15.32C Vancouver 15.32C VancouverMar 19, 2026 10:36 PM - Pervez Sandhu - Connect Newsroom
ਜੈਸਮੀਨ ਮੰਡੇਰ ਦਾ ਸੌਕਰ ਮੈਦਾਨ ਨਾਲ ਪਹਿਲਾ ਇੰਟਰੋਡਕਸ਼ਨ ਉਨ੍ਹਾਂ ਦੇ ਪਿਤਾ ਦਿਲਦਾਰ ਮੰਡੇਰ ਨੇ ਕਰੀਬ 25 ਸਾਲ ਪਹਿਲਾਂ ਕਰਵਾਇਆ ਸੀ। ਉਸ ਸਮੇਂ ਜੈਸਮੀਨ ਦੀ ਉਮਰ 5 ਸਾਲ ਸੀ। ਦਿਲਦਾਰ ਮੰਡੇਰ ਦੀ ਧੀ ਨੂੰ ਉਸ ਸਮੇਂ ਕੋਈ ਅੰਦਾਜ਼ਾ ਨਹੀਂ ਸੀ ਕਿ ਸੌਕਰ ਦੀ ਖੇਡ 'ਚ ਕਿਸ ਪ੍ਰਕਾਰ ਦੀਆਂ ਬੁਲੰਦੀਆਂ ਹਾਸਿਲ ਕੀਤੀਆਂ ਜਾ ਸਕਦੀਆਂ ਹਨ। ਪਰ ਉਸ ਸਮੇਂ ਤੋਂ ਸ਼ੁਰੂ ਹੋਏ ਸੌਕਰ ਦੇ ਸਫਰ ਵਿੱਚ ਜੈਸਮੀਨ ਨੂੰ ਕਈ ਪ੍ਰਾਪਤੀਆਂ ਹਾਸਿਲ ਹੋਈਆਂ। ਇੱਥੋਂ ਤੱਕ ਕਿ ਸਾਲ 2021 'ਚ ਟੋਕੀਓ ਓਲੰਪਿਕਸ ਦੌਰਾਨ ਜੈਸਮੀਨ ਕਨੇਡੀਅਨ ਨੈਸ਼ਨਲ ਸੌਕਰ ਟੀਮ ਦੀ ਸਟਾਫ਼ ਮੈਂਬਰ ਸੀ, ਉਹ ਟੀਮ ਜੋ ਓਲੰਪਿਕ ਗੋਲਡ ਮੈਡਲ ਜਿੱਤਣ 'ਚ ਕਾਮਯਾਬ ਰਹੀ। ਪਰ ਬੁਲੰਦੀਆਂ ਨਾਲ ਭਰਪੂਰ ਇਸ ਕਰੀਅਰ 'ਚ ਜੈਸਮੀਨ ਨੇ ਕਰੀਬ ਦੋ ਸਾਲ ਪਹਿਲਾਂ ਉਹ ਦੌਰ ਵੀ ਵੇਖਿਆ, ਜਿੱਥੇ ਡਰੋਨ ਗੇਟ ਵਿਵਾਦ ਹੋਇਆ ਅਤੇ ਜੈਸਮੀਨ ਨੂੰ ਇੱਕ ਬੈਨ ਦਾ ਸਾਹਮਣਾ ਕਰਨਾ ਪਿਆ। ਪਰ ਖਿਡਾਰੀ ਡਿੱਗਣ ਤੋਂ ਬਾਅਦ ਉੱਠਣਾ, ਅਤੇ ਉੱਠਣ ਤੋਂ ਬਾਅਦ ਫੇਰ ਭੱਜਣਾ ਤੇ ਕੰਪੀਟ ਕਰਨਾ ਜਾਣਦੇ ਹੁੰਦੇ ਹੈ। ਜੈਸਮੀਨ ਨੇ ਵੀ ਪੈਰਿਸ ਓਲੰਪਿਕਸ ਦੇ ਡਰੋਨ ਵਿਵਾਦ ਤੋਂ ਬਾਅਦ ਇੱਕ ਵਾਰ ਫਿਰ ਤੋਂ ਸੌਕਰ ਦੀ ਖੇਡ 'ਚ ਵਾਪਸੀ ਕਰਦੇ ਹੋਏ ਆਇਰਲੈਂਡ ਦੀ ਔਰਤਾਂ ਦੀ ਰਾਸ਼ਟਰੀ ਟੀਮ ਨਾਲ ਸੇਵਾਵਾਂ ਦੇਣਾ ਅਰੰਭਿਆ ਹੈ।
ਜ਼ਬਰਦਸਤ ਵਾਪਸੀ
ਜੈਸਮੀਨ ਮੰਡੇਰ ਨੇ ਬੀਤੇ ਕੁਝ ਸਮੇਂ ਦੌਰਾਨ ਡਰੋਨ ਵਿਵਾਦ ਕਾਰਨ ਖੇਡ ਤੋਂ ਦੂਰ ਰਹਿਣ ਮਗਰੋਂ ਇੱਕ ਵਾਰ ਫਿਰ ਤੋਂ ਜ਼ਬਰਦਸਤ ਵਾਪਸੀ ਕਰਦਿਆਂ ਆਇਰਲੈਂਡ ਦੀ ਰਾਸ਼ਟਰੀ ਮਹਿਲਾ ਟੀਮ ਨਾਲ ਪ੍ਰਫਾਰਮੈਂਸ ਐਨਾਲਿਸਟ ਵਜੋਂ ਸੇਵਾਵਾਂ ਦੇਣੀਆਂ ਸ਼ੁਰੂ ਕਰ ਦਿੱਤੀਆਂ ਹਨ। ਜੈਸਮੀਨ ਨੇ ਦੱਸਿਆ ਕਿ ਆਇਰਲੈਂਡ ਦੀ ਕੋਚ ਦੇ ਨਾਲ ਗੱਲਬਾਤ ਹੋਈ ਸੀ ਅਤੇ ਉਨ੍ਹਾਂ ਜੈਸਮੀਨ ਨੂੰ ਟੀਮ ਨਾਲ ਜੋੜਨ 'ਚ ਕਾਫੀ ਇੰਟ੍ਰਸਟ ਵਿਖਾਇਆ ਸੀ। ਜੈਸਮੀਨ ਨੇ ਦੱਸਿਆ ਕਿ ਉਹ ਸਮਝਦੀ ਹੈ ਕਿ ਆਇਰਲੈਂਡ ਦੀ ਟੀਮ ਚੰਗੀ ਖੇਡ ਦਾ ਦਮ ਰੱਖਦੀ ਹੈ ਅਤੇ ਉਨ੍ਹਾਂ ਨਾਲ ਜੁੜਨਾ ਇੱਕ ਚੰਗਾ ਮੌਕਾ ਜਾਪਿਆ ਅਤੇ ਇਸੇ ਕਾਰਨ ਉਨ੍ਹਾਂ ਟੀਮ ਨਾਲ ਜੁੜਨ ਦਾ ਫੈਸਲਾ ਲਿਆ। ਜੈਸਮੀਨ ਨੇ ਦੱਸਿਆ ਕਿ ਉਹ ਫਿਲਹਾਲ ਆਇਰਲੈਂਡ ਦੀ ਟੀਮ ਨੂੰ ਵਰਲਡ ਕੱਪ 'ਚ ਪਹੁੰਚਾਉਣ ਦੇ ਟੀਚੇ ਨਾਲ ਅੱਗੇ ਵਧ ਰਹੀ ਹਨ। ਜੈਸਮੀਨ ਦਾ ਕਹਿਣਾ ਹੈ ਕਿ ਫਿਲਹਾਲ ਉਨ੍ਹਾਂ ਦਾ ਫੋਕਸ ਆਇਰਲੈਂਡ ਦੀ ਟੀਮ 'ਤੇ ਹੈ ਅਤੇ ਭਵਿੱਖ 'ਚ ਹੋਰ ਕਿਹੜੇ ਮੌਕੇ ਮਿਲਦੇ ਹਨ, ਉਸ ਬਾਰੇ ਫਿਲਹਾਲ ਕੋਈ ਪੱਕਾ ਫੈਸਲਾ ਨਹੀਂ ਲਿਆ ਹੈ।
ਕਮਬੈਕ ਤੋਂ ਸੰਤੁਸ਼ਟ
ਜੈਸਮੀਨ ਦਾ ਕਹਿਣਾ ਹੈ ਕਿ ਉਹ ਚਾਹੁੰਦੀ ਸਨ ਕਿ ਹਾਈ ਲੈਵਲ ਦੀਆਂ ਟੀਮਾਂ ਨਾਲ ਕੰਮ ਕੀਤਾ ਜਾਵੇ ਅਤੇ ਅਜਿਹਾ ਹੀ ਹੋਇਆ ਹੈ। ਉਨ੍ਹਾਂ ਆਖਿਆ ਕਿ ਹਾਲ ਦੀ ਘੜੀ ਕਲੱਬ ਲੈਵਲ ਜਾਂ ਯੂਨੀਵਰਸਿਟੀ ਲੈਵਲ 'ਤੇ ਉਨ੍ਹਾਂ ਦਾ ਫੋਕਸ ਨਹੀਂ ਸੀ ਅਤੇ ਹਾਈ ਲੈਵਲ 'ਤੇ ਅਜੇ ਕਾਫੀ ਅਨਫਿਨਿਸ਼ਿਡ ਬਿਜਨਸ ਹੈ ਜਿਸ ਨੂੰ ਪੂਰਾ ਕਰਨ ਦੀ ਕੋਸ਼ਿਸ਼ ਹੈ। ਜੈਸਮੀਨ ਦੇ ਪਿਤਾ ਵੀ ਸੌਕਰ ਦੀ ਖੇਡ ਦੇ ਪ੍ਰਸ਼ੰਸਕ ਹਨ ਅਤੇ ਖੇਡ ਨੂੰ ਜਾਣਦੇ ਅਤੇ ਸਮਝਦੇ ਹਨ, ਅਤੇ ਜੈਸਮੀਨ ਨੇ ਦੱਸਿਆ ਕਿ ਉਹ ਵੀ ਇਸ ਪ੍ਰਕਾਰ ਦੀ ਕਮਬੈਕ ਤੋਂ ਖੁਸ਼ੀ ਮਹਿਸੂਸ ਕਰਦੇ ਹਨ।
ਮੁਸ਼ਕਿਲ ਸਮੇਂ ਨੇ ਕਾਫੀ ਕੁਝ ਸਿਖਾਇਆ - ਕਰੀਅਰ ਨਹੀਂ ਬਦਲਿਆ
ਜੈਸਮੀਨ ਦਾ ਕਹਿਣਾ ਹੈ ਕਿ ਮੁਸ਼ਕਿਲ ਸਮੇਂ ਦੌਰਾਨ ਉਨ੍ਹਾਂ ਸਿੱਖਿਆ ਕਿ ਕਿਸ ਮਸਲੇ ਵੱਲ ਧਿਆਨ ਦੇਣਾ ਹੈ ਅਤੇ ਪ੍ਰਾਇਓਰਿਟੀਸ ਕੀ ਹੋਣੀਆਂ ਚਾਹੀਦੀਆਂ ਹਨ। ਉਨ੍ਹਾਂ ਆਖਿਆ ਕਿ ਚੰਗੀ ਗੱਲ ਇਹ ਸੀ ਕਿ ਉਸ ਮੁਸ਼ਕਿਲ ਹਾਲਾਤਾਂ 'ਚ ਵੀ ਖੇਡ ਲਈ ਉਨ੍ਹਾਂ ਦਾ ਪਿਆਰ ਨਹੀਂ ਘਟਿਆ। ਉਨ੍ਹਾਂ ਆਖਿਆ ਕਿ ਉਸ ਸਮੇਂ ਨੇ ਸਿਖਾਇਆ ਕਿ ਪ੍ਰੋਫੈਸ਼ਨਲ ਕੰਮ 'ਚ ਕਈ ਵਾਰ ਬੜਾ ਇਕੱਲਾ ਮਹਿਸੂਸ ਹੋ ਸਕਦਾ ਹੈ ਅਤੇ ਤੁਹਾਡੀਆਂ ਉਚਾਈਆਂ ਅਤੇ ਪ੍ਰਾਪਤੀਆਂ ਕਾਫੀ ਹਾਈ ਪਰ ਕੋਈ ਛੋਟੀ ਜਿਹੀ ਗਲਤੀ ਕਾਫੀ ਥੱਲੇ ਲਿਜਾਣ ਵਾਲੀ ਮਹਿਸੂਸ ਹੋ ਸਕਦੀ ਹੈ। ਉਨ੍ਹਾਂ ਆਖਿਆ ਕਿ ਮੁਸ਼ਕਿਲ ਸਮੇਂ 'ਚ ਪ੍ਰੀਵਾਰ ਦੇ ਮਿਲੇ ਸਹਿਯੋਗ ਨੇ ਹਮੇਸ਼ਾ ਸੰਭਲਣ 'ਚ ਮਦਦ ਕੀਤੀ। ਜੈਸਮੀਨ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦਾ ਫੁੱਟਬਾਲ ਕਰੀਅਰ ਕਾਫੀ ਲੰਮਾ ਹੈ ਅਤੇ ਮੁਸ਼ਕਿਲ ਸਮੇਂ 'ਚ ਇਹ ਫੈਸਲਾ ਲੈਣਾ ਮੁਸ਼ਕਿਲ ਲਗਦਾ ਸੀ ਕਿ ਹੁਣ ਫੁੱਟਬਾਲ ਤੋਂ ਪਾਸੇ ਹਟ ਕੇ ਫਿਜ਼ਿਓਥੈਰੇਪੀ ਸੰਬੰਧੀ ਕਰੀਅਰ ਅੱਗੇ ਵਧਾਇਆ ਜਾਵੇ।
ਪ੍ਰੀਵਾਰ ਨੇ ਦਿੱਤਾ ਸਾਥ
ਜੈਸਮੀਨ ਦਾ ਕਹਿਣਾ ਹੈ ਕਿ ਉਹ ਖੁਸ਼ਨਸੀਬ ਸਨ ਕਿ ਬੈਨ ਦੇ ਸਮੇਂ ਦੌਰਾਨ ਉਨ੍ਹਾਂ ਨੂੰ ਪ੍ਰੀਵਾਰ ਨੇ ਸੰਭਲਣ 'ਚ ਮਦਦ ਕੀਤੀ। ਉਨ੍ਹਾਂ ਆਖਿਆ ਕਿ ਦੋ ਕਿਸਮ ਦੇ ਲੋਕ ਹੁੰਦੇ ਹਨ, ਇੱਕ ਉਹ ਜੋ ਸੱਚੇ ਢੰਗ ਨਾਲ ਤੁਹਾਡਾ ਸਾਥ ਦਿੰਦੇ ਹਨ ਅਤੇ ਹਰ ਮੌਕੇ ਤੁਹਾਡੇ ਨਾਲ ਰਹਿੰਦੇ ਹਨ, ਅਤੇ ਦੂਜੇ ਉਹ ਜੋ ਸਿਰਫ ਚੰਗੇ ਸਮੇਂ ਦੌਰਾਨ ਤੁਹਾਡੇ ਨਾਲ ਰਹਿੰਦੇ ਹਨ। ਜੈਸਮੀਨ ਨੇ ਦੱਸਿਆ ਕਿ ਵਿਸ਼ਵ ਭਰ ਦੇ ਕਈ ਲੋਕ ਸਮਝਦੇ ਸਨ ਕਿ ਇਹ ਸਿਰਫ ਇੱਕ ਫੇਜ਼ ਹੈ ਅਤੇ ਇਹ ਵੀ ਜਲਦੀ ਹੀ ਲੰਘ ਜਾਵੇਗਾ। ਉਨ੍ਹਾਂ ਆਖਿਆ ਕਿ ਜਦ ਮੁਸ਼ਕਿਲ ਦੌਰ ਦੀ ਸ਼ੁਰੂਆਤ ਸੀ ਤਾਂ ਲਗਦਾ ਸੀ ਕਿ ਸਭ ਦਾ ਧਿਆਨ ਇਸੇ ਮਸਲੇ 'ਤੇ ਹੀ ਕੇਂਦਰਿਤ ਹੈ, ਪਰ ਕੁਝ ਸਮੇਂ 'ਚ ਸਮਝ ਆ ਗਿਆ ਸੀ ਕਿ ਇਸ 'ਚ ਨਿਰਾਸ਼ ਹੋਣ ਦੀ ਲੋੜ ਨਹੀਂ ਹੈ ਅਤੇ ਇਸ ਮੁਸੀਬਤ ਸੰਬੰਧੀ ਗੱਲਬਾਤ ਕਰਨ ਦੀ ਝਿਜਕ ਵੀ ਚਲੀ ਗਈ ਸੀ।
ਸੰਘਰਸ਼ ਕਰਦੇ ਲੋਕਾਂ ਨੂੰ ਸਲਾਹ
ਜੈਸਮੀਨ ਦਾ ਕਹਿਣਾ ਹੈ ਕਿ ਲੋਕਾਂ ਨੂੰ ਜਦ ਸੰਘਰਸ਼ ਕਰਨਾ ਪੈਂਦਾ ਹੈ ਜਾਂ ਕਿਸੇ ਮੁਸ਼ਕਿਲ ਘੜੀ ਦਾ ਸਾਹਮਣਾ ਕਰਨਾ ਪੈਂਦਾ ਹੈ ਤਾਂ ਕਿਸੇ ਨਾ ਕਿਸੇ ਢੰਗ ਪਾਜੀਟਿਵ ਰਹਿਣਾ ਜਰੂਰੀ ਹੈ। ਉਨ੍ਹਾਂ ਆਖਿਆ ਕਿ ਉਹ ਖੁਸ਼ਨਸੀਬ ਸਨ ਕਿ ਪ੍ਰੀਵਾਰ ਅਤੇ ਦੋਸਤਾਂ ਨੇ ਉਨ੍ਹਾਂ ਨੂੰ ਸੰਭਾਲਿਆ, ਪਰ ਸਭ ਦੀ ਸਥਿਤੀ ਵੱਖੋ-ਵੱਖਰੀ ਹੁੰਦੀ ਹੈ ਅਤੇ ਸਭ ਨੂੰ ਆਪੋ-ਆਪਣੇ ਢੰਗ ਨਾਲ ਖੁਦ ਨੂੰ ਲਿਫਟ ਕਰਨ ਸੰਬੰਧੀ ਫੈਸਲਾ ਲੈਣ ਦੀ ਲੋੜ ਹੈ।
ਲੋਕ ਦੇਣ ਸੌਕਰ ਦਾ ਸਾਥ
ਜੈਸਮੀਨ ਦਾ ਕਹਿਣਾ ਹੈ ਕਿ ਇਲਾਕੇ 'ਚ ਸੌਕਰ ਦੇ ਵਿਕਾਸ ਲਈ ਖੇਡ ਨੂੰ ਲੋਕਾਂ ਦੇ ਸਹਿਯੋਗ ਦੀ ਲੋੜ ਹੈ। ਉਨ੍ਹਾਂ ਆਖਿਆ ਕਿ ਜੇਕਰ ਲੋਕ ਵਧ ਤੋਂ ਵਧ ਟਿਕਟਾਂ ਖਰੀਦਣ ਅਤੇ ਖੇਡਾਂ ਵੇਖਣ ਤਾਂ ਇਸ ਨਾਲ ਖੁਦ ਅਤੇ ਖਿਡਾਰੀਆਂ ਨੂੰ ਹੁਲਾਰਾ ਮਿਲੇਗਾ। ਜੈਸਮੀਨ ਨੇ ਆਖਿਆ ਕਿ ਜਿੱਥੇ ਇੱਕ ਪਾਸੇ ਖੇਡ 'ਚ ਵਿਕਾਸ ਲਈ ਪਾਰਟੀਸੀਪੇਸ਼ਨ ਜਰੂਰੀ ਹੈ, ਉੱਥੇ ਹੀ ਫਾਈਨੈਂਸ਼ੀਅਲ ਸਹਿਯੋਗ ਲਈ ਇਲਾਕੇ ਦੇ ਲੋਕਾਂ ਦਾ ਲੋਕਲ ਖੇਡ ਨੂੰ ਜਿਉਂਦਾ ਰੱਖਣ ਲਈ ਜਾ ਕੇ ਮੁਕਾਬਲਿਆਂ ਨੂੰ ਵੇਖਣਾ ਅਤੇ ਖਿਡਾਰੀਆਂ ਨੂੰ ਹੱਲਾਸ਼ੇਰੀ ਦੇਣਾ ਵੀ ਜਰੂਰੀ ਹੈ।
To watch the interview, click the link:
