ਕੈਨਮੋਰ ਨੇੜੇ ਪੈਰਾਗਲਾਈਡਿੰਗ ਹਾਦਸੇ ਵਿੱਚ ਇੱਕ ਵਿਅਕਤੀ ਦੀ ਮੌਤ, ਆਰ.ਸੀ.ਐਮ.ਪੀ. ਵਲੋਂ ਜਾਂਚ ਜਾਰੀ

ਐਲਬਰਟਾ ਦੇ ਕੈਨਮੋਰ ਵਿਚ ਇਕ ਪੈਰਾਗਲਾਈਡਰ ਦੀ ਪਹਾੜ ਨਾਲ ਟਕਰਾਉਣ ਕਾਰਨ ਮੌਤ ਹੋ ਗਈ। ਆਰ.ਸੀ.ਐਮ.ਪੀ. ਮੁਤਾਬਕ ਇਹ ਹਾਦਸਾ ਪਿਛਲੇ ਹਫ਼ਤੇ ਹਾ ਲਿੰਗ ਪੀਕ ਦੇ ਨੇੜੇ ਵਾਪਰਿਆ।ਆਰ.ਸੀ.ਐਮ.ਪੀ. ਕਾਰਪੋਰੇਸ਼ਨਲ ਜੀਨਾ ਸਲੇਨੀ ਨੇ ਦੱਸਿਆ ਕਿ ਪੁਲਿਸ ਨੂੰ 18 ਜਨਵਰੀ ਦੀ ਦੁਪਹਿਰ ਨੂੰ ਇਕ ਹਾਦਸੇ ਬਾਰੇ ਸੂਚਨਾ ਮਿਲੀ ਸੀ। ਜਦੋਂ ਤੱਕ ਬਚਾਅ ਟੀਮਾਂ ਅਤੇ ਹੈਲੀਕਾਪਟਰ ਮੌਕੇ 'ਤੇ ਪਹੁੰਚੇ, ਉਦੋਂ ਤੱਕ ਬਹੁਤ ਦੇਰ ਹੋ ਚੁੱਕੀ ਸੀ।ਕਾਨਾਨਾਸਕਿਸ ਐਮਰਜੈਂਸੀ ਸੇਵਾਵਾਂ ਅਤੇ ਈ.ਐੱਮ.ਐੱਸ ਦੀਆਂ ਟੀਮਾਂ ਮੌਕੇ 'ਤੇ ਪਹੁੰਚੀਆਂ।

ਪੁਲਿਸ ਨੇ ਇਲਾਕੇ ਵਿਚ ਟ੍ਰੈਫਿਕ ਕੰਟਰੋਲ ਕੀਤਾ ਤਾਂ ਜੋ ਬਚਾਅ ਕਾਰਜਾਂ ਵਿੱਚ ਕੋਈ ਰੁਕਾਵਟ ਨਾ ਆਵੇ। ਵਿਅਕਤੀ ਨੂੰ ਮੌਕੇ 'ਤੇ ਹੀ ਮ੍ਰਿਤਕ ਐਲਾਨ ਦਿੱਤਾ ਗਿਆ।ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਹਾਦਸਾ ਕਿਸੇ ਅਪਰਾਧਿਕ ਸਾਜ਼ਿਸ਼ ਦਾ ਹਿੱਸਾ ਨਹੀਂ ਲੱਗਦਾ ਪਰ ਅਸਲ ਕਾਰਨਾਂ ਦਾ ਪਤਾ ਲਗਾਉਣ ਲਈ ਪੋਸਟਮਾਰਟਮ ਦੀ ਰਿਪੋਰਟ ਦਾ ਇੰਤਜ਼ਾਰ ਕੀਤਾ ਜਾ ਰਿਹਾ ਹੈ।

ਐਲਬਰਟਾ ਦੇ ਜੰਗਲਾਤ ਅਤੇ ਪਾਰਕ ਮੰਤਰੀ ਦੇ ਪ੍ਰੈੱਸ ਸਕੱਤਰ ਮਾਈਕਲ ਪਲੇਨਿਟਸ ਨੇ ਸਪੱਸ਼ਟ ਕੀਤਾ ਕਿ ਪੈਰਾਗਲਾਈਡਿੰਗ ਫੈਡਰਲ ਨਿਯਮਾਂ ਅਧੀਨ ਆਉਂਦੀ ਹੈ। ਕਾਨਾਨਾਸਕਿਸ ਇਲਾਕੇ ਵਿਚ ਸਿਰਫ਼ ਦੋ ਅਧਿਕਾਰਤ ਥਾਵਾਂ ਹਨ, ਜਿੱਥੋਂ ਉਡਾਣ ਭਰੀ ਜਾ ਸਕਦੀ ਹੈ ਅਤੇ ਹਾ ਲਿੰਗ ਪੀਕ ਉਨ੍ਹਾਂ ਵਿੱਚੋਂ ਇਕ ਹੈ।