ਕਿਊਬੈਕ ਟਿਊਸ਼ਨ ਫ਼ੀਸ ਵਾਧਾ: ਮੈਕਗਿਲ ਯੂਨੀਵਰਸਿਟੀ ਨੇ ਵੀ ਪ੍ਰਗਟਾਈ ਚਿੰਤਾ, ਕਿਹਾ ਖ਼ਤਰੇ 'ਚ ਭਵਿੱਖ

ਸੂਬੇ ਤੋਂ ਬਾਹਰਲੇ ਵਿਦਿਆਰਥੀਆਂ ਲਈ ਟਿਊਸ਼ਨ ਫੀਸ ਦੁੱਗਣਾ ਕਰਨ ਦੀ ਕਿਊਬੈਕ ਸਰਕਾਰ ਦੀ ਯੋਜਨਾ ਦੀ ਜੰਮ ਕੇ ਨਿੰਦਾ ਹੋ ਰਹੀ ਹੈ।

ਜਿੱਥੇ ਪਹਿਲਾਂ ਮਾਂਟਰੀਅਲ ਦੀ ਕਨਕੋਰਡੀਆ ਯੂਨੀਵਰਸਿਟੀ ਨੇ ਟਿਊਸ਼ਨ ਫ਼ੀਸ ਨੂੰ ਦੁੱਗਣਾ ਕਰਨ ਦੀ ਯੋਜਨਾ ਨੂੰ ਲੈ ਕੇ ਪੈਣ ਵਾਲੇ ਮਾੜੇ ਪ੍ਰਭਾਵ ਸਾਂਝੇ ਕੀਤੇ ਸਨ, ਉੱਥੇ ਹੀ ਹੁਣ ਮੈਕਗਿਲ ਯੂਨੀਵਰਸਿਟੀ ਦਾ ਕਹਿਣਾ ਹੈ ਕਿ ਸੂਬੇ ਵੱਲੋਂ ਬਾਹਰ ਦੇ ਵਿਦਿਆਰਥੀਆਂ ਲਈ ਟਿਊਸ਼ਨ ਵਿੱਚ $8,000 ਦਾ ਵਾਧਾ Schulich School of Music ਦੇ ਭਵਿੱਖ ਲਈ ਖ਼ਤਰਾ ਹੈ।

ਪ੍ਰਿੰਸੀਪਲ ਦੀਪ ਸੈਣੀ ਨੇ ਵੀਰਵਾਰ ਨੂੰ ਕਿਹਾ ਕਿ ਅਗਲੇ ਫਾਲ ਵਿੱਚ $17,000 ਦੀ ਨਵੀਂ ਟਿਊਸ਼ਨ ਫੀਸ ਲਾਗੂ ਹੋਣ ਤੋਂ ਬਾਅਦ ਕਿਊਬੈਕ ਤੋਂ ਬਾਹਰੋਂ ਕੈਨੇਡੀਅਨ ਵਿਦਿਆਰਥੀਆਂ ਦੇ ਦਾਖਲੇ ਵਿੱਚ 20 ਤੋਂ 80 ਫੀਸਦੀ ਤੱਕ ਦੀ ਕਮੀ ਆ ਸਕਦੀ ਹੈ।

ਉਨ੍ਹਾਂ ਕਿਹਾ ਕਿ ਅਜਿਹਾ ਨੁਕਸਾਨ Schulich ਸਕੂਲ ਲਈ ਵਿਨਾਸ਼ਕਾਰੀ ਹੋਵੇਗਾ, ਜਿੱਥੇ ਲਗਭਗ 40 ਫੀਸਦੀ ਵਿਦਿਆਰਥੀ ਦੂਜੇ ਸੂਬਿਆਂ ਤੋਂ ਆਉਂਦੇ ਹਨ।

ਇਸਦੇ ਨਾਲ ਹੀ ਸੈਣੀ ਨੇ ਯੂਨੀਵਰਸਿਟੀ ਦੀਆਂ ਟੀਮਾਂ ਵਿੱਚ ਕਟੌਤੀ ਦੀ ਸੰਭਾਵਨਾ ਵੀ ਪ੍ਰਗਟਾਈ, ਜਿਨ੍ਹਾਂ ਦੇ ਇੱਕ ਤਿਹਾਈ ਮੈਂਬਰ ਕੈਨੇਡਾ ਵਿੱਚ ਹੋਰ ਥਾਵਾਂ ਤੋਂ ਆਉਂਦੇ ਹਨ।

ਮੈਕਗਿਲ ਦਾ ਅੰਦਾਜ਼ਾ ਹੈ ਕਿ ਟਿਊਸ਼ਨ ਵਾਧੇ ਦੇ ਨਾਲ-ਨਾਲ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਦੇ ਦਾਖਲੇ 'ਤੇ ਪ੍ਰਭਾਵ ਪਵੇਗਾ ਤੇ ਯੂਨੀਵਰਸਿਟੀ ਨੂੰ ਹਰ ਸਾਲ $42 ਮਿਲੀਅਨ ਅਤੇ $94 ਮਿਲੀਅਨ ਦੇ ਵਿਚਕਾਰ ਨੁਕਸਾਨ ਹੋ ਸਕਦਾ ਹੈ।

ਜ਼ਿਕਰਯੋਗ ਹੈ ਕਿ ਕਿਊਬੈਕ ਤੋਂ ਬਾਹਰ ਕੈਨੇਡੀਅਨਾਂ ਲਈ ਟਿਊਸ਼ਨ ਫੀਸ 2024 ਦੀ ਸ਼ੁਰੂਆਤ ਵਿੱਚ $8,992 ਤੋਂ ਵੱਧ ਕੇ $17,000 ਹੋ ਜਾਵੇਗੀ, ਜਦੋਂ ਕਿ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਲਈ ਇਹ ਫ਼ੀਸ $20,000 ਹੋਵੇਗੀ।

ਕਿਊਬੈਕ ਸਰਕਾਰ ਦਾ ਕਹਿਣਾ ਹੈ ਕਿ ਸੂਬੇ ਵਿੱਚ ਫ੍ਰੈਂਚ ਭਾਸ਼ਾ ਦੀ ਰੱਖਿਆ ਕਰਨ ਲਈ ਉਸ ਨੂੰ ਸੂਬੇ ਤੋਂ ਬਾਹਰ ਦੇ ਵਿਦਿਆਰਥੀਆਂ ਲਈ ਟਿਊਸ਼ਨ ਫੀਸਦੁੱਗਣੀ ਕਰਨ ਦੀ ਲੋੜ ਹੈ।