ਪਬਲਿਕ ਸਰਵਿਸ ਵਰਕਰਾਂ ਦੇ ਧਰਨੇ ਦਾ ਬੀ.ਸੀ. ਤੱਕ ਵਿਸਥਾਰ

ਬੀ.ਸੀ. ਭਰ ਵਿਚ ਸਰਕਾਰ ਵਲੋਂ ਚਲਾਏ ਜਾਂਦੇ 25 ਲੀਕਰ ਡਿਸਟ੍ਰੀਬਿਊਸ਼ਨ ਰਿਟੇਲ ਸਟੋਰਾਂ ਦੇ 600 ਤੋਂ ਵੱਧ ਵਰਕਰਾਂ ਨੇ ਅੱਜ ਜੌਬ ਤੋਂ ਵਾਕ ਔਫ ਕਰ ਦਿੱਤਾ ਹੈ, ਜਿਸ ਨਾਲ ਬੀ.ਸੀ. ਜਨਰਲ ਇੰਪਲਾਈਜ਼ ਯੂਨੀਅਨ ਦੀ ਹੜਤਾਲ ਹੋਰ ਵੱਡੀ ਹੋ ਗਈ ਹੈ। ਯੂਨੀਅਨ ਦਾ ਕਹਿਣਾ ਹੈ ਕਿ ਉਸ ਨੇ ਸਰਕਾਰ ਨੂੰ ਗੱਲਬਾਤ ਦੀ ਮੇਜ਼ 'ਤੇ ਵਾਪਸ ਲਿਆਉਣ ਦੀ ਕੋਸ਼ਿਸ਼ ਤਹਿਤ ਸਰਕਾਰੀ ਰੈਵੇਨਿਊ ਦੇ ਮੁੱਖ ਸਰੋਤ ਨੂੰ ਟਾਰਗੇਟ ਕੀਤਾ ਹੈ।

ਸ਼ਰਾਬ ਦੀਆਂ ਦੁਕਾਨਾਂ ਤੋਂ ਇਲਾਵਾ ਵਿਕਟੋਰੀਆ ਵਿਚ ਮਲਟੀ-ਮਨਿਸਟਰੀ ਸਾਈਟ ਦੇ ਲਗਭਗ 1,000 ਵਰਕਰ ਵੀ ਹੜਤਾਲ 'ਤੇ ਹਨ, ਜਿਸ ਵਿਚ ਖੇਤੀਬਾੜੀ, ਵਾਤਾਵਰਣ, ਜੰਗਲ, ਨੌਕਰੀਆਂ, ਸੈਰ-ਸਪਾਟਾ ਅਤੇ ਵਾਟਰ ਮਿਨਿਸਟਰੀਜ਼ ਦੇ ਕਰਮਚਾਰੀ ਸ਼ਾਮਲ ਹਨ। ਇਸ ਨਾਲ ਬੀ.ਸੀ. ਜਨਰਲ ਇੰਪਲਾਈਜ਼ ਯੂਨੀਅਨ ਦੀ ਹੜਤਾਲ ਵਿਚ ਹਿੱਸਾ ਲੈ ਰਹੇ ਸਰਕਾਰੀ ਕਰਮਚਾਰੀਆਂ ਦੀ ਗਿਣਤੀ ਲਗਭਗ 14,000 ਹੋ ਗਈ ਹੈ।

ਯੂਨੀਅਨ ਦੇ ਪ੍ਰਧਾਨ ਪਾਲ ਫਿੰਚ ਨੇ ਕਿਹਾ ਕਿ ਅਸੀਂ ਮੰਨਦੇ ਹਾਂ ਕਿ ਵਧਦੀ ਹੜਤਾਲ ਦਾ ਅਸਰ ਰੈਸਟੋਰੈਂਟ ਇੰਡਸਟਰੀ ਅਤੇ ਛੋਟੇ ਕਾਰੋਬਾਰਾਂ 'ਤੇ ਪਵੇਗਾ, ਇਸ ਲਈ ਅਸੀਂ ਉਨ੍ਹਾਂ ਨੂੰ ਵੀ ਗੁਜ਼ਾਰਿਸ਼ ਕਰਦੇ ਹਾਂ ਕਿ ਉਹ ਸੂਬਾ ਸਰਕਾਰ 'ਤੇ ਦਬਾਅ ਪਾਉਣ ਵਿਚ ਸਾਡਾ ਸਾਥ ਦੇਣ। ਗੌਰਤਲਬ ਹੈ ਕਿ ਪਬਲਿਕ ਸਰਵਿਸ ਵਰਕਰ ਦੀ ਹੜਤਾਲ ਦਾ ਇਹ ਚੌਥੇ ਹਫ਼ਤਾ ਹੈ।