ਰਾਕੇਸ਼ ਟਿਕੈਤ ਨੇ ਆਖਿਆ,ਖੇਤੀ ਕਾਨੂੰਨਾਂ ਦੇ ਵਾਪਸ ਲਏ ਜਾਣ ਤੱਕ ਧਰਨੇ ਦੀਆਂ ਥਾਵਾਂ ਨਹੀਂ ਖਾਲੀ ਕਰਨਗੇ ਕਿਸਾਨ

ਭਾਰਤੀ ਕਿਸਾਨ ਯੂਨੀਅਨ (ਬੀਕਿਉ) ਦੇ ਲੀਡਰ ਰਾਕੇਸ਼ ਟਿਕਟ ਨੇ ਵੀਰਵਾਰ ਨੂੰ ਕਿਹਾ ਕਿ ਜਦੋਂ ਤੱਕ ਖੇਤੀ ਕ਼ਾਨੂਨ ਵਾਪਸ ਨਹੀਂ ਲਏ ਜਾਂਦੇ, ਉਦੋਂ ਤੱਕ ਕਿਸਾਨ ਆਪਣੇ ਘਰਾਂ ਨੂੰ ਨਹੀਂ ਪਰਤਣਗੇ।

ਉਹਨਾਂ ਦੁਹਰਾਇਆ ਕਿ ਧਰਨੇ ਦੀਆਂ ਥਾਵਾਂ ਹੀ ਹੁਣ ਕਿਸਾਨਾਂ ਦੇ ਘਰ ਹਨ।

ਇਹ ਇਲਜ਼ਾਮ ਲਾਏ ਜਾਣ ਦੇ ਜਵਾਬ ਵਿੱਚ, ਕਿ ਕੋਰੋਨਾ ਵਾਇਰਸ ਕਿਸਾਨਾਂ ਦੇ ਇਕੱਠ ਕਰਕੇ ਵਧ ਰਿਹਾ ਹੈ, ਟਿਕੈਤ ਨੇ ਆਖਿਆ,"ਕਿਸਾਨ ਆਪਣੇ ਘਰਾਂ ਵਿੱਚ ਹਨ। ਹੋਰ ਅਸੀਂ ਉਨ੍ਹਾਂ ਨੂੰ ਕਿੱਥੇ ਜਾਣ ਲਈ ਆਖ ਸਕਦੇ ਹਾਂ? ਕੀ ਕੋਵਿਡ ਇੱਥੋਂ ਫ਼ੈਲ ਰਿਹਾ ਹੈ? ਕੀ ਕੋਰੋਨਾ ਇੱਥੋਂ ਫ਼ੈਲ ਰਿਹਾ ਹੈ? ਅਸੀਂ ਬੀਤੇ 5 ਮਹੀਨਿਆਂ ਤੋਂ ਇੱਥੇ ਰਹਿ ਰਹੇ ਹਾਂ, ਹੁਣ ਇਹੀ ਸਦਾ ਨਵਾਂ ਘਰ ਹੈ।"

ਟਿਕੈਤ ਨੇ ਇਹ ਵੀ ਕਿਹਾ ਕਿ ਕਈ ਕਿਸਾਨ ਅਜੇ ਕੋਵਿਡ ਦੇ ਟੀਕੇ ਦੀ ਦੂਜੀ ਖੁਰਾਕ ਲੈਣ ਲਈ ਸੰਘਰਸ਼ ਕਰ ਰਹੇ ਹਨ।

"ਕਈ ਕਿਸਾਨਾਂ ਨੇ ਟੀਕਾ ਲਵਾ ਲਿਆ ਹੈ ਪਰ ਕਈ ਅਜੇ ਦੂਜੀ ਖੁਰਾਕ ਲਈ ਸੰਘਰਸ਼ ਕਰ ਰਹੇ ਹਨ। ਅਸੀਂ ਅਫਸਰਾਂ ਨੂੰ ਇਥੇ ਕੈਂਪ ਲਾਉਣ ਲਈ ਆਖਿਆ ਹੈ,"ਉਨ੍ਹਾਂ ਅੱਗੇ ਆਖਿਆ।

ਉਨ੍ਹਾਂ ਕਿਸਾਨਾਂ 'ਤੇ ਲੱਗੇ ਇਸ ਇਲਜ਼ਾਮ ਤੋਂ ਵੀ ਇਨਕਾਰ ਕੀਤਾ ਕਿ ਕਿਸਾਨਾਂ ਨੇ ਇਫਤਾਰ ਲਈ ਕੋਵਿਡ-19 ਦੇ ਨਿਯਮ ਤੋੜੇ ਹਨ।

ਫੈਲੀ ਵੀਡੀਓ 'ਤੇ ਪ੍ਰਤੀਕਿਰਿਆ ਦਿੰਦਿਆਂ ਟਿਕੈਤ ਨੇ ਆਖਿਆ,"ਲੋਕ ਇੱਕ-ਦੂਜੇ ਤੋਂ ਦੂਰ ਬੈਠੇ ਸਨ। ਸਰਕਾਰ ਵੱਲੋਂ 50 ਲੋਕਾਂ ਦੇ ਇਕੱਠ ਦੀ ਇਜਾਜ਼ਤ ਹੈ। ਉੱਥੇ 22-35 ਲੋਕ ਸਨ।ਕੋਈ ਵੀ ਕਿਸੇ ਨੂੰ ਨਹੀਂ ਮਿਲਿਆ, ਕਿਸੇ ਨੇ ਕਿਸੇ ਨਾਲ ਹੱਥ ਨਹੀਂ ਮਿਲਾਏ।"

ਜ਼ਿਕਰਯੋਗ ਹੈ ਕਿ ਹਜ਼ਾਰਾਂ ਹੀ ਕਿਸਾਨ ਦਿੱਲੀ ਦੇ- ਸਿੰਘੂ, ਟਿਕਰੀ ਅਤੇ ਗਾਜ਼ੀਪੁਰ- ਬਾਰਡਰਾਂ 'ਤੇ ਨਵੇਂ ਖੇਤੀ ਕਾਨੂਨਾਂ ਖ਼ਿਲਾਫ਼ ਧਰਨਾ ਦੇ ਰਹੇ ਹਨ, ਜੋ ਸਰਵ ਉੱਚ ਅਦਾਲਤ ਵੱਲੋਂ ਰੋਕੇ ਹੋਏ ਹਨ।