ਲਿਸਬਨ ਸਟ੍ਰੀਟਕਾਰ ਹਾਦਸੇ ਵਿੱਚ ਦੋ ਕੈਨੇਡੀਅਨਾਂ ਦੀ ਮੌਤ

ਕੈਨੇਡਾ ਨਾਲ ਸਬੰਧਤ ਦੋ ਲੋਕਾਂ ਦੀ ਪੁਰਤਗਾਲ ਦੀ ਰਾਜਧਾਨੀ ਲਿਸਬਨ ਵਿਚ ਬੁੱਧਵਾਰ ਨੂੰ ਹੋਏ ਸਟ੍ਰੀਟ ਕਾਰ ਹਾਦਸੇ ਵਿਚ ਮਰਨ ਦੀ ਪੁਸ਼ਟੀ ਹੋਈ ਹੈ,ਪੁਰਤਗਾਲ ਦੀ ਪੁਲਿਸ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਮਾਰੇ ਗਏ 16 ਲੋਕਾਂ ਵਿਚੋਂ 11 ਵਿਦੇਸ਼ੀ ਸਨ। ਮ੍ਰਿਤਕਾਂ ਵਿਚ ਇੱਕ ਔਰਤ ਕੋਲ ਫਰਾਂਸ ਅਤੇ ਕੈਨੇਡਾ ਦੀ ਦੋਹਰੀ ਨਾਗਰਿਕਤਾ ਵੀ ਸੀ। ਸਟ੍ਰੀਟਕਾਰ ਇੱਥੋਂ ਦੀ ਇਤਿਹਾਸਕ ਟੂਰਿਸਟ ਟ੍ਰੇਨ ਹੈ,ਜਿਸ ਦੇ ਪਟੜੀ ਤੋਂ ਉਤਰਨ ਨਾਲ 21 ਹੋਰ ਲੋਕ ਵੀ ਜ਼ਖਮੀ ਹੋਏ।

ਅਧਿਕਾਰੀਆਂ ਨੇ ਦੱਸਿਆ ਕਿ ਜ਼ਖਮੀਆਂ ਵਿਚ ਸਪੇਨ,ਇਟਲੀ ਅਤੇ ਬ੍ਰਾਜ਼ੀਲ ਦੇ ਨਾਗਰਿਕ ਸ਼ਾਮਲ ਸਨ,ਜਿਨ੍ਹਾਂ ਵਿਚੋਂ ਕਈ ਪੁਰਤਗਾਲ ਦੇ ਸਨ। ਪਹਿਲਾਂ ਪੁਲਿਸ ਨੇ ਇਸ ਟਰੇਨ ਹਾਦਸੇ ਵਿਚ 17 ਲੋਕਾਂ ਦੀ ਮੌਤ ਹੋਣ ਦੀ ਗੱਲ ਆਖੀ ਸੀ ਪਰ ਤਾਜ਼ਾ ਬਿਆਨ ਵਿਚ ਕਿਹਾ ਕਿ ਇੱਕ ਜਰਮਨੀ ਦਾ ਵਿਅਕਤੀ ਜਿਸ ਦੀ ਹਾਦਸੇ ਵਿਚ ਮੌਤ ਹੋ ਗਈ ਸਮਝੀ ਜਾ ਰਹੀ ਸੀ ਉਹ ਲਿਸਬਨ ਦੇ ਇੱਕ ਹਸਪਤਾਲ ਵਿਚ ਪਾਇਆ ਗਿਆ।

ਪੁਲਿਸ ਨੇ ਇਸ ਗਲਤੀ ਦਾ ਕੋਈ ਸਪੱਸ਼ਟੀਕਰਨ ਨਹੀਂ ਦਿੱਤਾ। ਚਸ਼ਮਦੀਦਾਂ ਨੇ ਸਥਾਨਕ ਮੀਡੀਆ ਨੂੰ ਦੱਸਿਆ ਕਿ ਬੁੱਧਵਾਰ ਸ਼ਾਮ ਦੇ ਭੀੜ-ਭੜੱਕੇ ਵਾਲੇ ਸਮੇਂ ਦੌਰਾਨ ਜਦੋਂ ਸਟ੍ਰੀਟਕਾਰ ਪਟੜੀ ਤੋਂ ਕ੍ਰੈਸ਼ ਹੋਈ ਤਾਂ ਉਹ ਕਾਬੂ ਤੋਂ ਬਾਹਰ ਜਾਪ ਰਹੀ ਸੀ।