ਕੈਨੇਡਾ ਵਿਚ ਹੁਨਰਮੰਦ ਕਾਮੇ ਜਲਦੀ ਛੱਡ ਰਹੇ ਦੇਸ਼,ਰਿਪੋਰਟ 'ਚ ਹੋਇਆ ਖੁਲਾਸਾ

ਕੈਨੇਡਾ ਵਿਚ ਪੰਜ ਵਿਚੋਂ ਇੱਕ ਪ੍ਰਵਾਸੀ ਇੱਥੇ ਆਉਣ ਦੇ ਹਰ 25 ਸਾਲ ਦੇ ਅੰਦਰ ਦੇਸ਼ ਛੱਡ ਰਿਹਾ ਹੈ,ਇਨ੍ਹਾਂ ਵਿਚ ਪ੍ਰਮੁੱਖ ਗਿਣਤੀ ਉੱਚ ਹੁਨਰਮੰਦ ਲੋਕਾਂ ਦੀ ਹੈ। ਇੰਸਟੀਚਿਊਟ ਫਾਰ ਕੈਨੇਡੀਅਨ ਸਿਟੀਜ਼ਨਸ਼ਿਪ ਨੇ ਇਸ ਸਬੰਧ ਵਿਚ "ਲੀਕੀ ਬਕੇਟ" ਨਾਂ ਦੀ ਆਪਣੀ ਸਾਲਾਨਾ ਰਿਪੋਰਟ ਜਾਰੀ ਕੀਤੀ ਹੈ,ਜਿਸ ਵਿਚ ਕਿਹਾ ਗਿਆ ਹੈ ਕਿ ਜ਼ਿਆਦਾਤਰ ਨਵੇਂ ਆਉਣ ਵਾਲੇ ਆਪਣੇ ਪਹਿਲੇ ਪੰਜ ਸਾਲਾਂ ਵਿਚ ਹੀ ਕੈਨੇਡਾ ਛੱਡ ਦਿੰਦੇ ਹਨ। ਜਿਨ੍ਹਾਂ ਫੀਲਡ ਦੇ ਸਭ ਤੋਂ ਵੱਧ ਲੋਕ ਮਾਈਗ੍ਰੇਸ਼ਨ ਕਰ ਰਹੇ ਹਨ, ਉਨ੍ਹਾਂ ਵਿਚ ਕਾਰੋਬਾਰੀ ਅਤੇ ਫਾਈਨਾਂਸ ਮੈਨੇਜਮੈਂਟ, ਸੂਚਨਾ ਤਕਨਾਲੋਜੀ ਅਤੇ ਇੰਜੀਨੀਅਰਿੰਗ ਸ਼ਾਮਲ ਹਨ।

ਇੰਸਟੀਚਿਊਟ ਫਾਰ ਕੈਨੇਡੀਅਨ ਸਿਟੀਜ਼ਨਸ਼ਿਪ ਨੇ ਇਨ੍ਹਾਂ ਟਰੈਂਡਸ ਦੇ ਆਧਾਰ 'ਤੇ ਅਨੁਮਾਨ ਲਗਾਇਆ ਹੈ ਕਿ ਅਗਲੇ ਸਾਲ ਕੈਨੇਡਾ ਆਉਣ ਵਾਲੇ ਸੰਭਾਵਿਤ 380,000 ਸਥਾਈ ਨਿਵਾਸੀਆਂ ਵਿਚੋਂ 20,000 ਤੋਂ ਵੱਧ ਪ੍ਰਵਾਸੀ 2031 ਤੱਕ ਕੈਨੇਡਾ ਛੱਡ ਦੇਣਗੇ। ਰਿਪੋਰਟ ਵਿਚ ਉੱਚ ਹੁਨਰਮੰਦ ਲੋਕਾਂ ਨੂੰ ਲੰਮਾ ਸਮਾਂ ਤੱਕ ਕੈਨੇਡਾ ਵਿਚ ਰਹਿਣ ਲਈ ਉਤਸ਼ਾਹਤ ਕਰਨ ਵਾਸਤੇ ਇੱਕ ਟੈਲੇਂਟ ਰੀਟੈਂਸ਼ਨ ਸਟੈਟਜੀ ਵਿਕਸਤ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।

ਇਹ ਰਿਪੋਰਟ ਪ੍ਰਵਾਸੀਆਂ ਦੇ ਟੈਕਸ ਡੇਟਾ ਦੇ ਵਿਸ਼ਲੇਸ਼ਣ ਦੇ ਆਧਾਰ 'ਤੇ ਹੈ,ਜੋ ਇਹ ਨਤੀਜਾ ਕੱਢਦੀ ਹੈ ਕਿ ਜੇ ਕੋਈ ਨਵਾਂ ਵਿਅਕਤੀ ਲਗਾਤਾਰ ਦੋ ਸਾਲਾਂ ਤੱਕ ਟੈਕਸ ਫਾਈਲ ਨਹੀਂ ਕਰਦਾ ਅਤੇ 2022 ਦੇ ਟੈਕਸ ਡੇਟਾ ਵਿਚ ਉਸ ਦਾ ਨਾਮ ਦਿਖਾਈ ਨਹੀਂ ਦਿੰਦਾ ਤਾਂ ਉਹ ਕੈਨੇਡਾ ਛੱਡ ਚੁੱਕਾ ਹੈ।