19.72C Vancouver 19.72C VancouverJun 24, 2024 5:27 PM - The Canadian Press
ਕੈਨੇਡਾ ਆ ਰਹੀ ਕਿੰਗ ਚਾਰਲਸ ਦੀ 73 ਸਾਲਾ ਭੈਣ ਰਾਜਕੁਮਾਰੀ ਐਨੀ ਦਾ ਦੌਰਾ ਟਲ ਗਿਆ ਹੈ। ਪਿਛਲੇ ਦਿਨ ਗੈਟਕੋਮਬੇ ਪਾਰਕ ਅਸਟੇਟ ਵਿਚ ਸੈਰ ਦੌਰਾਨ ਉਨ੍ਹਾਂ ਦੇ ਸਿਰ ਵਿਚ ਸੱਟ ਲੱਗ ਗਈ। ਬਕਿੰਘਮ ਪੈਲੇਸ ਨੇ ਇੱਕ ਸਟੇਟਮੈਂਟ ਵਿਚ ਉਨ੍ਹਾਂ ਦਾ ਦੌਰਾ ਰੱਦ ਹੋਣ ਦੀ ਜਾਣਕਾਰੀ ਦਿੱਤੀ।
ਉਨ੍ਹਾਂ 30 ਜੂਨ ਨੂੰ ਦੋ ਦਿਨਾਂ ਲਈ ਕੈਨੇਡਾ ਆਉਣਾ ਸੀ, ਇਸ ਦੌਰਾਨ ਉਨ੍ਹਾਂ ਨੇ ਨਿਊਫਾਊਂਡਲੈਂਡ ਦੇ ਸੇਂਟ ਜੌਹਨ ਵਿਚ ਨੈਸ਼ਨਲ ਵਾਰ ਮੈਮੋਰੀਅਲ ਦੇ ਉਦਘਾਟਨ ਦੀ 100 ਵੀਂ ਬਰਸੀ ਮੌਕੇ ਸ਼ਾਮਲ ਹੋਣਾ ਸੀ।
ਮੈਡੀਕਲ ਟੀਮ ਮੁਤਾਬਕ, ਮਰਹੂਮ ਮਹਾਰਾਣੀ ਐਲਿਜ਼ਾਬੈਥ ਦੀ ਇਕਲੌਤੀ ਧੀ ਪਿ੍ਰੰਸ ਐਨੀ ਨੂੰ ਹਲਕੀਆਂ ਸੱਟਾਂ ਸਨ ਪਰ ਸਾਵਾਧਾਨੀ ਦੇ ਤੌਰ ’ਤੇ ਉਨ੍ਹਾਂ ਨੂੰ ਪੱਛਮੀ ਇੰਗਲੈਂਡ ਦੇ ਇੱਕ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਅਤੇ ਹੁਣ ਉਨ੍ਹਾਂ ਦੀ ਸਿਹਤ ਠੀਕ ਦੱਸੀ ਜਾਂਦੀ ਹੈ।
ਪਿ੍ਰੰਸ ਐਨ ਸ਼ਾਹੀ ਪਰਿਵਾਰ ਦੇ ਸਭ ਤੋਂ ਪ੍ਰਸਿੱਧ ਮੈਂਬਰਾਂ ਵਿਚੋਂ ਇੱਕ ਹੈ, ਕਿੰਗ ਚਾਰਲਸ ਦੇ ਕੈਂਸਰ ਟਰੀਟਮੈਂਟ ਦੌਰਾਨ ਉਨ੍ਹਾਂ ਨੇ ਕਈ ਜ਼ਿੰਮੇਵਾਰੀਆਂ ਸੰਭਾਲੀਆਂ ਸਨ। ਘੋੜਿਆਂ ਨਾਲ ਉਨ੍ਹਾਂ ਦਾ ਕਾਫੀ ਸਨੇਹ ਹੈ, ਮੰਨਿਆ ਜਾਂਦਾ ਹੈ ਕਿ ਗੈਟਕੋਮਬੇ ਪਾਰਕ ਅਸਟੇਟ ਵਿਚ ਸੈਰ ਦੌਰਾਨ ਉਨ੍ਹਾਂ ਦੇ ਸਿਰ ਵਿਚ ਸੱਟ ਵੀ ਇਸੇ
ਵਜ੍ਹਾ ਨਾਲ ਲੱਗੀ ਪਰ ਇਸ ਦੀ ਪੁਸ਼ਟੀ ਨਹੀਂ ਹੋਈ।
1976 ਦੀ ਮਾਂਟਰੀਅਲ ਓਲੰਪਿਕ ਗੇਮ ਵਿਚ ਉਨ੍ਹਾਂ ਨੇ ਬ੍ਰਿਟਿਸ਼ ਘੋੜਸਵਾਰ ਟੀਮ ਦੇ ਮੈਂਬਰ ਦੇ ਰੂਪ ਵਿਚ ਹਿੱਸਾ ਲਿਆ ਸੀ ਅਤੇ ਇਸ ਵਿਚ ਉਹ ਪਹਿਲੀ ਸ਼ਾਹੀ ਓਲੰਪੀਅਨ ਬਣੇ ਸਨ।
