਾਲ ਛੇੜਛਾੜ ਹੋਈ ਹੈ ਅਤੇ ਉਸ ਦੇ ਬਾਕੀ ਰਹਿੰਦੇ ਕ੍ਰੈਡਿਟ ਅਤੇ ਡੈਬਿਟ ਕਾਰਡ ਲੈਣ ਇੱਕ ਹੋਰ ਰਾਈਡਸ਼ੇਅਰ ਡਰਾਈਵਰ ਨੂੰ ਭੇਜਿਆ ਗਿਆ, ਥੋੜ੍ਹੀ ਦੇਰ ਬਾਅਦ ਜਦੋਂ ਔਰਤ ਨੂੰ ਅਹਿਸਾਸ ਹੋਇਆ ਤਾਂ ਉਸ ਦੇ ਖਾਤੇ ਖਾਲੀ ਹੋ ਗਏ ਸਨ।
ਪੁਲਿਸ ਨੇ ਕਿਹਾ ਕਿ ਉਸ ਨੇ ਇੱਕ ਰਾਈਡਸ਼ੇਅਰ ਡਰਾਈਵਰ ਦਾ ਪਤਾ ਲਗਾਇਆ ਹੈ, ਜੋ ਜਾਂਚ ਵਿਚ ਸਹਿਯੋਗ ਕਰ ਰਿਹਾ ਹੈ ਪਰ ਦੂਜੇ ਡਰਾਈਵਰ ਦਾ ਪਤਾ ਨਹੀਂ ਲੱਗ ਸਕਿਆ ਹੈ।
