ਟਰੈਕਟਰ ਰੈਲੀ ਦੌਰਾਨ ਸ਼ਹੀਦ ਹੋਏ ਨੌਜਵਾਨ ਦੇ ਪਰਿਵਾਰ ਨੂੰ ਮਿਲੀ ਪ੍ਰਿਯੰਕਾ ਗਾਂਧੀ ਵਾਡਰਾ

ਭਾਰਤ ਦੇ ਗਣਤੰਤਰ ਦਿਹਾੜੇ 'ਤੇ ਹੋਈ ਟ੍ਰੈਕਟਰ ਰੈਲੀ ਦੌਰਾਨ ਦਿੱਲੀ 'ਚ ਐਕਸੀਡੈਂਟ ਦੌਰਾਨ ਸ਼ਹੀਦ ਹੋਏ ਨਵਰੀਤ ਸਿੰਘ ਦੇ ਪਰਿਵਾਰ ਨੂੰ ਮਿਲਣ ਅੱਜ ਵੀਰਵਾਰ ਨੂੰ ਕਾਂਗਰਸ ਦੀ ਨੇਤਾ ਪ੍ਰਿਯੰਕਾ ਗਾਂਧੀ ਵਾਡਰਾ ਉੱਤਰ ਪ੍ਰਦੇਸ਼ ਦੇ ਰਾਮਪੁਰ ਜ਼ਿਲੇ 'ਚ ਪੁੱਜੀ|

ਉਸਦੇ ਨਾਲ ਪਾਰਟੀ ਦੇ ਹੋਰ ਨੇਤਾ ਵੀ ਸਨ|

ਇਸ ਦੌਰਾਨ ਉਸਨੂੰ ਸਵਰਗਵਾਸੀ ਕਿਸਾਨ ਦੇ ਪਰਿਵਾਰ ਨਾਲ ਗੱਲਬਾਤ ਕਰਦਿਆਂ ਵੀ ਵੇਖਿਆ ਗਿਆ|

ਰਾਹ 'ਚ ਗਾਂਧੀ ਦੀ ਗੱਡੀ ਨੂੰ ਮੌਸਮ ਕਰਕੇ ਵਿਖਣ 'ਚ ਦਿੱਕਤ ਆਉਣ ਕਰਕੇ ਰੁਕ ਕੇ ਸਾਫ਼ ਕੀਤਾ ਗਿਆ|

ਅੱਜ ਸਵੇਰੇ ਪਹਿਲਾ ਰਾਮਪੁਰ ਵੱਲ ਜਾਂਦਿਆਂ ਪ੍ਰਿਯੰਕਾ ਦੇ ਗੱਡੀਆਂ ਦੇ ਕਾਫ਼ਲੇ ਦੀਆਂ ਕੁਝ ਗੱਡੀਆਂ ਹਾਪੁੜ ਰੋਡ 'ਤੇ ਆਪਸ 'ਚ ਭਿੜ ਗਈਆਂ ਸਨ |

ਹਾਲਾਕਿ ਇਸ ਦੌਰਾਨ ਕਿਸੇ ਨੂੰ ਕੋਈ ਸੱਟ ਲੱਗਣ ਦੀ ਕੋਈ ਖ਼ਬਰ ਨਹੀਂ|

ਦੱਸਣਯੋਗ ਹੈ ਕਿ ਨਵਰੀਤ ਸਿੰਘ ਦਾ ਟ੍ਰੈਕਟਰ ਬੈਰੀਕੇਡ 'ਚ ਵੱਜਣ ਕਰਕੇ ਪਲਟਨ ਨਾਲ ਉਸਦੀ ਮੌਤ ਹੋਈ ਸੀ|

ਦਿੱਲੀ ਪੁਲਿਸ ਵੱਲੋਂ ਇਸਦੀ ਸੀਸੀਟੀਵੀ ਤਸਵੀਰ ਜਾਰੀ ਕੀਤੀ ਗਈ ਸੀ, ਜਿਸ 'ਚ ਟਰੈਕਟਰ ਨੂੰ ਆਈਟੀਓ 'ਤੇ ਬੈਰੀਕੇਡ 'ਚ ਵੱਜ ਕੇ ਪਲਟਦੇ ਵੇਖਿਆ ਜਾ ਸਕਦਾ ਹੈ|

ਇਸ ਸੰਦਰਭ 'ਚ ਰਾਹੁਲ ਗਾਂਧੀ ਵੱਲੋਂ ਵੀ ਬੀਤੇ 15 ਦਿਨਾਂ ਦੌਰਾਨ ਤਿੰਨ ਵਾਰੀ ਪਤਰਕਾਰ ਮਿਲਣੀਆਂ ਕਰਾਈਆਂ ਜਾ ਚੁੱਕੀਆਂ ਹਨ ਅਤੇ ਖੇਤੀ ਕਾਨੂੰਨਾਂ ਨੂੰ ਵਾਪਸ ਲੈਣ ਦੀ ਮੰਗ ਕੀਤੀ ਗਈ ਹੈ|

ਗ਼ੌਰਤਲਬ ਹੈ ਕਿ ਕਾਂਗਰਸ ਵੱਲੋਂ ਭਾਰਤ ਦੀ ਕੇਂਦਰ ਸਰਕਾਰ ਵੱਲੋਂ ਪਾਸ ਕੀਤੇ ਖੇਤੀ ਕਾਨੂੰਨਾਂ ਨੂੰ ਵਾਪਸ ਲੈਣ ਦੀ ਮੰਗ 'ਤੇ ਲਗਾਤਾਰ ਆਪਣਾ ਪੱਖ ਕਿਸਾਨਾਂ ਦੇ ਹੱਕ 'ਚ ਰੱਖਿਆ ਜਾ ਰਿਹਾ ਹੈ|

ਬੁੱਧਵਾਰ ਨੂੰ ਪਾਰਲੀਮੈਂਟ 'ਚ ਇਸੇ ਮੁੱਦੇ 'ਤੇ ਦੋਵਾਂ ਸਦਨਾਂ 'ਚ ਵਿਰੋਧੀ ਧਿਰ ਵੱਲੋਂ ਕਈ ਵਾਰੀ ਕਾਰਵਾਈ ਨੂੰ ਮੁਲਤਵੀ ਕਰਨਾ ਪਿਆ ਸੀ|