ਸਰੀ 'ਚ ਰਿਹਾਇਸ਼ੀ ਇਲਾਕੇ 'ਚ ਕਰੈਸ਼, ਸਥਾਨਿਕ ਨਿਵਾਸੀ ਨੇ ਚੁੱਕੇ ਸਪੀਡਿੰਗ 'ਤੇ ਸਵਾਲ

ਅੱਜ ਸਵੇਰ ਕਰੀਬ 9 ਵਜੇ ਸਰੀ ਦੇ 124 ਸਟ੍ਰੀਟ ਅਤੇ 75 ਐਵੀਨਿਊ ਦੇ ਇਲਾਕੇ 'ਚ ਦੋ ਗੱਡੀਆਂ ਕਰੈਸ਼ ਹੋ ਗਈਆਂ। ਇਸ ਕਰੈਸ਼ 'ਚ ਇੱਕ ਕਾਲੇ ਰੰਗ ਦੀ ਟੈਸਲਾ ਐਸ.ਯੂ.ਵੀ. ਅਤੇ ਇੱਕ ਭੂਰੇ ਰੰਗ ਦੀ ਮਿਨੀਵੈਨ ਸ਼ਾਮਿਲ ਸਨ।

ਕਰੈਸ਼ ਇੰਨਾ ਭਿਆਨਕ ਸੀ ਕਿ ਦੋਵੇਂ ਗੱਡੀਆਂ ਬੁਰੀ ਤਰ੍ਹਾਂ ਨੁਕਸਾਨੀਆਂ ਗਈਆਂ ਅਤੇ ਟੋਅ ਵਾਹਨ ਨੂੰ ਗੱਡੀਆਂ ਮੌਕੇ ਤੋਂ ਹਟਾਉਣੀਆਂ ਪਈਆਂ।

ਕਨੈਕਟ ਐਫ.ਐਮ. ਦੀ ਟੀਮ ਸਵੇਰ ਕਰੀਬ ਸਾਡੇ 11 ਵਜੇ ਮੌਕੇ 'ਤੇ ਪਹੁੰਚੀ ਸੀ ਅਤੇ ਉਸ ਵੇਲੇ ਤਕ ਵਾਹਨ ਚਾਲਕਾਂ ਨੂੰ ਮੌਕੇ ਤੋਂ ਲਿਜਾਇਆ ਜਾ ਚੁੱਕਿਆ ਸੀ, ਪਰ ਵਾਹਨਾਂ ਨੂੰ ਹਟਾਉਣ ਦਾ ਕੰਮ ਜਾਰੀ ਸੀ ਅਤੇ ਮੌਕੇ 'ਤੇ ਸਰੀ ਪੁਲਿਸ ਦੇ ਦੋ ਵਾਹਨ ਅਤੇ ਅਫ਼ਸਰ ਮੌਜੂਦ ਸਨ।

ਜਿਸ ਘਰ ਦੇ ਨੇੜੇ ਦੋਵੇਂ ਗੱਡੀਆਂ ਟੱਕਰ ਹੋਈ, ਉਥੇ ਦੀ ਰਹਿਣ ਵਾਲੀ ਅੰਜੂ ਨੇ ਦੱਸਿਆ ਕਿ ਗੱਡੀਆਂ ਉਨ੍ਹਾਂ ਦੀ ਡਰਾਈਵ-ਵੇ 'ਚ ਆ ਕੇ ਰੁਕਿਆਂ ਅਤੇ ਮਿਨੀਵੈਨ 'ਚ ਸਵਾਰ ਵਿਅਕਤੀ ਨੂੰ ਲੱਗੀਆਂ ਸੱਟਾਂ ਗੰਭੀਰ ਜਾਪਦੀਆਂ ਸਨ। ਅੰਜੂ ਨੇ ਦੱਸਿਆ ਕਿ ਪ੍ਰੀਵਾਰ ਨੇ ਵੀ ਪਹਿਲਾਂ ਪੀੜਤਾਂ ਦੀ ਮਦਦ ਕੀਤੀ ਅਤੇ ਜਲਦੀ ਹੀ ਮੌਕੇ 'ਤੇ ਪੁਲਿਸ ਦੀਆਂ ਗੱਡੀਆਂ, ਐਂਬੂਲੈਂਸ ਅਤੇ ਫਾਇਰਟਰੱਕ ਪਹੁੰਚ ਗਿਆ ਸੀ।

ਕਰੈਸ਼ ਤੋਂ ਬਾਅਦ ਜਲਦੀ ਹੀ ਇਲਾਕੇ 'ਚ ਆਵਾਜਾਈ ਆਮ ਢੰਗ ਨਾਲ ਸ਼ੁਰੂ ਹੋ ਗਈ ਸੀ।