9.57C Vancouver 9.57C VancouverOct 21, 2025 6:14 PM - Connect Newsroom
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਟੋਰੌਂਟੋ ਬਲੂ ਜੇਜ਼ ਦੀ ਸੀਏਟਲ ਮਰੀਨਰਸ 'ਤੇ ਸ਼ਾਨਦਾਰ ਜਿੱਤ ਅਤੇ ਟੀਮ ਦੀ ਵਰਲਡ ਸੀਰੀਜ਼ ਵਿਚ 32 ਸਾਲ ਬਾਅਦ ਵਾਪਸੀ 'ਤੇ ਖੁਸ਼ੀ ਦਾ ਪ੍ਰਗਟਾਵਾ ਕੀਤਾ ਹੈ। ਕਾਰਨੀ ਨੇ ਮੰਗਲਵਾਰ ਸਵੇਰੇ ਔਟਵਾ ਵਿਚ ਪੱਤਰਕਾਰਾਂ ਨਾਲ ਗੱਲ ਕਰਦੇ ਕਿਹਾ ਕਿ ਉਹ ਬਹੁਤ ਉਤਸ਼ਾਹਤ ਹਨ ਕਿ ਟੋਰੌਂਟੋ ਬਲੂ ਜੇਜ਼ ਸ਼ਾਨਦਾਰ ਜਿੱਤ ਤੋਂ ਬਾਅਦ ਵਰਲਡ ਸੀਰੀਜ਼ ਵਿਚ ਵਾਪਸ ਪਹੁੰਚੀ ਹੈ।
ਕਾਰਨੀ ਨੇ ਕਿਹਾ ਕਿ ਉਨ੍ਹਾਂ ਨੇ ਵ੍ਹਾਈਟ ਹਾਊਸ ਦੌਰੇ ਦੌਰਾਨ ਰਾਸ਼ਟਰਪਤੀ ਡੋਨਲਡ ਟਰੰਪ ਨੂੰ ਕਿਹਾ ਸੀ ਕਿ ਬਲੂ ਜੇਜ਼ ਵਰਲਡ ਸੀਰੀਜ਼ ਤੱਕ ਪਹੁੰਚਣਗੇ, ਜੋ ਸਹੀ ਸਾਬਤ ਹੋਇਆ ਹੈ। ਅਮਰੀਕੀ ਲੀਗ ਜਿੱਤਣ ਮਗਰੋਂ ਬਲੂ ਜੇਜ਼ ਦਾ ਸਾਹਮਣਾ ਸ਼ੁੱਕਰਵਾਰ ਤੋਂ ਰੋਜਰਸ ਸੈਂਟਰ ਵਿਖੇ ਸ਼ੁਰੂ ਹੋਣ ਵਾਲੀ ਵਰਲਡ ਸੀਰੀਜ਼ ਵਿਚ ਲਾਸ ਏਂਜਲਸ ਡੋਜਰਸ ਨਾਲ ਹੋਵੇਗਾ। ਸੱਤ ਮੈਚਾਂ ਦੀ ਇਸ ਸੀਰੀਜ਼ ਦੇ ਪਹਿਲੇ ਦੋ ਮੈਚ ਟੋਰੌਂਟੋ ਵਿਚ ਹੋਣਗੇ, ਉਸ ਤੋਂ ਬਾਅਦ ਤਿੰਨ ਲਾਸ ਏਂਜਲਸ ਵਿਚ ਅਤੇ ਜ਼ਰੂਰਤ ਪਈ ਤਾਂ ਆਖ਼ਰੀ ਦੋ ਮੈਚ ਵਾਪਸ ਕੈਨੇਡਾ ਵਿਚ ਖੇਡੇ ਜਾਣਗੇ।
ਗੌਰਤਲਬ ਹੈ ਕਿ ਸੋਮਵਾਰ ਰਾਤ ਅਮਰੀਕੀ ਲੀਗ ਚੈਂਪੀਅਨਸ਼ਿਪ ਸੀਰੀਜ਼ ਦੀ ਗੇਮ 7 ਵਿਚ ਹੋਏ ਮੁਕਾਬਲੇ ਵਿਚ ਜਾਰਜ ਸਪ੍ਰਿੰਜਰ ਦਾ ਪ੍ਰਦਰਸ਼ਨ ਇੱਕ ਯਾਦਗਾਰੀ ਪਲ ਸੀ, ਜਿਸ ਨਾਲ ਟੋਰੌਂਟੋ ਨੇ ਸੀਏਟਲ ਮਰੀਨਰਸ ਨੂੰ 4–3 ਨਾਲ ਮਾਤ ਦਿੱਤੀ।
