ਪ੍ਰੀਮੀਅਰ ਸਮਿਥ ਟਰੰਪ ਦੇ ਸਹੁੰ ਚੁੱਕ ਸਮਾਗਮ 'ਚ ਨਹੀਂ ਹੋਣਗੇ ਸ਼ਾਮਲ

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਅਮੈਰਿਕਾ ਦੇ ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਡੋਨਲਡ਼ ਟਰੰਪ ਦੀ ਤਾਜਪੋਸ਼ੀ ਦੇਖਣ ਲਈ ਅਮੈਰਿਕਾ ਗਈ ਹੈ ਪਰ ਉਹ ਇਸ ਵਿਚ ਮੌਜੂਦ ਨਹੀਂ ਹੋ ਸਕੇਗੀ।

ਤਾਜ਼ਾ ਜਾਣਕਾਰੀ ਮੁਤਾਬਕ ਕੜਾਕੇ ਦੀ ਠੰਡ ਕਾਰਨ ਟਰੰਪ ਦੀ ਸਰੇਮਨੀ ਲਈ ਥਾਂ ਬਦਲ ਦਿੱਤੀ ਗਈ ਹੈ ਅਤੇ ਇਹ ਇਨਡੋਰ ਹੋਣ ਕਾਰਨ ਬਹੁਤੇ ਗੈਸਟ ਇਸ ਵਿਚ ਸ਼ਾਮਿਲ ਨਹੀਂ ਹੋ ਸਕਣਗੇ। ਸਮਿਥ ਕੈਨੇਡੀਅਨ ਅੰਬੈਸੀ ਵਿਚ ਬੈਠ ਕੇ ਔਨਲਾਈਨ ਇਸ ਸਰੇਮਨੀ ਨੂੰ ਦੇਖੇਗੀ। ਉਨ੍ਹਾਂ ਦੇ ਔਫਿਸ ਵਲੋਂ ਜਾਣਕਾਰੀ ਦਿੱਤੀ ਕਿ ਸਮਿਥ 5 ਦਿਨ ਦੇ ਡਿਪਲੋਮੈਟਿਕ ਯਾਤਰਾ ਲਈ ਵਾਸ਼ਿੰਗਟਨ 'ਚ ਹਨ। ਉਨ੍ਹਾਂ ਨੇ ਐਨਰਜੀ ਇੰਡਸਟਰੀ ਦੇ ਲੀਡਰਜ਼, ਚੁਣੇ ਗਏ ਔਫੀਸ਼ੀਅਲਜ਼ ਅਤੇ ਹੋਰ ਕੁਝ ਖਾਸ ਲੋਕਾਂ ਨਾਲ ਮੀਟਿੰਗ ਕਰਨੀ ਹੈ। ਇੱਥੇ ਉਹ ਟਰੰਪ ਵਲੋਂ ਲਾਏ ਗਏ 25 ਫੀਸਦੀ ਟੈਰਿਫ ਦੀ ਧਮਕੀ ਦੇ ਸਬੰਧ ਵਿਚ ਗੱਲਬਾਤ ਕਰੇਗੀ।

ਸਮਿਥ ਨੇ ਪੀ. ਐੱਮ. ਜਸਟਿਨ ਟਰੂਡੋ ਅਤੇ ਹੋਰ ਪ੍ਰੀਮੀਅਰਜ਼ ਵਲੋਂ ਪੇਸ਼ ਪ੍ਰਸਤਾਵ ਦਾ ਵਿਰੋਧ ਕੀਤਾ ਹੈ, ਜੋ ਅਮੈਰਿਕਾ 'ਤੇ ਜਵਾਬੀ ਟੈਕਸ ਲਾਉਣ ਲਈ ਕਹਿੰਦਾ ਹੈ। ਫੈਡਰਲ ਸਰਕਾਰ ਦਾ ਕਹਿਣਾ ਹੈ ਕਿ ਉਹ ਅਮੈਰਿਕਾ ਨੂੰ ਜਵਾਬ ਦੇਣ ਲਈ ਤਿਆਰ ਹੈ ਪਰ ਸਮਿਥ ਕੈਨੇਡੀਅਨਜ਼ ਨੂੰ ਪਹਿਲ ਨਹੀਂ ਦੇ ਰਹੀ।