ਪ੍ਰਧਾਨ ਮੰਤਰੀ ਕਾਰਨੀ ਨੇ ਕੀਤੀ ਯੂਰਪ ਦੇ ਦੌਰੇ ਦੀ ਸਮਾਪਤੀ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅੱਜ ਆਪਣੇ 4 ਦਿਨਾਂ ਯੂਰਪ ਦੇ ਦੌਰੇ ਦੀ ਸਮਾਪਤੀ ਲਾਤਵੀਆ ਦੇ ਮਿਲਟਰੀ ਕੈਂਪ ਅਦਾਜ਼ੀ ਵਿਖੇ ਕੈਨੇਡੀਅਨ ਫੋਰਸਿਜ਼ ਦੇ ਸੈਨਿਕਾਂ ਨਾਲ ਮੁਲਾਕਾਤ ਕਰਕੇ ਕੀਤੀ। ਇਸ ਬੇਸ 'ਤੇ ਲਗਭਗ 2,000 ਕੈਨੇਡੀਅਨ ਸੈਨਿਕ ਤਾਇਨਾਤ ਹਨ,ਕੈਨੇਡਾ ਇਥੇ ਓਪਰੇਸ਼ਨ ਰੀਇਨਸ਼ੋਰੈਂਸ ਤਹਿਤ ਨੈਟੋ ਮਿਸ਼ਨ ਦੀ ਅਗਵਾਈ ਕਰਦਾ ਹੈ। ਇਹ ਫੌਜਾਂ ਇਸ ਖਿਤੇ ਵਿਚ ਰੂਸ ਦੇ ਕਿਸੇ ਵੀ ਸੰਭਾਵੀ ਹਮਲੇ ਨੂੰ ਰੋਕਣ ਦੇ ਮੱਦੇਨਜ਼ਰ ਲਗਾਈਆਂ ਗਈਆਂ ਸਨ।

ਪ੍ਰਧਾਨ ਮੰਤਰੀ ਨੇ ਇੱਕ ਦਿਨ ਪਹਿਲਾਂ ਇਹ ਵੀ ਐਲਾਨ ਕੀਤਾ ਸੀ ਕਿ ਕੈਨੇਡਾ ਲਾਤਵੀਆ ਵਿਚ ਆਪਣੇ ਮਿਸ਼ਨ ਨੂੰ ਤਿੰਨ ਹੋਰ ਸਾਲਾਂ ਲਈ ਵਧਾਏਗਾ,ਯਾਨੀ ਕੈਨੇਡੀਅਨ ਫੋਰਸਿਜ਼ ਦੇ ਸੈਨਿਕ 2026 ਵਿਚ ਵਾਪਸ ਨਹੀਂ ਬੁਲਾਏ ਜਾਣਗੇ,ਉਹ 2029 ਤੱਕ ਲਾਤਵੀਆ ਵਿਚ ਤਾਇਨਾਤ ਰਹਿਣਗੇ। ਕੈਨੇਡਾ ਦੀ ਇਸ ਮਿਸ਼ਨ ਵਿਚ ਸ਼ਮੂਲੀਅਤ 2014 ਵਿਚ ਰੂਸ ਦੇ ਯੂਕਰੇਨ 'ਤੇ ਸ਼ੁਰੂਆਤੀ ਹਮਲੇ ਦੇ ਜਵਾਬ ਵਜੋਂ ਸ਼ੁਰੂ ਹੋਈ ਸੀ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਅੱਜ ਇਹ ਜੰਗੀ ਗਰੁੱਪ ਇੱਕ ਪ੍ਰਮੁੱਖ ਬਹੁ-ਰਾਸ਼ਟਰੀ ਬ੍ਰਿਗੇਡ ਦੇ ਰੂਪ ਵਿਚ ਵਿਕਸਤ ਹੋ ਚੁੱਕਾ ਹੈ,ਜਿਸ ਵਿਚ ਕੈਨੇਡਾ ਯੂਰਪ ਦੇ ਪੂਰਬੀ ਹਿੱਸੇ ਦੀ ਰੱਖਿਆ ਲਈ 14 ਨੈਟੋ ਮੁਲਕਾਂ ਦੇ 3,500 ਵੱਧ ਸੈਨਿਕਾਂ ਦੀ ਅਗਵਾਈ ਕਰ ਰਿਹਾ ਹੈ। ਕਾਰਨੀ ਨੇ ਲਾਤਵੀਅਨ ਮਿਲਟਰੀ ਬੇਸ 'ਤੇ ਕੈਨੇਡੀਅਨ ਸੈਨਿਕਾਂ ਨੂੰ ਕਿਹਾ ਕਿ ਯੂਕਰੇਨ ਵਿਚ ਰੂਸ ਦੀ ਚੱਲ ਰਹੀ ਮੌਜੂਦਾ ਜੰਗ ਕਾਰਨ ਓਪਰੇਸ਼ਨ ਰੀਇਨਸ਼ੋਰੈਂਸ ਦੀ ਮਹੱਤਤਾ ਹੋਰ ਵੀ ਵੱਧ ਗਈ ਹੈ।