ਰਾਕੇਸ਼ ਟਿਕੈਤ ਨੇ ਕਿਸਾਨੀ ਸੰਘਰਸ਼ ਦੇ ਲੰਮਾ ਚੱਲਣ 'ਤੇ ਦਿੱਤਾ ਜ਼ੋਰ

ਕਿਸਾਨਾਂ ਵੱਲੋਂ ਤਿੰਨ ਖੇਤੀ ਕਾਨੂੰਨਾਂ ਦੇ ਵਿਰੋਧ 'ਚ ਕੀਤੇ ਜਾ ਰਹੇ ਪ੍ਰਦਰਸ਼ਨ ਦੌਰਾਨ ਭਾਰਤੀ ਕਿਸਾਨ ਯੂਨੀਅਨ ਦੇ ਆਗੂ ਰਾਕੇਸ਼ ਟਿਕੈਤ ਨੇ ਅੱਜ ਵੀਰਵਾਰ ਨੂੰ ਆਖਿਆ ਕਿ ਇਹ ਸੰਘਰਸ਼ ਹਲੇ ਲੰਮਾ ਸਮਾਂ ਚੱਲੇਗਾ।

ਟਿਕੈਤ ਨੇ ਆਖਿਆ,"ਅਸੀਂ ਉਦੋਂ ਤੱਕ ਸੰਘਰਸ਼ ਜਾਰੀ ਰੱਖਾਂਗੇ, ਜਦੋਂ ਤੱਕ ਕਿ ਸਰਕਾਰ ਕਮੇਟੀ ਨਾਲ ਗੱਲ ਕਾਰਨ ਲਈ ਸਹਿਮਤ ਨਹੀਂ ਹੋ ਜਾਂਦੀI ਅਸੀਂ ਇੱਥੇ ਲੰਮੇ ਸਮੇਂ ਲਈ ਹਾਂ।"

ਉਨ੍ਹਾਂ ਆਖਿਆ,"ਮੁਲਕ 'ਚ ਫ਼ਸਲ ਲਈ ਇੱਕ ਘੱਟੋ-ਘੱਟ ਅਤੇ ਵੱਧ ਤੋਂ ਵੱਧ ਮੁੱਲ ਹੋਣਾ ਚਾਹੀਦਾ ਹੈ।"
ਟਿਕੈਤ ਨੇ ਕਿਹਾ,"ਮਈ ਮਹੀਨੇ 'ਚ ਚਾਰ ਸੂਬਿਆਂ-ਪੱਛਮੀ ਬੰਗਾਲ, ਤਾਮਿਲਨਾਡੂ, ਕੇਰਲ ਅਤੇ ਆਸਾਮ ਦੀਆਂ ਅਸੈਮਬਲੀ ਚੋਣਾਂ ਹੋਣੀਆਂ ਹਨ, ਕਿਸਾਨ ਵੀ ਸਿਆਸੀ ਰੈਲੀਆਂ 'ਚ ਹਿੱਸਾ ਲੈਣਗੇ।"

ਦੱਸਣਯੋਗ ਹੈ ਕਿ ਬੀਤੇ ਸਾਲ 26 ਨਵੰਬਰ ਤੋਂ ਕਿਸਾਨ ਦਿੱਲੀ ਦੇ ਵੱਖੋ-ਵੱਖ ਬਾਰਡਰਾਂ 'ਤੇ ਭਾਰਤ ਸਰਕਾਰ ਵਲੋਂ ਪਾਸ ਕੀਤੇ ਤਿੰਨ ਨਵੇਂ ਖੇਤੀ ਬਿੱਲਾਂ-ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ) 2020, ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 ਦਾ ਵਿਰੋਧ ਕਰ ਰਹੇ ਹਨ।