ਕਿਊਬੈਕ ਸਰਕਾਰ ਡੇਅਕੇਅਰਜ਼ ਵਿੱਚ ਧਾਰਮਿਕ ਚਿੰਨ੍ਹਾਂ 'ਤੇ ਲਗਾਏਗੀ ਪਾਬੰਦੀ

ਕਿਊਬੈਕ ਸਰਕਾਰ ਨੇ ਆਪਣਾ ਧਾਰਮਿਕ ਚਿੰਨ ਬੈਨ ਸੂਬੇ ਦੇ ਡੇਅਕੇਅਰ ਸੈਂਟਰਾਂ ਤੱਕ ਵਧਾਉਣ ਦਾ ਐਲਾਨ ਕੀਤਾ ਹੈ। ਧਰਮ ਨਿਰਪੱਖਤਾ ਜੀਨ-ਫ੍ਰਾਂਸਵਾ ਰੋਬਰਜ ਨੇ ਕਿਹਾ ਕਿ ਕਿਊਬੈਕ ਵਾਸੀ ਧਰਮ ਨਿਰਪੱਖਤਾ ਨੂੰ ਹੋਰ ਮਜ਼ਬੂਤ ​​ਚਾਹੁੰਦੇ ਹਨ। ਰੋਬਰਜ ਨੇ ਕਿਹਾ ਕਿ ਸਰਕਾਰੀ ਸਬਸਿਡੀ ਪ੍ਰਾਪਤ ਡੇਅਕੇਅਰ ਸੈਂਟਰ ਅਤੇ ਨਰਸਰੀਆਂ ਵਿਚ ਕੰਮ ਕਰਨ ਵਾਲੇ ਸਟਾਫ ਦੇ ਧਾਰਮਿਕ ਚਿੰਨ੍ਹਾਂ ਨੂੰ ਪਹਿਨਣ 'ਤੇ ਪਾਬੰਦੀ ਲਗਾਉਣ ਲਈ ਨਵਾਂ ਕਾਨੂੰਨ ਜਲਦ ਪੇਸ਼ ਕੀਤਾ ਜਾਵੇਗਾ।

ਇਹ ਪਾਬੰਦੀ ਸਬਸਿਡੀ ਵਾਲੀਆਂ ਚਾਈਲਡ ਕੇਅਰ ਸਰਵਿਸ ਵਿਚ ਕੰਮ ਕਰਨ ਵਾਲੇ ਸਾਰੇ ਕਰਮਚਾਰੀਆਂ 'ਤੇ ਲਾਗੂ ਹੋਵੇਗੀ। ਇਹ ਫੈਸਲਾ ਇੱਕ ਸਰਕਾਰੀ ਕਮੇਟੀ ਦੀ ਸਿਫ਼ਾਰਸ਼ 'ਤੇ ਲਿਆ ਗਿਆ ਹੈ, ਜਿਸ ਦਾ ਕਹਿਣਾ ਹੈ ਕਿ ਡੇ-ਕੇਅਰ ਕਰਮਚਾਰੀ, ਅਧਿਆਪਕਾਂ ਵਾਂਗ ਹੀ ਜ਼ਿੰਮੇਵਾਰੀ ਵਾਲੇ ਅਹੁਦਿਆਂ 'ਤੇ ਹੁੰਦੇ ਹਨ ਜੋ ਛੋਟੇ ਬੱਚਿਆਂ ਨੂੰ ਪ੍ਰਭਾਵਿਤ ਕਰ ਸਕਦੇ ਹਨ।

ਕਿਊਬੈਕ ਵਿਚ ਟੀਚਰਜ਼ ਅਤੇ ਪੁਲਿਸ ਔਫੀਸਰ ਵਰਗੇ ਸਰਕਾਰੀ ਕਰਮਚਾਰੀਆਂ ਲਈ ਡਿਊਟੀ ਦੌਰਾਨ ਧਾਰਮਿਕ ਚਿੰਨ੍ਹ ਪਹਿਨਣ ਦੀ ਪਹਿਲਾਂ ਹੀ ਪਾਬੰਦੀ ਹੈ। ਮੰਤਰੀ ਰੋਬਰਜ ਨੇ ਕਿਹਾ ਕਿ ਨਵੇਂ ਕਾਨੂੰਨ ਵਿਚ ਇੱਕ grandfather clause ਸ਼ਾਮਲ ਹੋਵੇਗਾ। ਇਸ ਵਿਵਸਥਾ ਦਾ ਮਤਲਬ ਹੈ ਕਿ ਪਾਬੰਦੀ ਸਿਰਫ਼ ਭਵਿੱਖ ਵਿਚ ਨਿਯੁਕਤ ਹੋਣ ਵਾਲੇ ਕਰਮਚਾਰੀਆਂ 'ਤੇ ਲਾਗੂ ਹੋਵੇਗੀ। ਡੇਅਕੇਅਰ ਸੈਂਟਰਾਂ ਵਿਚ ਮੌਜੂਦਾ ਕਰਮਚਾਰੀ ਜੋ ਧਾਰਮਿਕ ਚਿੰਨ੍ਹ ਪਹਿਨਦੇ ਹਨ ਉਹ ਅਜਿਹਾ ਕਰਨਾ ਜਾਰੀ ਰੱਖ ਸਕਣਗੇ।