13.75C Vancouver 13.75C VancouverJan 7, 2020 5:19 PM -
ਸਰ੍ਹੀ ਨੇੜ੍ਹੇ ਫਰੇਜ਼ਰ ਰਿਵਰ ਵਿੱਚ ਕਈ ਸਾਲਾਂ ਤੋਂ ਇਲਾਕਾ ਨਿਵਾਸੀਆਂ ਦੀਆਂ ਅੱਖਾਂ ਵਿੱਚ ਰੜਕ ਰਹੇ ਲਾਵਾਰਸ ਜਹਾਜ਼ ਨੂੰ ਉਥੋਂ ਹਟਾਉਣ ਦਾ ਕੰਮ ਸ਼ੁਰੂ ਕਰ ਦਿੱਤਾ ਗਿਆ ਹੈ।
ਫਿਸ਼ਰੀਜ਼ ਮਨਿਸਟਰ ਬਰਨਾਡੇਟ ਜਾਰਡਨ (Fisheries Minister Bernadette Jordan) ਨੇ ਐਲਾਨ ਕੀਤਾ ਕਿ ਐਮ ਵੀ ਸਪਡਨਿੱਕ (MV Spudnik) ਨਾਮਕ ਇਸ ਜਹਾਜ਼ ਦੇ ਮੁਲਾਂਕਣ ਵਿੱਚ ਸਾਫ਼ ਹੋਇਆ ਹੈ ਕਿ ਇਸਦੇ ਕਾਰਨ ਪ੍ਰਦੂਸ਼ਨ ਹੋਣ, ਇਸਦੇ ਡੁੱਬਣ ਜਾਂ ਇਸ ਵਿੱਚ ਅੱਗ ਲੱਗਣ ਦਾ ਖ਼ਦਸ਼ਾ ਹੈ।
ਡਿਪਾਰਟਮੈਂਟ ਮੁਤਾਬਕ ਕਨੇਡੀਅਨ ਕੋਸਟ ਗਾਰਡ (Canadian Coast Guard) ਨੇ ਇਸ ਸੰਬੰਧ ਵਿੱਚ ਮਰੀਨ ਰੀਸਾਈਕਲਿੰਗ ਕਾਰਪੋਰੇਸ਼ਨ (Marine Recycling Corporation) ਦੀ ਮਦਦ ਨਾਲ ਇਸ ਜਹਾਜ਼ ਨੂੰ ਨਸ਼ਟ ਕਰਕੇ ਪਾਣੀ ਵਿੱਚੋਂ ਕੱਢਣ ਦੇ ਵਿਕਲਪਾਂ ਬਾਰੇ ਵਿਚਾਰ ਕਰਨਾ ਸ਼ੁਰੂ ਵੀ ਕਰ ਦਿੱਤਾ ਹੈ।
ਇਹ ਜਹਾਜ਼ 2014 ਤੋਂ ਇਸੇ ਥਾਂ ਤੇ ਖੜਾ ਹੈ ਅਤੇ ਇਸ ਦੇ ਮਾਲਕ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ।
ਜਾਰਡਨ ਮੁਤਾਬਕ ਅਜਿਹੇ ਜਹਾਜ਼ਾਂ ਕਾਰਨ ਕੋਸਟਲ ਕਮਿਊਨਿਟੀਜ਼ (coastal communities) ਦੀ ਸਿਹਤ ਅਤੇ ਸੁਰੱਖਿਆ ਨੂੰ ਬਹੁਤ ਖ਼ਤਰਾ ਹੋ ਸਕਦਾ ਹੈ ਅਤੇ ਉਹਨਾਂ ਨੂੰ ਪੂਰਾ ਭਰੋਸਾ ਹੈ ਕਿ ਕੋਸਟ ਗਾਰਡ ਇਸ ਸਮੱਸਿਆ ਨੂੰ ਸਹੀ ਤਰੀਕੇ ਨਾਲ ਹੱਲ ਕਰਨਗੇ।
