ਕਿਊਬੈਕ ਸਰਕਾਰ ਨੇ ਆਪਣੇ ਇਮੀਗ੍ਰੇਸ਼ਨ ਟਾਰਗੇਟ ਵਿਚ ਕੀਤੀ ਕਟੌਤੀ

ਕਿਊਬੈਕ ਸਰਕਾਰ ਨੇ ਆਪਣੇ ਇਮੀਗ੍ਰੇਸ਼ਨ ਟਾਰਗੇਟ ਵਿਚ ਕਟੌਤੀ ਕਰ ਦਿੱਤੀ ਹੈ, ਜਿਸ ਤਹਿਤ ਆਉਣ ਵਾਲੇ ਸਾਲਾਂ ਲਈ ਹੁਣ ਸਾਲਾਨਾ ਸਥਾਈ ਨਿਵਾਸੀਆਂ ਦਾ ਨਵਾਂ ਟੀਚਾ 45,000 ਕਰ ਦਿੱਤਾ ਗਿਆ ਹੈ, ਜੋ 2025 ਲਈ ਉਮੀਦ ਕੀਤੇ ਗਏ ਲਗਭਗ 61,000 ਅਨੁਮਾਨਿਤ ਇਮੀਗ੍ਰੈਂਟਾਂ ਤੋਂ ਮਹੱਤਵਪੂਰਨ ਕਮੀ ਹੈ।

ਸੂਬੇ ਦੀ ਨਵੀਂ ਇਮੀਗ੍ਰੇਸ਼ਨ ਯੋਜਨਾ ਮੁਤਾਬਕ, ਕਿਊਬੈਕ ਸਰਕਾਰ ਨੇ ਪਹਿਲਾਂ ਇਸ ਟਾਰਗੇਟ ਨੂੰ ਹੋਰ ਵੀ ਘਟਾ ਕੇ 25,000 ਤੱਕ ਲਿਜਾਣ 'ਤੇ ਵਿਚਾਰ ਕੀਤਾ ਸੀ ਪਰ ਫਿਰ ਫ਼ੈਸਲਾ ਕੀਤਾ ਕਿ ਇਹ ਗਿਣਤੀ ਆਰਥਿਕ ਲੋੜਾਂ ਅਤੇ ਫ਼ਰੈਂਚ ਭਾਸ਼ਾ ਦੀ ਰੱਖਿਆ ਵਿਚਕਾਰ ਸੰਤੁਲਨ ਬਣਾਉਣ ਵਿਚ ਸਹਾਇਕ ਰਹੇਗੀ। ਯੋਜਨਾ ਅਨੁਸਾਰ, 2029 ਤੱਕ ਕਿਊਬੈਕ ਵਿਚ ਲਗਭਗ 80 ਫੀਸਦੀ ਇਮੀਗ੍ਰੈਂਟਸ ਨੂੰ ਮੱਧਮ ਪੱਧਰ ਦੀ ਫ਼ਰੈਂਚ ਭਾਸ਼ਾ ਦੀ ਜਾਣਕਾਰੀ ਹੋਣਾ ਲਾਜ਼ਮੀ ਹੋਵੇਗਾ, 2019 ਵਿਚ ਇਹ ਟੀਚਾ 50 ਫੀਸਦੀ ਸੀ।

ਇਸ ਦੇ ਨਾਲ ਹੀ ਕਿਊਬੈਕ ਸਰਕਾਰ ਦਾ ਇਰਾਦਾ 2029 ਤੱਕ ਅਸਥਾਈ ਵਿਦੇਸ਼ੀ ਕਾਮਿਆਂ ਅਤੇ ਵਿਦੇਸ਼ੀ ਵਿਦਿਆਰਥੀਆਂ ਦੀ ਗਿਣਤੀ ਨੂੰ ਵੀ 2024 ਦੇ ਪੱਧਰਾਂ ਦੇ ਮੁਕਾਬਲੇ 13 ਫੀਸਦੀ ਘਟਾਉਣ ਦਾ ਹੈ, ਮੁੱਖ ਤੌਰ 'ਤੇ ਇਸ ਦਾ ਅਸਰ ਮਾਂਟਰੀਅਲ ਅਤੇ ਲਾਵਲ ਵਿਚ ਪਵੇਗਾ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਕਿਊਬੈਕ ਵਿਚ ਲਗਭਗ 562,000 ਅਸਥਾਈ ਇਮੀਗ੍ਰੈਂਟ ਹਨ।