17.59C Vancouver 17.59C VancouverJun 9, 2020 7:54 PM -
ਫੈਡਰਲ ਪਬਲਿਕ ਸੇਫਟੀ ਮਿਨਿਸਟਰ ਬਿਲ ਬਲੇਅਰ ਦਾ ਕਹਿਣਾ ਹੈ ਕਿ ਜੋ ਪੁਲੀਸ ਅਧਿਕਾਰੀ ਡਿਊਟੀ 'ਤੇ ਜ਼ਰੂਰਤ ਨਾਲੋਂ ਵੱਧ ਜ਼ੋਰ ਦੀ ਵਰਤੋਂ ਕਰਦੇ ਹਨ ਜਾਂ ਨਸਲ ਦੇ ਆਧਾਰ 'ਤੇ ਵਿਤਕਰਾ ਕਰਦੇ ਹਨ, ਉਹਨਾਂ ਦੀ ਜਵਾਬਤਲਬੀ ਹੋਣੀ ਚਾਹੀਦੀ ਹੈ।
ਬਲੇਅਰ ਨੇ ਕਿਹਾ ਕਿ ਹਾਲ ਵਿੱਚ ਇੰਡੀਜਨਸ ਲੋਕਾਂ ਅਤੇ ਪੁਲੀਸ ਵਿੱਚਕਾਰ ਹੋਈਆਂ ਕਈ ਹਿੰਸਕ ਝੜਪਾਂ ਨੂੰ ਲੈ ਕੇ ਉਹ ਬਹੁਤ ਚਿੰਤਤ ਹਨ।
ਉਹਨਾਂ ਕਿਹਾ ਕਿ ਭਾਵੇਂ ਪੁਲੀਸ ਦੀ ਨਿਰਪੱਖ ਸੇਵਾ ਸੁਨਿਸ਼ਚਿਤ ਕਰਨ ਲਈ ਪੁਖਤਾ ਨੀਤੀ ਮੌਜੂਦ ਹੈ, ਫ਼ਿਰ ਵੀ ਪੁਲੀਸ ਅਤੇ ਇੰਡੀਜਨਸ ਭਾਈਚਾਰਿਆਂ ਦੇ ਆਪਸੀ ਸੰਬੰਧ ਨੂੰ ਬਿਹਤਰ ਕਰਨ ਲਈ ਹੋਰ ਬਹੁਤ ਕੰਮ ਕਰਨ ਦੀ ਲੋੜ ਹੈ।
ਅਮਰੀਕਾ ਵਿੱਚ ਪੁਲੀਸ ਦੀ ਵਧੀਕੀ ਕਾਰਣ ਹੋਈ ਜੌਰਜ ਫਲੌਇਡ ਦੀ ਮੌਤ ਪਿੱਛੋਂ, ਅਮਰੀਕਾ ਅਤੇ ਕੈਨੇਡਾ ਵਿੱਚ ਪੁਲੀਸ ਤੰਤਰ ਨੂੰ ਸਿਰੇ ਤੋਂ ਉਧੇੜ ਕੇ ਦੁਬਾਰਾ ਤਿਆਰ ਕਰਨ ਬਾਰੇ ਬਹੁਤ ਵੱਡੇ ਪੱਧਰ 'ਤੇ ਵਾਦ-ਵਿਵਾਦ ਚੱਲ ਰਿਹਾ ਹੈ।
ਬਲੇਅਰ ਨੇ ਕਿਹਾ ਕਿ ਦੇਸ਼ ਦਾ ਹਰ ਹਿੱਸਾ ਅਜਿਹੀ ਪੁਲੀਸ ਸੇਵਾ ਦਾ ਹੱਕਦਾਰ ਹੈ ਜੋ ਕਿ ਜਵਾਬਦੇਹ ਹੋਣ ਦੇ ਨਾਲ ਨਾਲ, ਸੱਭਿਆਚਾਰਕ ਪੱਖ ਤੋਂ ਸਮਰੱਥ ਹੋਵੇ।
ਉਹਨਾਂ ਕਿਹਾ ਕਿ ਮਾਨਸਿਕ ਰੋਗਾਂ ਅਤੇ ਨਸ਼ਾਖੋਰੀ ਸਮੇਤ ਹਰ ਤਰ੍ਹਾਂ ਕਿ ਸਮਾਜਿਕ ਅਸਮਾਨਤਾ ਬਾਰੇ ਗੱਲਬਾਤ ਵੀ ਕਰਨਾ ਜ਼ਰੂਰੀ ਹੈ, ਪਰ ਉਹਨਾਂ ਇਹ ਸਾਫ਼ ਨਹੀਂ ਕੀਤਾ ਕਿ ਉਹ ਪੁਲੀਸ ਦੀ ਫੰਡਿੰਗ ਨੂੰ ਅਜਿਹੇ ਖੇਤਰਾਂ ਵੱਲ ਲਗਾਏ ਜਾਣ ਦੇ ਹੱਕ ਵਿੱਚ ਹਨ ਜਾਂ ਨਹੀਂ।
