ਕੈਨੇਡਾ 'ਚ ਕਿਊਬੈਕ ਬਣਿਆ ਦੇਸ਼ ਦਾ ਸਭ ਤੋਂ ਖੁਸ਼ਹਾਲ ਸੂਬਾ

ਕੈਨੇਡਾ ਵਿਚ ਕੀਤੇ ਗਏ ਇੱਕ ਸਰਵੇ ਵਿਚ ਕਿਊਬੈਕ ਨੂੰ ਦੇਸ਼ ਦਾ ਸਭ ਤੋਂ ਖੁਸ਼ਹਾਲ ਸੂਬਾ ਪਾਇਆ ਗਿਆ ਹੈ। ਲਗਭਗ 40,000 ਕੈਨੇਡੀਅਨ ਦੇ ਸਰਵੇ ਵਿਚ ਕਿਊਬੈਕ ਵਾਸੀਆਂ ਨੇ ਆਪਣੀ ਖੁਸ਼ੀ ਨੂੰ 100 ਵਿਚੋਂ ਔਸਤ 72.4 ਦਾ ਦਰਜਾ ਦਿੱਤਾ, ਜੋ ਕਿ ਰਾਸ਼ਟਰੀ ਔਸਤ ਤੋਂ ਬਹੁਤ ਉੱਪਰ ਹੈ।

ਦੂਜੇ ਨੰਬਰ 'ਤੇ ਨਿਊ ਬਰੰਜ਼ਵਿਕ ਰਿਹਾ, ਜਦੋਂ ਕਿ ਮੈਨੀਟੋਬਾ ਅਤੇ ਪ੍ਰਿੰਸ ਐਡਵਰਡ ਆਈਲੈਂਡ ਸੂਚੀ ਵਿਚ ਸਭ ਤੋਂ ਹੇਠਾਂ ਰਹੇ। ਉਥੇ ਹੀ, ਖੁਸ਼ੀ ਦੀ ਰੇਟਿੰਗ ਵਿਚ 10 ਸਭ ਤੋਂ ਵੱਡੇ ਸ਼ਹਿਰਾਂ ਵਿਚੋਂ ਮਿਸੀਸਾਗਾ ਟੌਪ 'ਤੇ ਰਿਹਾ ਅਤੇ ਟੌਰੌਂਟੋ ਸਭ ਤੋਂ ਥੱਲ੍ਹੇ। ਮਾਂਟਰੀਅਲ ਇਸ ਸ਼੍ਰੇਣੀ ਵਿਚ ਦੂਜੇ ਸਥਾਨ 'ਤੇ ਸੀ।

ਸਰਵੇ ਵਿਚ ਦੇਖਿਆ ਗਿਆ ਕਿ 49 ਫੀਸਦੀ ਉੱਤਰਦਾਤਾਵਾਂ ਨੇ ਕਿਹਾ ਕਿ ਪਿਛਲੇ ਸਾਲ ਦੌਰਾਨ ਉਨ੍ਹਾਂ ਦੀ ਖੁਸ਼ੀ ਦਾ ਪੱਧਰ ਬਦਲਿਆ ਨਹੀਂ ਹੈ, ਜਦੋਂ ਕਿ 23 ਫੀਸਦੀ ਨੇ ਕਿਹਾ ਕਿ ਉਹ ਵਧੇਰੇ ਖੁਸ਼ ਹਨ ਅਤੇ 28 ਫੀਸਦੀ ਨੇ ਕਿਹਾ ਕਿ ਉਹ ਘੱਟ ਖੁਸ਼ ਹਨ। ਲੇਜਰ ਦੇ ਸਰਵੇ ਮੁਤਾਬਕ, ਕਿਊਬੈਕ, ਨਿਊ ਬਰੰਜ਼ਵਿਕ ਅਤੇ ਨਿਊਫਾਊਂਡਲੈਂਡ ਲੈਬਰਾਡੋਰ ਦਾ ਖੁਸ਼ੀ ਦਾ ਪੱਧਰ- ਰਾਸ਼ਟਰੀ ਔਸਤ 68.7 ਤੋਂ ਉੱਪਰ ਸੀ।

ਲੇਜਰ ਨੇ ਇਹ 31 ਮਾਰਚ ਤੋਂ 13 ਅਪ੍ਰੈਲ ਵਿਚਕਾਰ 18 ਸਾਲ ਅਤੇ ਇਸ ਤੋਂ ਵੱਧ ਉਮਰ ਦੇ 39,841 ਕੈਨੇਡੀਅਨ ਦਾ ਸਰਵੇ ਕੀਤਾ।