ਬਜਟ ਤੋਂ ਲਗਭਗ ਦੋ ਹਫ਼ਤੇ ਪਹਿਲਾਂ ਪੀ.ਐਮ. ਕਾਰਨੀ ਕੈਨੇਡੀਅਨਜ਼ ਨੂੰ ਕਰਨਗੇ ਸੰਬੋਧਨ

ਪੀ.ਐਮ.ਮਾਰਕ ਕਾਰਨੀ ਬਜਟ ਤੋਂ ਲਗਭਗ ਦੋ ਹਫ਼ਤੇ ਪਹਿਲਾਂ ਅੱਜ ਸ਼ਾਮ ਕੈਨੇਡੀਅਨਜ਼ ਨੂੰ ਸੰਬੋਧਨ ਕਰਨਗੇ। ਉਨ੍ਹਾਂ ਦੀ ਸਪੀਚ ਆਰਥਿਕਤਾ 'ਤੇ ਕੇਂਦਰਿਤ ਹੋਵੇਗੀ। ਹਾਲਾਂਕਿ, ਇਹ ਅਜੇ ਸਪੱਸ਼ਟ ਨਹੀਂ ਕਿ ਪ੍ਰਧਾਨ ਮੰਤਰੀ ਦੇ ਭਾਸ਼ਣ ਵਿਚ ਅਰਥਵਿਵਸਥਾ ਲਈ ਕਿਹੜੇ ਵੇਰਵੇ ਸ਼ਾਮਲ ਹੋ ਸਕਦੇ ਹਨ ਪਰ ਕਾਰਨੀ ਦੀ ਸਪੀਚ ਉਨ੍ਹਾਂ ਵਧ ਰਹੀਆਂ ਚਿਤਾਵਨੀਆਂ ਵਿਚਕਾਰ ਆਈ ਹੈ ਕਿ ਕੈਨੇਡਾ ਨੂੰ ਇਸ ਸਾਲ ਮਹੱਤਵਪੂਰਨ ਘਾਟਾ ਦੇਖਣ ਨੂੰ ਮਿਲੇਗਾ।

ਬਜਟ 4 ਨਵੰਬਰ ਨੂੰ ਪੇਸ਼ ਕੀਤਾ ਜਾਣਾ ਹੈ, ਜਿਸ ਤੋਂ ਪਹਿਲਾਂ ਲਿਬਰਲ ਸਰਕਾਰ ਨੂੰ ਘਾਟੇ ਨੂੰ ਕਾਬੂ ਕਰਨ ਲਈ ਦਬਾਅ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਬਿਜ਼ਨਸ ਕੌਂਸਲ ਔਫ ਕੈਨੇਡਾ ਅਤੇ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਘਾਟਾ ਘਟਾਉਣ ਲਈ ਇੱਕ ਭਰੋਸੇਯੋਗ ਯੋਜਨਾ ਦੀ ਮੰਗ ਕੀਤੀ ਹੈ।

ਪੀ. ਐੱਮ. ਕਾਰਨੀ ਤੋਂ ਉਮੀਦ ਕੀਤੀ ਜਾਂਦੀ ਹੈ ਕਿ ਉਹ ਆਪਣੇ ਸੰਬੋਧਨ ਵਿਚ ਸਰਕਾਰ ਦੀ ਰਣਨੀਤੀ ਪਿੱਛੇ ਦੀ ਕੁਝ ਸੋਚ ਅਤੇ ਕੈਨੇਡੀਅਨਜ਼ ਪ੍ਰਤੀ ਆਪਣੀਆਂ ਵਚਨਬੱਧਤਾਵਾਂ ਦਾ ਖੁਲਾਸਾ ਕਰਨਗੇ। ਇਹ ਬਜਟ ਅਮਰੀਕੀ ਟੈਰਿਫ ਕਾਰਨ ਪੈਦਾ ਹੋਈ ਆਰਥਿਕ ਅਨਿਸ਼ਚਿਤਤਾ ਵਿਚਕਾਰ ਆ ਰਿਹਾ ਹੈ। ਕਾਰਨੀ ਬਜਟ ਤੋਂ ਪਹਿਲਾਂ ਇਸ ਹਫ਼ਤੇ ਏਸ਼ੀਆ ਵਿਚ ਆਰਥਿਕ ਸੰਮੇਲਨ ਵਿਚ ਵੀ ਸ਼ਾਮਲ ਹੋਣਗੇ।