20.21C Vancouver 20.21C VancouverJul 16, 2022 12:56 AM - The Canadian Press
ਰਿਪੂਦਮਨ ਸਿੰਘ ਮਲਿਕ ਦੇ ਕਤਲ ਤੋਂ ਬਾਅਦ ਉਨ੍ਹਾਂ ਦੇ ਪੁੱਤਰ ਨੇ ਬਿਆਨ ਦਿੱਤਾ ਹੈ ਕਿ ਉਹ ਨਹੀਂ ਸਮਝਦੇ ਕਿ ਉਨ੍ਹਾਂ ਦੇ ਪਿਤਾ ਦਾ ਕਤਲ ਏਅਰ ਇੰਡੀਆ ਬੰਬ ਧਮਾਕੇ 'ਚ 17 ਸਾਲ ਪਹਿਲਾਂ ਉਨ੍ਹਾਂ ਨੂੰ ਬਰੀ ਕੀਤੇ ਜਾਣ ਦੀ ਘਟਨਾ ਨਾਲ ਜੁੜਿਆ ਹੋਇਆ ਹੈ।
ਜਸਪ੍ਰੀਤ ਸਿੰਘ ਮਲਿਕ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪੂਰਾ ਵਿਸ਼ਵਾਸ ਹੈ ਕਿ ਉਨ੍ਹਾਂ ਦੇ ਪਿਤਾ ਦਾ ਕਤਲ ਅਤੇ ਏਅਰ ਇੰਡੀਆ ਬੰਬ ਧਮਾਕਾ ਮਾਮਲੇ 'ਚ ਹੋਏ ਟ੍ਰਾਇਲ ਦਾ ਆਪਸ 'ਚ ਕੋਈ ਸੰਬੰਧ ਨਹੀਂ ਹੈ।
ਉਨ੍ਹਾਂ ਇਹ ਵੀ ਕਿਹਾ ਕਿ ਉਨ੍ਹਾਂ ਨੂੰ ਆਰ.ਸੀ.ਐਮ.ਪੀ. 'ਤੇ ਭਰੋਸਾ ਹੈ ਅਤੇ ਇਸ ਅਪਰਾਧਿਕ ਘਟਨਾ ਨੂੰ ਸੁਲਝਾ ਲਿਆ ਜਾਵੇਗਾ।
ਬੀ.ਸੀ. ਸੁਪ੍ਰੀਮ ਕੋਰਟ ਨੇ ਰਿਪੂਦਮਨ ਸਿੰਘ ਮਲਿਕ ਅਤੇ ਇੱਕ ਕੋ-ਐਕਿਊਜਡ ਨੂੰ ਏਅਰ ਇੰਡੀਆ ਫਲਾਈਟ 'ਚ ਸਾਲ 1985 'ਚ ਹੋਏ ਬਨਮ ਧਮਾਕਾ ਮਾਮਲੇ 'ਚ ਦੋਸ਼ੀ ਕਰਾਰ ਨਹੀਂ ਦਿੱਤਾ ਸੀ।
ਫਲਾਈਟਸ ਸੰਬੰਧੀ 2 ਧਮਾਕਿਆਂ 'ਚ ਕੁੱਲ 331 ਲੋਕਾਂ ਦੀ ਮੌਤ ਹੋ ਗਈ ਸੀ।
ਮਾਮਲੇ 'ਚ ਆਈ.ਹਿਟ ਵੱਲੋਂ ਦਿੱਤੀ ਗਈ ਜਾਣਕਾਰੀ
ਇੰਟੈਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਯਾਨੀ ਕਿ ਆਈ.ਹਿਟ ਵੱਲੋਂ ਵੀਰਵਾਰ ਨੂੰ ਵਾਪਰੀ ਗੋਲੀ ਚੱਲਣ ਦੀ ਜਾਨਲੇਵਾ ਵਾਰਦਾਤ ਸੰਬੰਧੀ ਅੱਜ ਸਵੇਰ 10 ਵਜੇ ਇੱਕ ਪ੍ਰੈਸ ਕਾਨਫਰੰਸ ਕਰ ਅਪਡੇਟ ਸਾਂਝੀ ਕੀਤੀ ਗਈ ਹੈ।
ਸਾਰਜੈਂਟ ਡੇਵਿਡ ਲੀ ਨੇ ਦੱਸਿਆ ਕਿ ਮਾਮਲੇ 'ਚ ਸ਼ਾਮਿਲ ਇੱਕ ਸ਼ੱਕੀ ਵਾਹਨ, ਚਿੱਟੇ ਰੰਗ ਦੀ ਹੌਂਡਾ ਸੀ.ਆਰ.ਵੀ. ਗੱਡੀ ਸੀ।
ਸ਼ੱਕੀ ਗੱਡੀ ਦੀਆਂ ਤਸਵੀਰਾਂ ਵੀ ਜਾਰੀ ਕੀਤੀਆਂ ਗਈਆਂ ਹਨ।
ਸਾਰਜੈਂਟ ਡੇਵਿਡ ਲੀ ਨੇ ਜਾਣਕਾਰੀ ਦਿੱਤੀ ਕਿ 75 ਸਾਲਾ ਰਿਪੂਦਮਨ ਸਿੰਘ ਮਲਿਕ ਦੇ ਕਤਲ ਨੂੰ ਅੰਜਾਮ ਦੇਣ ਤੋਂ ਕਈ ਘੰਟੇ ਪਹਿਲਾਂ ਹੀ ਸ਼ੱਕੀ ਵਾਹਨ 82 ਐਵੀਨਿਊ ਅਤੇ 128 ਸਟ੍ਰੀਟ ਦੇ ਸ਼ੌਪਿੰਗ ਪਲਾਜਾ ਦੇ ਪਾਰਕਿੰਗ ਲੌਟ 'ਚ ਪਹੁੰਚ ਗਿਆ ਸੀ।
ਉਨ੍ਹਾਂ ਦੱਸਿਆ ਕਿ ਗੱਡੀ 'ਚ ਸਵਾਰ ਲੋਕ ਰਿਪੂਦਮਨ ਸਿੰਘ ਦੀ ਉਡੀਕ ਕਰ ਰਹੇ ਸਨ। ਅਧਿਕਾਰੀਆਂ ਅਨੁਸਾਰ ਸਵੇਰ 7 ਵਜੇ ਦੇ ਕਰੀਬ ਇਸ ਸ਼ੱਕੀ ਵਾਹਨ ਦੇ ਪਾਰਕਿੰਗ ਲੌਟ 'ਚ ਪਹੁੰਚਣ ਦੀ ਫੁਟੇਜ ਹਾਸਿਲ ਕਰ ਲਈ ਗਈ ਹੈ।
ਰਿਪੂਦਮਨ ਸਿੰਘ ਨੂੰ ਸਵੇਰ 9.27 ਵਜੇ ਗੋਲੀਆਂ ਦਾ ਨਿਸ਼ਾਨਾ ਬਣਾਇਆ ਗਿਆ।
ਘਟਨਾ ਨੂੰ ਅੰਜਾਮ ਦੇਣ ਤੋਂ ਬਾਅਦ ਇਸ ਹੌਂਡਾ ਸੀ.ਆਰ.ਵੀ. ਗੱਡੀ ਨੂੰ ਮੌਕੇ ਤੋਂ ਦੌੜਾ ਲਿਆ ਗਿਆ ਸੀ ਅਤੇ ਗੱਡੀ ਨੂੰ 82 ਐਵੀਨਿਊ ਦੇ 12200 ਬਲੌਕ ਕੋਲ ਅੱਗ ਦੀਆਂ ਲਪਟਾਂ 'ਚ ਘਿਰਿਆ ਪਾਇਆ ਗਿਆ ਸੀ।
