ਪ੍ਰਧਾਨ ਮੰਤਰੀ ਕਾਰਨੀ ਅੱਜ ਸ਼ਾਮ ਚੀਨ ਦੇ ਅਹਿਮ ਦੌਰੇ 'ਤੇ ਹੋਣਗੇ ਰਵਾਨਾ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅੱਜ ਸ਼ਾਮ ਚੀਨ ਦੇ ਅਹਿਮ ਦੌਰੇ 'ਤੇ ਰਵਾਨਾ ਹੋਣਗੇ। ਇਸ ਮਿਸ਼ਨ ਵਿਚ ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਵੀ ਉਨ੍ਹਾਂ ਦੇ ਨਾਲ ਸ਼ਾਮਲ ਹਨ, ਜੋ ਕਿ ਪੱਛਮੀ ਕੈਨੇਡਾ ਦੇ ਖੇਤੀਬਾੜੀ ਹਿੱਤਾਂ ਦੀ ਨੁਮਾਇੰਦਗੀ ਕਰਨਗੇ। ਮੋਅ ਲਈ ਇਹ ਦੌਰਾ ਬੇਹੱਦ ਅਹਿਮ ਹੈ ਕਿਉਂਕਿ ਚੀਨ ਵੱਲੋਂ ਕੈਨੇਡੀਅਨ ਕੈਨੋਲਾ 'ਤੇ ਲਗਾਏ ਟੈਰਿਫਸ ਕਾਰਨ ਸਸਕੈਚਵਨ ਦੇ ਕਿਸਾਨਾਂ ਨੂੰ ਵੱਡਾ ਨੁਕਸਾਨ ਹੋ ਰਿਹਾ ਹੈ।

ਇਸ 5 ਦਿਨਾਂ ਦੌਰੇ ਦੌਰਾਨ ਪ੍ਰਧਾਨ ਮੰਤਰੀ ਕਾਰਨੀ ਦੀ ਵੀਰਵਾਰ ਨੂੰ Premier Li Qiang ਨਾਲ ਅਤੇ ਸ਼ੁੱਕਰਵਾਰ ਨੂੰ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਮੁਲਾਕਾਤ ਹੋਣ ਦੀ ਉਮੀਦ ਹੈ। ਇਸ ਦੌਰਾਨ ਲੀਡਰਸ ਵਿਚਕਾਰ ਊਰਜਾ, ਖੇਤੀਬਾੜੀ ਅਤੇ ਅੰਤਰਰਾਸ਼ਟਰੀ ਸੁਰੱਖਿਆ ਵਰਗੇ ਅਹਿਮ ਮੁੱਦਿਆਂ 'ਤੇ ਗੱਲਬਾਤ ਹੋਵੇਗੀ।

ਮਾਹਰਾਂ ਦਾ ਮੰਨਣਾ ਹੈ ਕਿ ਜੇ ਚੀਨ ਕੈਨੇਡੀਅਨ ਖੇਤੀਬਾੜੀ ਉਤਪਾਦਾਂ ਤੋਂ ਟੈਰਿਫ ਹਟਾਉਣ ਲਈ ਸਹਿਮਤ ਹੁੰਦਾ ਹੈ ਤਾਂ ਬਦਲੇ ਵਿਚ ਕਾਰਨੀ ਨੂੰ ਵੀ ਕੁਝ ਰਿਆਇਤਾਂ ਦੇਣੀਆਂ ਪੈ ਸਕਦੀਆਂ ਹਨ, ਯਾਨੀ ਕੈਨੇਡਾ ਚਾਈਨਿਜ਼ ਇਲੈਕਟ੍ਰਿਕ ਵਾਹਨ 'ਤੇ ਲਗਾਏ ਆਪਣੇ ਟੈਰਿਫਸ 'ਤੇ ਮੁੜ ਵਿਚਾਰ ਕਰ ਸਕਦਾ ਹੈ। ਗੌਰਤਲਬ ਹੈ ਕਿ ਪ੍ਰਧਾਨ ਮੰਤਰੀ ਦੇ ਬੀਜਿੰਗ ਦੌਰੇ ਨੂੰ ਨੌਰਥ ਅਮਰੀਕਾ ਦੀ ਸਿਆਸਤ ਵਿਚ ਇੱਕ ਵੱਡੇ ਮੋੜ ਵਜੋਂ ਦੇਖਿਆ ਜਾ ਰਿਹਾ ਹੈ। ਕਾਰਨੀ ਦਾ ਕਹਿਣਾ ਹੈ ਕਿ ਅਸੀਂ ਇੱਕ ਅਜਿਹੀ ਆਰਥਿਕਤਾ ਬਣਾ ਰਹੇ ਹਾਂ ਜੋ ਹੁਣ ਸਿਰਫ਼ ਇੱਕ ਦੇਸ਼ 'ਤੇ ਨਿਰਭਰ ਨਹੀਂ ਹੋਵੇਗੀ।