ਮਾਰਕ ਕਾਰਨੀ ਵਲੋਂ ਕੈਨੇਡਾ ਭਰ ਦੇ ਪ੍ਰੀਮੀਅਰਾਂ ਨਾਲ ਕੀਤੀ ਜਾ ਰਹੀ ਬੈਠਕ

ਕੈਨੇਡਾ ਦੀ ਅਮਰੀਕਾ ਅਤੇ ਚੀਨ ਨਾਲ ਟੈਰਿਫ ਵਾਰ ਅਤੇ ਦੇਸ਼ ਅੰਦਰ ਵਪਾਰ ਨੂੰ ਸੌਖਾਲਾ ਬਣਾਉਣ ਦੇ ਮੁੱਦੇ 'ਤੇ ਚਰਚਾ ਲਈ ਅੱਜ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਵਲੋਂ ਅੱਜ ਕੈਨੇਡਾ ਭਰ ਦੇ ਪ੍ਰੀਮੀਅਰਾਂ ਨਾਲ ਬੈਠਕ ਕੀਤੀ ਜਾ ਰਹੀ ਹੈ। ਕਾਰਨੀ ਵਲੋਂ ਐਤਵਾਰ ਨੂੰ ਫੈਡਰਲ ਚੋਣਾਂ ਦੀ ਘੋਸ਼ਣਾ ਕਰਨ ਦੀਆਂ ਸੰਭਾਵਨਾਂ ਤੋਂ ਪਹਿਲਾਂ ਹੋ ਰਹੀ ਇਸ ਬੈਠਕ ਵਿਚ 13 ਸੂਬਿਆਂ ਦੀ ਵੱਖ-ਵੱਖ ਅਰਥ ਵਿਵਸਥਾ ਨੂੰ ਸਿੰਗਲ ਕੈਨੇਡੀਅਨ ਅਰਥਵਿਵਸਥਾ ਬਣਾਉਣ 'ਤੇ ਫੋਕਸ ਹੋਵੇਗਾ, ਜਿਸ ਦਾ ਮਤਲਬ ਇੱਕ-ਸੂਬੇ ਤੋਂ ਦੂਜੇ ਸੂਬੇ ਵਿਚ ਵਪਾਰ ਕਰਨ ਵਿਚ ਆਉਣ ਵਾਲੀਆਂ ਪ੍ਰਮੁੱਖ ਰੁਕਾਵਟਾਂ ਨੂੰ ਦੂਰ ਕਰਨਾ ਹੈ।

ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਦਾ ਕਹਿਣਾ ਸੀ ਕਿ ਉਹ ਪ੍ਰਧਾਨ ਮੰਤਰੀ ਕਾਰਨੀ ਕੋਲ ਕੈਨੇਡੀਅਨ ਕੈਨੋਲਾ ਤੇਲ 'ਤੇ ਚੀਨ ਦੇ ਟੈਰਿਫ ਦਾ ਮੁੱਦਾ ਚੁੱਕਣਗੇ ਅਤੇ ਉਨ੍ਹਾਂ ਨੂੰ ਚੋਣਾਂ ਵਿਚ ਜਾਣ ਤੋਂ ਪਹਿਲਾਂ ਚੀਨ ਨਾਲ ਗੱਲ ਕਰਨ ਦੀ ਬੇਨਤੀ ਕਰਨਗੇ।

ਦੱਸ ਦੇਈਏ ਕਿ ਕੈਨੇਡੀਅਨ ਕੈਨੋਲਾ ਤੇਲ 'ਤੇ ਵੀਰਵਾਰ ਤੋਂ ਚੀਨ ਵਲੋਂ ਲਗਾਏ ਗਏ 100 ਫੀਸਦੀ ਟੈਰਿਫ ਨਾਲ ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਦੇ ਕਿਸਾਨ ਸਭ ਤੋਂ ਵੱਧ ਪ੍ਰਭਾਵਿਤ ਹੋਣ ਵਾਲੇ ਹਨ। ਗੌਰਤਲਬ ਹੈ ਕਿ ਇਸ ਤੋਂ ਪਹਿਲਾਂ ਅਮਰੀਕੀ ਟੈਰਿਫ ਦੇ ਮੁੱਦੇ 'ਤੇ ਪ੍ਰੀਮੀਅਰ ਦੀਆਂ ਪਿਛਲੀਆਂ ਬੈਠਕਾਂ 14 ਮਾਰਚ ਤੋਂ ਪਹਿਲਾਂ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਹੋਈਆਂ ਸਨ।