14.97C Vancouver 14.97C VancouverDec 4, 2024 5:09 PM - The Canadian Press
ਕੈਨੇਡਾ ਪੋਸਟ ਦੇ ਕਰਮਚਾਰੀਆਂ ਦੀ ਹੜਤਾਲ ਤੀਜੇ ਹਫ਼ਤੇ ਵਿਚ ਦਾਖ਼ਲ ਹੋ ਗਈ ਹੈ ਅਤੇ ਹੁਣ ਤੱਕ ਦੋਹਾਂ ਧਿਰਾਂ ਵਿਚਾਲੇ ਗੱਲਬਾਤ ਮੁੜ ਬਹਾਲ ਨਹੀਂ ਹੋਈ ਹੈ। ਇਸ ਨਾਲ ਕੈਨੇਡਾ ਪੋਸਟ ਨੂੰ ਪਾਰਸਲ ਰੈਵੇਨਿਊ ਵਿਚ ਭਾਰੀ ਨੁਕਸਾਨ ਹੋਣ ਦਾ ਖ਼ਦਸ਼ਾ ਹੈ।
ਓਧਰ, ਵਪਾਰਕ ਭਾਈਚਾਰੇ ਵਲੋਂ ਟਰੂਡੋ ਸਰਕਾਰ ’ਤੇ ਹੜਤਾਲ ਸਮਾਪਤ ਕਰਵਾਉਣ ਲਈ ਦਬਾਅ ਪਾਇਆ ਜਾ ਰਿਹਾ ਹੈ। ਕੈਨੇਡਾ ਦੀ ਰਿਟੇਲ ਕੌਂਸਲ ਦਾ ਕਹਿਣਾ ਹੈ ਕਿ 55,000 ਤੋਂ ਵੱਧ ਪੋਸਟਲ ਕਰਮਚਾਰੀਆਂ ਦੀ ਹੜਤਾਲ ਕਾਰੋਬਾਰਾਂ ਅਤੇ ਉਨ੍ਹਾਂ ਦੇ ਕਰਮਚਾਰੀਆਂ ਨੂੰ ਸੰਕਟ ਵਿਚ ਪਾ ਰਹੀ ਹੈ।
ਦੂਜੇ ਪਾਸੇ ਸਰਕਾਰ ਹੜਤਾਲ ਵਿਚ ਦਖ਼ਲ ਦੇਣ ਤੋਂ ਪਰਹੇਜ਼ ਕਰ ਰਹੀ ਹੈ, ਜਦੋਂ ਕਿ ਇਸੇ ਸਾਲ ਦੇ ਸ਼ੁਰੂ ਵਿਚ ਸਰਕਾਰ ਨੇ ਇੱਕ ਦੂਜੀ ਹੜਤਾਲ ਵਿਚ ਸਿੱਧੇ ਦਖ਼ਲ ਦਿੱਤਾ ਸੀ।
ਗੌਰਤਲਬ ਹੈ ਕਿ ਕੈਨੇਡਾ ਪੋਸਟ ਅਤੇ ਉਸ ਦੇ ਵਰਕਰਜ਼ ਵਿਚਕਾਰ ਤਨਖਾਹ ਅਤੇ ਕੱਚੇ ਕਾਮਿਆਂ ਦੇ ਮੁੱਦੇ ’ਤੇ ਗੱਲ ਅੜੀ ਹੋਈ ਹੈ। ਇੱਕ ਪ੍ਰਮੁੱਖ ਮੁੱਦਾ ਪੋਸਟ ਡਿਲਿਵਰੀ ਨੂੰ ਵੀਕਐਂਡ ਤੱਕ ਵਧਾਉਣ ਦਾ ਵੀ ਹੈ, ਦੋਵੇਂ ਪੱਖ ਇਸ ਗੱਲ ’ਤੇ ਹੁਣ ਤੱਕ ਸਹਿਮਤੀ ਨਹੀਂ ਬਣਾ ਸਕੇ ਕਿ ਇਸ ਨੂੰ ਕਿਸ ਤਰ੍ਹਾਂ ਸੰਭਵ ਬਣਾਇਆ ਜਾ ਸਕਦਾ ਹੈ।
ਯੂਨੀਅਨ ਦੀ ਡਿਮਾਂਡ ਹੈ ਕਿ ਵੀਕੈਂਡ ਦੀ ਡਿਲਿਵਰੀ ਲਈ ਵੀ ਪੱਕੇ ਕਾਮੇ ਹੋਣ। ਯੂਨੀਅਨ ਦਾ ਕਹਿਣਾ ਹੈ ਕਿ ਉਹ ਮਹਿੰਗਾਈ ਦੇ ਹਿਸਾਬ ਨਾਲ ਬਿਹਤਰ ਤਨਖਾਹਾਂ ਅਤੇ ਕੰਪਨੀ ਵਲੋਂ ਬਾਹਰਲੇ ਠੇਕੇਦਾਰ ਨਾ ਹਾਇਰ ਕਰਨ ਦੀ ਮੰਗ ਕਰ ਰਹੀ ਹੈ।
