ਐਬਟਸਫੋਰਡ ਦੇ ਬਿਜ਼ਨਸਮੈਨ ਸਤਵਿੰਦਰ ਸ਼ਰਮਾ ਦਾ ਸਰੀ 'ਚ ਗੋਲੀਆਂ ਮਾਰ ਕੇ ਕਤਲ

ਬੁੱਧਵਾਰ ਨੂੰ ਦਿਨ-ਦਿਹਾੜੇ ਸਰੀ 'ਚ ਵਾਪਰੀ ਗੋਲੀ ਚੱਲਣ ਦੀ ਵਾਰਦਾਤ 'ਚ ਇੱਕ ਵਿਅਕਤੀ ਦੀ ਮੌਤ ਹੋ ਗਈ।

ਪੁਲਿਸ ਨੇ ਮ੍ਰਿਤਕ ਦੀ ਪਛਾਣ ਸੰਬੰਧੀ ਪੁਸ਼ਟੀ ਨਹੀਂ ਕੀਤੀ ਹੈ, ਪਰ ਸੋਸ਼ਲ ਮੀਡੀਆ 'ਤੇ ਆਈ ਜਾਣਕਾਰੀ ਅਤੇ ਕਨੈਕਟ ਐਫ.ਐਮ. ਦੀ ਸੂਤਰਾਂ ਨਾਲ ਹੋਈ ਗੱਲਬਾਤ ਤੋਂ ਬਾਅਦ ਸਪਸ਼ਟ ਹੋਇਆ ਹੈ ਕਿ ਐਬਟਸਫੋਰਡ ਦੇ ਰਹਿਣ ਵਾਲੇ 57 ਸਾਲਾ ਬਿਜਨਸਮੈਨ ਸਤਵਿੰਦਰ ਸ਼ਰਮਾ ਇਸ ਘਟਨਾ ਦੇ ਪੀੜਤ ਸਨ।
ਸਤਵਿੰਦਰ ਸ਼ਰਮਾ ਤਿੰਨ ਦਹਾਕਿਆਂ ਤੋਂ ਵਧੇਰੇ ਸਮੇਂ ਤੋਂ ਕੈਨੇਡਾ 'ਚ ਰਹਿ ਰਹੇ ਸਨ।
ਸਰੀ ਪੁਲਿਸ ਅਨੁਸਾਰ ਬੁੱਧਵਾਰ ਦੁਪਹਿਰ ਕਰੀਬ 3:45 ਵਜੇ ਉਨ੍ਹਾਂ ਕੋਲ 84 ਐਵੀਨਿਊ ਅਤੇ 160 ਸਟ੍ਰੀਟ ਕੋਲ ਇੱਕ ਵਪਾਰਿਕ ਜਗ੍ਹਾ 'ਤੇ ਗੋਲੀ ਚੱਲਣ ਸੰਬੰਧੀ ਜਾਣਕਾਰੀ ਪਹੁੰਚੀ ਸੀ।
ਅਫਸਰਾਂ ਨੂੰ ਮੌਕੇ 'ਤੇ ਇੱਕ ਵਿਅਕਤੀ ਗੰਭੀਰ ਜਖਮੀ ਹਾਲਤ 'ਚ ਮਿਲਿਆ ਅਤੇ ਪੈਰਾਮੈਡਿਕ ਵੱਲੋਂ ਉਸ ਨੂੰ ਬਚਾਉਣ ਦੀਆਂ ਕੋਸ਼ਿਸ਼ਾਂ ਨਾਕਾਮ ਰਹੀਆਂ।
ਪੀੜਤ ਨੇ ਮੌਕੇ 'ਤੇ ਹੀ ਦਮ ਤੋੜ ਦਿੱਤਾ। ਮਾਮਲੇ ਦੀ ਜਾਂਚ ਹੁਣ ਇੰਟੈਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਜਾਣੀ ਕਿ ਆਈ.ਹਿਟ ਕੋਲ ਪਹੁੰਚ ਗਈ ਹੈ।

ਇੱਕ ਪਸੇ ਜਿੱਥੇ ਹਾਲ ਦੀ ਘੜੀ ਮ੍ਰਿਤਕ ਦੀ ਪਛਾਣ ਜਾਂ ਪੀੜਤ ਨੂੰ ਨਿਸ਼ਾਨਾ ਬਣਾਉਣ ਦੇ ਕਾਰਨ ਸੰਬੰਧੀ ਫਿਲਹਾਲ ਪੁਲਿਸ ਨੇ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਹੈ, ਉਥੇ ਹੀ ਦੂਜੇ ਪਾਸੇ ਸੋਸ਼ਲ ਮੀਡੀਆ 'ਤੇ ਘਟਨਾ ਸੰਬੰਧੀ ਜਿੰਮੇਵਾਰੀ ਚੁੱਕਣ ਦੀ ਜਾਣਕਾਰੀ ਉਜਾਗਰ ਹੋਈ ਹੈ।

ਇਲਾਕੇ ਦੇ ਨਾਮੀ ਪੱਤਰਕਾਰ ਗੁਰਪ੍ਰੀਤ ਸਿੰਘ ਸਹੋਤਾ ਦੀ ਸਾਂਝੀ ਕੀਤੀ ਇੱਕ ਪੋਸਟ 'ਚ ਆਖਿਆ ਗਿਆ ਹੈ ਕਿ ਕਤਲ ਦੀ ਵਾਰਦਾਤ ਦੀ ਜਿੰਮੇਵਾਰੀ ਜੀਵਨ ਫੌਜੀ ਨੇ ਲਈ ਹੈ ਅਤੇ ਇਸ 'ਚ ਫਿਰੌਤੀ ਦਾ ਚੱਕਰ ਨਾ ਹੋਣ ਅਤੇ ਪੰਜਾਬ ਤੋਂ ਆਏ ਬੱਚੇ-ਬੱਚੀਆਂ ਦੇ ਕਥਿਤ ਸ਼ੋਸ਼ਣ ਨੂੰ ਕਾਰਨ ਦੱਸਿਆ ਗਿਆ ਹੈ।
ਆਈ.ਹਿਟ ਨੇ ਅਪੀਲ ਕੀਤੀ ਹੈ ਕਿ ਘਟਨਾ ਸੰਬੰਧੀ ਕਿਸੇ ਕੋਲ ਕੋਈ ਜਾਣਕਾਰੀ ਹੋਵੇ ਤਾਂ 1-877-551-4448 'ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।
ਜਿਸ ਪਲਾਜਾ ਦੇ ਕੋਲ ਇਹ ਘਟਨਾ ਵਾਪਰੀ ਅੱਜ ਸਵੇਰ ਦੇ ਸਮੇਂ ਵੀ ਉਥੇ ਪੀਲੀ ਟੇਪ ਲੱਗੀ ਹੋਈ ਸੀ। ਘਟਨਾ ਦੀ ਜਗ੍ਹਾ ਦੇ ਬਿਲਕੁਲ ਸਾਹਮਣੇ ਫਲੈਟਵੁਡ ਕਮਿਊਨਿਟੀ ਸੈਂਟਰ ਅਤੇ ਪਬਲਿਕ ਲਾਇਬ੍ਰੇਰੀ ਹੈ।