ਕੈਨੇਡੀਅਨ ਕੈਨੋਲਾ'ਤੇ ਟੈਰਿਫ ਨੂੰ ਹਟਵਾਉਣ ਦੀ ਕੋਸ਼ਿਸ਼ ਵਿਚ ਸਸਕੈਚਵਨ ਦੇ ਪ੍ਰੀਮੀਅਰ ਕਰ ਸਕਦੇ ਹਨ ਚੀਨ ਦੀ ਯਾਤਰਾ

ਕੈਨੇਡੀਅਨ ਕੈਨੋਲਾ'ਤੇ ਟੈਰਿਫ ਨੂੰ ਹਟਵਾਉਣ ਦੀ ਕੋਸ਼ਿਸ਼ ਵਿਚ ਸਸਕੈਚਵਨ ਦੇ ਪ੍ਰੀਮੀਅਰ ਸਕਾਟ ਮੋਅ ਚੀਨ ਦੀ ਯਾਤਰਾ ਕਰ ਸਕਦੇ ਹਨ। ਮੋਅ ਦਾ ਕਹਿਣਾ ਹੈ ਕਿ ਉਨ੍ਹਾਂ ਇਸ ਯਾਤਰਾ ਦੇ ਸਬੰਧ ਵਿਚ ਫੈਡਰਲ ਸਰਕਾਰ ਨਾਲ ਚਰਚਾ ਸ਼ੁਰੂ ਕਰ ਦਿੱਤੀ ਹੈ। ਪ੍ਰੀਮੀਅਰ ਨੇ ਕਿਹਾ ਕਿ ਉਨ੍ਹਾਂ ਦਾ ਮੰਨਣਾ ਹੈ ਕਿ ਸਸਕੈਚਵਨ ਗੱਲਬਾਤ ਵਿਚ ਸਹਾਇਤਾ ਕਰਨ ਲਈ ਮਹੱਤਵਪੂਰਨ ਭੂਮਿਕਾ ਨਿਭਾ ਸਕਦਾ ਹੈ ਕਿਉਂਕਿ ਚੀਨ ਵਿਚ ਉਸ ਦਾ ਵਪਾਰ ਦਫਤਰ ਇੱਕ ਦਹਾਕੇ ਤੋਂ ਕੰਮ ਕਰ ਰਿਹਾ ਹੈ।

ਮੋਅ ਨੇ ਕਿਹਾ ਕਿ ਸਾਨੂੰ ਕਿਤੇ ਨਾ ਕਿਤੇ ਤੋਂ ਗੱਲ ਸ਼ੁਰੂ ਕਰਨੀ ਹੋਵੇਗੀ ਅਤੇ ਉਹ ਇਸ ਵਿਚ ਫੈਡਰਲ ਸਰਕਾਰ ਦਾ ਪੂਰਾ ਸਾਥ ਦੇਣਗੇ। ਚੀਨ ਨੇ ਹਾਲ ਹੀ ਵਿਚ ਕੈਨੇਡੀਅਨ ਕੈਨੋਲਾ'ਤੇ 76 ਫੀਸਦੀ ਐਂਟੀ-ਡੰਪਿੰਗ ਡਿਊਟੀ ਲਗਾਈ ਹੈ ਅਤੇ ਫਿਲਹਾਲ ਟੈਂਪਰੇਰੀ ਹੈ ਐਂਟੀ-ਡੰਪਿੰਗ ਜਾਂਚ ਦੇ ਖਤਮ ਹੋਣ 'ਤੇ ਇਸ ਟੈਰਿਫ 'ਤੇ ਅੰਤਿਮ ਫੈਸਲਾ ਅਗਲੇ ਮਹੀਨੇ ਹੋਣ ਦੀ ਉਮੀਦ ਹੈ।

ਚੀਨ ਦੀ ਵਣਜ ਮੰਤਰਾਲਾ ਦਾ ਦੋਸ਼ ਹੈ ਕਿ ਕੈਨੇਡਾ ਨੇ ਕੈਨੋਲਾ ਨੂੰ ਬੀਜਿੰਗ ਵਿਚ ਡੰਪ ਕਰਨ ਲਈ ਭਾਰੀ ਸਬਸਿਡੀ ਅਤੇ ਹੋਰ ਪੌਲਿਸੀ ਦਾ ਇਸਤੇਮਾਲ ਕੀਤਾ ਹੈ। ਸਸਕੈਚਵਨ ਪ੍ਰੀਮੀਅਰ ਨੇ ਕਿਹਾ ਕਿ ਸਾਡੀ ਕੈਨੋਲਾ ਇੰਡਸਟਰੀ $45 ਬਿਲੀਅਨ ਦੀ ਹੈ ਜੋ 200,000 ਕੈਨੇਡੀਅਨਜ਼ ਨੂੰ ਰੁਜ਼ਗਾਰ ਦਿੰਦੀ ਹੈ, ਇਸ ਲਈ ਟੈਰਿਫ ਚਿੰਤਾਜਨਕ ਹੈ।