18.11C Vancouver 18.11C VancouverJan 24, 2024 3:07 PM - The Associated Press
ਰੂਸ ਦਾ ਇੱਕ ਫੌਜੀ ਜਹਾਜ਼ ਬੁੱਧਵਾਰ ਨੂੰ ਯੂਕਰੇਨ ਦੇ ਬਾਰਡਰ ਦੇ ਨਾਲ ਲੱਗਦੇ ਸ਼ਹਿਰ ਬੇਲਗੋਰੋਡ ਵਿਚ ਕ੍ਰੈਸ਼ ਹੋ ਗਿਆ, ਇਸ ਵਿਚ 74 ਲੋਕ ਸਵਾਰ ਸਨ। ਸ਼ਹਿਰ ਦੇ ਗਵਰਨਰ ਮੁਤਾਬਕ, ਹਾਦਸੇ ਵਿਚ ਸਾਰੇ ਲੋਕਾਂ ਦੀ ਮੌਤ ਹੋ ਗਈ।
ਇਨ੍ਹਾਂ ਵਿਚ 65 ਯੂਕਰੇਨ ਦੇ ਯੁੱਧ ਬੰਦੀ ਸਨ, ਜਿਨ੍ਹਾਂ ਨੂੰ ਰੂਸ ਦੇ ਸੈਨਿਕਾਂ ਦੀ ਰਿਹਾਈ ਬਦਲੇ ਛੱਡਿਆ ਜਾਣਾ ਸੀ। ਇਹ ਅਦਲਾ-ਬਦਲੀ ਯੂਕਰੇਨ ਬਾਰਡਰ ’ਤੇ ਹੋਣੀ ਸੀ। ਜਹਾਜ਼ ਵਿਚ 6 ਚਾਲਕ ਦਲ ਦੇ ਮੈਂਬਰ ਅਤੇ ਤਿੰਨ ਗਾਰਡ ਵੀ ਸਨ।
ਰੂਸ ਨੇ ਯੂਕਰੇਨ ’ਤੇ ਉਸ ਦੇ ਮਿਲਟਰੀ ਜਹਾਜ਼ ਨੂੰ ਨਿਸ਼ਾਨਾ ਬਣਾਏ ਜਾਣ ਦੇ ਦੋਸ਼ ਲਗਾਏ ਹਨ।
ਰੱਖਿਆ ਮੰਤਰਾਲੇ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਰੂਸੀ ਰਾਡਾਰ ਸਿਸਟਮ ਨੇ ਦੋ ਯੂਕਰੇਨੀ ਮਿਜ਼ਾਈਲਾਂ ਨੂੰ ਦੇਖਿਆ ਅਤੇ ਦੋਸ਼ ਲਗਾਇਆ ਕਿ ਯੂਕਰੇਨ ਦੀ ਸਰਕਾਰ ਬਹੁਤ ਚੰਗੀ ਤਰ੍ਹਾਂ ਜਾਣਦੀ ਸੀ ਕਿ ਸਮਝੌਤੇ ਅਨੁਸਾਰ ਇੱਕ ਫੌਜੀ ਟਰਾਂਸਪੋਰਟ ਜਹਾਜ਼ ਯੁੱਧ ਬੰਦੀਆਂ ਦੀ ਅਦਲਾ-ਬਦਲੀ ਲਈ ਉਸ ਰੂਟ ’ਤੇ ਉਡਾਣ ਭਰੇਗਾ।
ਯੂਕਰੇਨ ਸਰਕਾਰ ਨੇ ਕਿਹਾ ਕਿ ਉਹ ਰੂਸ ਦੇ ਦਾਅਵੇ ਦੀ ਜਾਂਚ ਕਰ ਰਹੀ ਹੈ ਪਰ ਇਹ ਪੁਸ਼ਟੀ ਕੀਤੀ ਕਿ ਰੂਸ ਨਾਲ ਯੁੱਧ ਬੰਦੀਆਂ ਦੀ ਅਦਲਾ-ਬਦਲੀ ਅੱਜ ਹੋਣੀ ਸੀ।
