17.42C Vancouver 17.42C VancouverSep 14, 2022 9:52 PM - The Canadian Press
ਸਕਵਾਮਿਸ਼ ਦੇ ਇਲਾਕੇ 'ਚ ਸੀ ਟੁ ਸਕਾਈ ਗੰਡੋਲਾ ਨੂੰ ਨੁਕਸਾਨ ਪਹੁੰਚਾਏ ਜਾਣ ਤੋਂ ਕਰੀਬ 2 ਸਾਲ ਬਾਅਦ ਘਟਨਾ ਸੰਬੰਧੀ ਇੱਕ ਵੀਡੀਓ ਅਤੇ ਕੁਝ ਤਸਵੀਰਾਂ ਜਾਰੀ ਕੀਤੀਆਂ ਗਈਆਂ ਹਨ।
ਅਧਿਕਾਰੀਆਂ ਨੇ ਘਟਨਾ ਸੰਬੰਧੀ ਜਿੰਮੇਵਾਰ ਵਿਅਕਤੀ ਜਾਂ ਲੋਕਾਂ ਬਾਰੇ ਜਾਣਕਾਰੀ ਦੇਣ ਲਈ ਰਿਵਾਰਡ ਦੀ ਰਾਸ਼ੀ ਨੂੰ ਦੁੱਗਣਾ ਕਰਦਿਆਂ $500,000 ਤਕ ਵਧਾ ਦਿੱਤਾ ਹੈ।
ਅੱਜ ਇਸ ਮਾਮਲੇ 'ਚ ਜਾਣਕਾਰੀ ਦਿੰਦਿਆਂ ਆਰ.ਸੀ.ਐਮ.ਪੀ. ਨੇ ਇਹ ਵੀ ਆਖਿਆ ਕਿ ਮਾਮਲੇ ਦੀ ਜਾਂਚ ਮੇਜਰ ਕ੍ਰਾਈਮਸ ਸਪੈਸ਼ਲ ਪ੍ਰੋਜੈਕਟਸ ਯੂਨਿਟ ਨੂੰ ਸੌਂਪ ਦਿੱਤੀ ਗਈ ਹੈ।
ਯੂਨਿਟ ਵੱਲੋਂ ਇੱਕ ਸ਼ੱਕੀ ਦੀ ਥਰਮਲ ਤਸਵੀਰ ਵੀ ਸਾਂਝੀ ਕੀਤੀ ਗਈ ਹੈ।
ਇਸ ਦੌਰਾਨ ਦੱਸਿਆ ਗਿਆ ਕਿ ਸਿਤੰਬਰ 2020 'ਚ ਵਾਪਰੀ ਘਟਨਾ ਦੌਰਾਨ ਇੱਕ ਸਿਕਿਉਰਿਟੀ ਗਾਰਡ ਦੇ ਜਖਮੀ ਹੋਣ ਤੋਂ ਵੀ ਵਾਲ-ਵਾਲ ਬਚਾਅ ਰਹਿ ਗਿਆ ਸੀ।
ਅਧਿਕਾਰੀਆਂ ਨੇ ਦੱਸਿਆ ਕਿ ਸਿਕਿਉਰਿਟੀ ਗਾਰਡ ਨਾਲ ਨੁਕਸਾਨੀਆਂ ਗਈਆਂ ਗੰਡੋਲਾ ਕੇਬਲਸ ਦੇ ਆ ਟਕਰਾਉਣ ਦਾ ਖਤਰਾ ਵਧ ਗਿਆ ਸੀ।
ਕੁਝ ਹੀ ਪਲ ਇੱਧਰ-ਉੱਧਰ ਹੋਣ 'ਤੇ ਸਿਕਿਉਰਿਟੀ ਗਾਰਡ ਲਈ ਮੁਸ਼ਕਿਲ ਖੜੀ ਹੋ ਸਕਦੀ ਸੀ।
ਕੌਰਪੋਰਲ ਕ੍ਰਿਸ ਮੈਨਸੇਉ ਨੇ ਆਖਿਆ ਕਿ ਘਟਨਾ ਨੂੰ ਅੰਜਾਮ ਦੇਣ ਵਾਲੇ ਖਿਲਾਫ ਜੀਵਨ ਨੂੰ ਖਤਰੇ 'ਚ ਪਾਉਣ ਵਾਲੀ ਸ਼ਰਾਰਤ ਜਿਹੇ ਦੋਸ਼ਾਂ ਨੂੰ ਪਰਸੂ (pursue) ਕੀਤਾ ਜਾ ਰਿਹਾ ਹੈ।
ਲੋਕਾਂ ਨੂੰ ਮੰਗ ਕੀਤੀ ਗਈ ਹੈ ਕਿ ਘਟਨਾ ਸੰਬੰਧੀ ਕੋਈ ਜਾਣਕਾਰੀ ਹੋਵੇ ਤਾਂ ਦੱਸਿਆ ਜਾਵੇ।
ਯਾਦ ਰਹੇ ਇਸ ਤੋਂ ਪਹਿਲਾਂ ਕੇਬਲ ਨੂੰ ਕੱਟਣ ਦੇ ਮਾਮਲੇ 'ਚ ਕਿਸੇ ਸ਼ੱਕੀ ਦੀ ਪੁਖਤਾ ਜਾਣਕਾਰੀ ਅਤੇ ਗ੍ਰਿਫਤਾਰੀ 'ਚ ਮਦਦ ਕਰਨ ਵਾਲੇ ਲਈ $250,000 ਦੇ ਇਨਾਮ ਦਾ ਐਲਾਨ ਕੀਤਾ ਗਿਆ ਸੀ।
ਕਰੀਬ 2 ਸਾਲ ਪਹਿਲਾਂ ਦਿੱਤੀ ਗਈ ਟੈਕਨਿਕਲ ਰਿਪੋਰਟ 'ਚ ਦੱਸਿਆ ਗਿਆ ਸੀ ਕਿ ਗੰਡੋਲਾ ਦੀਆਂ ਕੇਬਲ ਕਾਰਸ ਡਿੱਗਣ ਦਾ ਕਾਰਨ ਕੇਬਲ ਨੂੰ ਕੱਟਿਆ ਜਾਣਾ ਸੀ।
ਇਸ 'ਚ ਡਿਜਾਇਨ ਜਾਂ ਆਪ੍ਰੇਸ਼ਨ ਦੇ ਫੇਲ੍ਹ ਹੋਣ ਦੀ ਸੰਭਾਵਨਾ ਨੂੰ ਰੱਦ ਕੀਤਾ ਗਿਆ ਸੀ।
ਇੱਕ ਸਾਲ ਵਿਚਾਲੇ 2 ਵਾਰ ਅਜਿਹੀਆਂ ਘਟਨਾਵਾਂ ਨੂੰ ਅੰਜਾਮ ਦਿੱਤਾ ਗਿਆ ਸੀ।
