ਪੋਰਟਰ ਏਅਰਲਾਈਨਜ਼ ਨੇ ਔਟਵਾ ਅਤੇ ਵਿਕਟੋਰੀਆ ਵਿਚਕਾਰ ਨਵੀਂ ਸਿੱਧੀ ਉਡਾਣ ਕੀਤੀ ਸ਼ੁਰੂ

ਬੀ.ਸੀ. ਦੀ ਰਾਜਧਾਨੀ ਵਿਕਟੋਰੀਆ ਤੋਂ ਹੁਣ ਔਟਵਾ ਲਈ ਸਿੱਧੀ ਉਡਾਣ ਭਰੀ ਜਾ ਸਕਦੀ ਹੈ। ਪੋਰਟਰ ਏਅਰਲਾਈਨਜ਼ ਨੇ ਵਿਕਟੋਰੀਆ ਇੰਟਰਨੈਸ਼ਨਲ ਏਅਰਪੋਰਟ ਅਤੇ ਔਟਵਾ ਇੰਟਰਨੈਸ਼ਨਲ ਏਅਰਪੋਰਟ ਵਿਚਕਾਰ ਨਵੀਂ ਨਾਨ-ਸਟਾਪ ਫਲਾਈਟ ਸ਼ੁਰੂ ਕਰ ਦਿੱਤੀ ਹੈ। ਏਅਰਲਾਈਨ ਨੇ ਕਿਹਾ ਕਿ ਇਹ ਫਲਾਈਟ ਵਿਕਟੋਰੀਆ ਤੋਂ ਸਵੇਰ 11:50 ਵਜੇ ਚੱਲਿਆ ਕਰੇਗੀ।

ਇਹ ਫਲਾਈਟ ਸ਼ੁਰੂ ਵਿਚ ਹਫ਼ਤੇ ਵਿਚ ਚਾਰ ਵਾਰ ਚੱਲੇਗੀ ਪਰ16 ਜੂਨ ਤੋਂ ਸ਼ੁਰੂ ਹੋਣ ਵਾਲੇ ਗਰਮੀਆਂ ਦੇ ਪੀਕ ਸੀਜ਼ਨ ਦੌਰਾਨ ਏਅਰਲਾਈਨ ਦੀ ਯੋਜਨਾ ਇਸ ਫਲਾਈਟ ਨੂੰ ਰੋਜ਼ਨਾ ਚਲਾਉਣ ਦੀ ਹੈ। ਇਨ੍ਹਾਂ ਉਡਾਣਾਂ ਲਈ ਪੋਰਟਰ ਵਲੋਂ 132 ਸੀਟਰ ਹਵਾਈ ਜਹਾਜ਼ ਇਸਤੇਮਾਲ ਕੀਤਾ ਜਾ ਰਿਹਾ ਹੈ।

ਵਿਕਟੋਰੀਆ ਏਅਰਪੋਰਟ ਅਥਾਰਟੀ ਦੇ ਪ੍ਰਧਾਨ ਅਤੇ ਸੀਈਓ, ਐਲਿਜ਼ਾਬੈਥ ਬ੍ਰਾਊਨ ਮੁਤਾਬਕ, ਬੀਤੇ ਕੱਲ੍ਹ ਔਟਵਾ ਤੋਂ ਪੋਰਟਰ ਦੀ ਆਉਣ ਵਾਲੀ ਫਲਾਈਟ ਵਿਚ 130 ਯਾਤਰੀ ਸਵਾਰ ਸਨ, ਉਨ੍ਹਾਂ ਕਿਹਾ ਕਿ ਸਾਨੂੰ ਉਮੀਦ ਹੈ ਕਿ ਇਹ ਰੁਝਾਨ ਜਾਰੀ ਰਹੇਗਾ, ਜਿਸ ਨਾਲ ਸਥਾਨਕ ਅਰਥਵਿਵਸਥਾ ਨੂੰ ਲਾਭ ਹੋਵੇਗਾ।