ਰੂਸ ਦੇ ਰਾਸ਼ਟਰਪਤੀ ਪੁਤਿਨ ਦੇ ਸਭ ਤੋਂ ਵੱਡੇ ਵਿਰੋਧੀ ਅਲੈਕਸੀ ਨਾਵਲਨੀ ਦੀ ਜੇਲ੍ਹ ਵਿਚ ਮੌਤ

ਰੂਸ ਦੇ ਰਾਸ਼ਟਰਪਤੀ ਪੁਤਿਨ ਦੇ ਸਭ ਤੋਂ ਵੱਡੇ ਵਿਰੋਧੀ ਅਲੈਕਸੀ ਨਾਵਲਨੀ ਦੀ ਜੇਲ੍ਹ ਵਿਚ ਮੌਤ ਹੋ ਗਈ ਹੈ। ਉਹ 47 ਸਾਲ ਦੇ ਸਨ। ਨਾਵਲਨੀ ਦੀ ਮੌਤ ਰੂਸ ਵਿਚ ਹੋਣ ਵਾਲੇ ਰਾਸ਼ਟਰਪਤੀ ਇਲੈਕਸ਼ਨਸ ਤੋਂ ਠੀਕ ਇੱਕ ਮਹੀਨੇ ਪਹਿਲਾਂ ਹੋਈ ਹੈ। ਉੱਥੇ 15 ਤੋਂ 17 ਮਾਰਚ ਨੂੰ ਇਲੈਕਸ਼ਨ ਹੋਣੇ ਹਨ। ਨਾਵਲਨੀ ਨੂੰ 2021 ਵਿਚ 19 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਸੀ। ਦਸੰਬਰ ਵਿਚ ਉਨ੍ਹਾਂ ਦੇ ਪੋਲਰ ਵੁਲਫ ਜੇਲ੍ਹ ਵਿਚ ਕੈਦ ਹੋਣ ਦੀ ਗੱਲ ਸਾਹਮਣੇ ਆਈ ਸੀ। ਇਸ ਤੋਂ ਪਹਿਲਾਂ ਕਾਫ਼ੀ ਸਮੇਂ ਤੱਕ ਉਹ ਗਾਇਬ ਸਨ।

ਆਰਕਟਿਕ ਦੀ ਜਿਸ ਜੇਲ੍ਹ ਵਿਚ ਉਨ੍ਹਾਂ ਨੂੰ ਰੱਖਿਆ ਗਿਆ ਸੀ ਉਥੇ ਪਾਰਾ ਮਾਈਨਸ 28 ਡਿਗਰੀ ਤੱਕ ਜਾਂਦਾ ਹੈ। ਨਾਵਲਨੀ ਦੇ ਵਕੀਲ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਇਲੈਕਸ਼ਨ ਤੋਂ ਦੂਰ ਰੱਖਣ ਲਈ ਆਰਕਟਿਕ ਜੇਲ੍ਹ ਵਿਚ ਭੇਜਿਆ ਗਿਆ ਸੀ।

ਸਾਲ 2018 ਵਿਚ ਉਨ੍ਹਾਂ ਨੇ ਰਾਸ਼ਟਰਪਤੀ ਇਲੈਕਸ਼ਨ ਵਿਚ ਖੜ੍ਹੇ ਹੋਣ ਦੀ ਕੋਸ਼ਿਸ਼ ਕੀਤੀ ਸੀ ਪਰ ਧੋਖਾਧੜੀ ਦੇ ਆਰੋਪ ਵਿਚ ਉਹ ਇਲੈਕਸ਼ਨ ਨਹੀਂ ਲੜ ਸਕੇ ਸਨ, ਇਸ ਪਿੱਛੇ ਉਨ੍ਹਾਂ ਨੇ ਸਰਕਾਰ ਦੀ ਸਾਜ਼ਿਸ਼ ਦੱਸੀ ਸੀ।

2020 ਵਿਚ ਉਨ੍ਹਾਂ ਨੂੰ ਜ਼ਹਿਰ ਦੇਣ ਦੀ ਵੀ ਕੋਸ਼ਿਸ਼ ਹੋਈ। ਨਾਵਲਨੀ ਯੂਕਰੇਨ ਦੀ ਜੰਗ ਖਿਲਾਫ ਸਨ। 2023 ਵਿਚ ਉਨ੍ਹਾਂ ’ਤੇ ਬਣੀ ਦਸਤਾਵੇਜ਼ੀ ਨੇ ਆਸਕਰ ਐਵਾਰਡ ਜਿੱਤਿਆ ਸੀ।